SINAYII NYAGURUGO NYAKUNGƐNGƐ GE
(19.1–31.18)
Isirayɛliyé piyē nɛ gbòborí bè Yewe kpàli wè
19
1 Yeye taanriwuʔu nɛ̄ gè Isirayɛli siɛnnɛ pe yirile kàduʔumɛ gè Ezipiti kùlo nī lè, ki cɛnnugo gè, a Isirayɛli siɛnnɛ pe sɛ́nì nɔ̀ Sinayiia waama kùlo nɛ̄ lè. 2 Bà pe yé yiri Erefidimi tiʔɛ nī gè, a Isirayɛli siɛnnɛ pe sɛ́nì jíin Sinayii waama kùlo nī lè, nɛ̀ sɛ́nì bùguro kpúɔn dè waama kùlo nī lè nyagurugo táanni gè.3 A Misa wire 'tánʔa nyagurugo nɛ̄ gè, Kulocɛliɛ kúrugu wè. A Yewe wire 'wi yeri nyagurugo naamɛ gè nɛ́ wi yɛ: «Kɛnmɛ báà pire nɛ̄ muɔ bé juu nɛ́ Yakuba narigɛ wuulo ní bèle, siɛnrɛ dáà tire muɔ bé juu Isirayɛli siɛnnɛ mɛ́ bèle: 4 ‹Yeli nyɛ́nì ki nyaa, yeli tíimɛ bèle, gàa mi 'kpíʔile Ezipiti siɛnnɛ nɛ̄ bèle, nɛ́ kɛnmɛ bíì nɛ̄ mi 'yeli gbó mi fíkɛnyɛ nɛ̄ yè bɛ̀ dìfira tíɛlɛb nɛ̀ pɛn nɛ́ yeli ní náʔa gè mi táanni wè. 5 Píra ŋáà nī wè, a yeli nɛ lúru mi mɛ́ wè, níɛ síngi mi nyakungɛngɛ siɛnrɛc mɛ́ dè, yeli bé puu mi wuulo duniya siɛnfeliye yi mìɛni sunʔɔmɔ nī bè, nɛ́ ki cɛ́n dàala ni mìɛni yē mi woli. 6 Yeli bèle yeli ye mìɛni bé puu mi kùlofɔligɔ ki kacuɔnrilɔ; m'bé yeli kpíʔile siɛnfelige gáà mi 'nyíɛnɛ nɛ̀ kɔ̀n gè nɛ̀ tɛ́ngɛ kiiyɛ gèd.›
«Siɛnrɛ dáà tire dī dàa muɔ bé sa juu Isirayɛli siɛnnɛ mɛ́ bèle.»
7 A Misa 'koli nɛ̀ kɛ́ bùguro mɛ́ dè, nɛ̀ sɛ́nì Isirayɛli liɛlɛ pe mìɛni yeri nɛ̀ tɛ́ngɛ, nɛ́ siɛnrɛ juu dè pe mɛ́ dàa Yewe yé juu nɛ̀ gbɛ̀ngɛ wi mɛ́ dè, nɛ́ jo wi- ti juu pe mɛ́ dè.
8 A siɛnnɛ pe mìɛni 'pínɛ nɛ̀ jo: «Weli bé ki kpíʔile dàa ti mìɛni Yewe 'juu muɔ mɛ́ dè.» A Misa 'koli nɛ̀ sɛ́nì kire siɛnrɛ juu dè Yewe mɛ́, dàa siɛnnɛ pe yé juu dè.
9 A Yewe 'ki juu Misa mɛ́ nɛ́ jo: «M'bé pɛn muɔ mɛ́ kàsadibagɛ nī gè gàa ki 'wúɔ gè, kire ga buu siɛnnɛ pe- mi yékpoli lúʔu lè lɛ̀lɛ líì nī m'béri nyu nɛ́ muɔ ní wè. Bà siɛnnɛ pe bé tɛ́ngɛ muɔ nɛ̄ lɛ̀lɛ ó lɛ̀lɛ.»
A Misa sɛ́nì siɛnnɛ pe siɛnnugoro juu dè Yewe mɛ́ wè.
10 A Yewe 'ki juu Misa mɛ́ nɛ́ jo: «Koli mari waa siɛnnɛ kúrugu bèle, ma sa pe gbòbori ma pe wàli ma tɛ́ngɛ pàngɛ gè nɛ́ mbànʔa ní gè. Ma pe yɛ pe- pìye gbéli pe mùnu, pé pe burudo jíge dè, 11 pe gbòbori pe yaʔa cɛnyɛ taanriwuʔu nɛ̄ gè, nɛ́ ki cɛ́n cɛnyɛ taanriwuʔu nɛ̄ gè, Yewe bé tìgi pe mìɛni nyaamɛ nɛ̄ Sinayii nyagurugo nɛ̄ gè.
12 «-Láʔala tìɛ siɛnnɛ nɛ̄ bèle ma pe yɛ: ‹Ye- yìye cò díɛʔ ! Wàa fǎga tánʔa nyagurugo nɛ̄ gèʔ; wàa míɛni fǎga cò daa ki kàsɛnyɛ nɛ̄ yèʔ ! A siɛn ó siɛn 'cò nɛ̀ taa nyagurugo nɛ̄ gè, kányiʔɛ nɛ̄ pe bé wi kpúu wī. 13 Siɛn fǎga cò kire siɛn nɛ̄ wè díɛʔ; kire siɛn wè, pe bé wi wáa bè kpúu nɛ́ kàdari ní, a kire ga laa pe bé wi súbulo bè kpúu nɛ́ ŋaaya ní. A ki cɛ́nì nyaa yajuʔu yo, kire ga laa siɛn yo, wiǐ ga tíi kò sìi nɛ̄ʔe.› A pe kɛ́nì sìnbanyɛgɛ wíi gè, kire lɛ̀lɛ lire yákuɔ nī siɛn bé nɛ́ gbɛ̀ tánʔa nyagurugo nɛ̄ gè.»
14 A Misa 'koli nɛ̀ tìgi nyagurugo nɛ̄ gè nɛ̀ pɛn siɛnnɛ kúrugu bèle nɛ̀ pɛ́nì pe mìɛni wàli nɛ̀ tɛ́ngɛ Yewe mɛ́, nɛ́ pe yɛ pe- pìye jíge pe mùnu. A pe mìɛni 'pe burudo jíge dè.
15 A wi sí pe yɛ: «Ye- yìye gbòbori ye yaʔa cɛnyɛ taanriwuʔu nɛ̄ gè; wàa fǎga cò wi cuɔ nɛ̄ʔf.»
Yewe 'tìgi Sinayii nyagurugo nɛ̄ gè
16 Cɛnyɛ taanriwuʔu nɛ̄ gè, cɛngɛnyɛnifolimɛ lɛ̀lɛ nī lè, a ki 'nyaa kàsakpɛnigɛ ki 'puu nɛ tùngú níɛ nyíʔɛnɛ, a kàsadibagɛ káà pɛ́nì nyagurugo tɔ́n gè, gàa ki 'puu wuʔɔ gè. A pe 'sìnbanyɛgɛ wíi gè kpuʔɔ, a siɛnnɛ pe mìɛni 'fíɛ bùguro nī dè nɛ fún nɛ yàʔará. 17 A Misa 'fali nɛ̀ siɛnnɛ yige bèle pe- sa Kulocɛliɛ kpàli wè bùguro yiʔɛ mɛ́ gè. A pe sɛ́nì yéri nyagurugo táanni gè. 18 Sinayii nyagurugo ki mìɛni cé puu tɔ́ngɔ wírige nɛ̄ gè, nɛ́ ki cɛ́n Yewe cé tìgi kàsun nī gè, á wírige ní gè nɛ yɛ̀gí naamɛ gè wuʔɔ tígitigi, á nyagurugo ki mìɛni ní nɛ cúungu.
19 Ki 'nyaa sìnbanyɛgɛ yékpoli ni 'puu nɛ gbɛ̀ngí nɛ waa, kàa 'puu nɛ fàri ni nɛ̄ súurig, Misa wire 'puu nɛ nyu, á Yewe Kulocɛliɛ sí nɛ siɛnnugoro kanʔa dè wi mɛ́ nɛ́ yékpogbuɔlɔ ní. 20 A Yewe 'tìgi Sinayii nyagurugo naamɛ gè, níɛ Misa yeri nɛ́ jo wi- tánʔa baa wire kúrugu nyagurugo naamɛ gè. A Misa 'tánʔa baa.
21 A Yewe sí jo: «Koli ma tìgi siɛnnɛ kúrugu bèle, ma pe sɔ̀mi pe fǎga fìʔɛlɛ bè jo peli bé pa Yewe nyaa wè ! Nɛ́ ki cɛ́n a pe 'kire kpíʔile gè siɛnniʔɛnɛ bé kùu pe nī. 22 Kacuɔnrilɔh tíimɛ bálì pe 'kpɔni mi nɛ̄ bèle, pe 'yɛli pe- pìye wàli dɛ́ngɛ mi mɛ́, kire ga laa mi Yewe mi fǎga ŋàʔana bè pe kpúɔn.»
23 A Misa sí Yewe yɛ o: «Siɛnnɛ piyě gbɛ̀ jaa bè tánʔa Sinayii nyagurugo nɛ̄ gèʔ, nɛ́ ki cɛ́n muɔ tíimɛ 'ki juu nɛ̀ gbɛ̀ngɛ weli mɛ́ nɛ́ jo we- láʔagɛlɛ kpíʔile nyagurugo táanni gè, weri ki tɔ́ri wàlidɛngɛgɛ muɔ mɛ́.»
24 A Yewe sí wi yɛ: «Koli ma tìgi, ma sa Arawɔn kɔ́ri wè ma tánʔa nɛ́ wi ní. Gàa ki 'kacuɔnrilɔ kúɔ bèle, peli nɛ́ siɛnnɛ ní bèle, peli fǎga jo peli bé ŋàʔana bè tánʔa mi kúruguʔ, kire ga buu mi fǎga ŋàʔana bè pe kpúɔnʔ.»
25 A Misa 'koli nɛ̀ tìgi siɛnnɛ kúrugu bèle nɛ̀ sɛ́nì ti mìɛni juu pe mɛ́ dàa Yewe 'juu dè.