Zeturo wi 'kɛ́ bàa Misa wéli
18
1 Zeturo ŋáà wi 'puu Madiyan kùlo kacuɔnriwɔ wè, nɛ́ ní Misa cuɔ tuu wè, wi yé ki lúʔu gàa Kulocɛliɛ 'kpíʔile Misa mɛ́ wè nɛ́ Isirayɛli siɛnnɛ ní bèle, Misa wuulo bèle, nɛ́ kɛnmɛ bíì nɛ̄ Yewe cé Isirayɛli siɛnnɛ yige bèle nɛ̀ síɛ wè Ezipiti kùlo nī lè. 2 Zeturo wè, Misa cuɔ tuu wè, a wi 'Siporaa kɔ́ri wè, Misa cuɔ wè, nɛ̀ kɛ́ nɛ́ wi ní, nɛ́ ki cɛ́n Misa cé wi tórigo wi wuulo tiʔɛ nī gè, 3 nɛ́ wi jaala siin ní bèle. Pe 'puu nɛ wàa ye Gerisɔmi (ki kɔri wire wī: nabɔnwɔ), gìi wi yé je juu gè, «Mi 'puu nabɔnwɔ kùlo láà nī wī,» 4 nɛ siinwuu ye wè Eliyezeri (ki kɔri wire wī: mi Kulocɛliɛ wiī nɛ mi suu), gìi wi yé je juu gè, «Mi tuu wè, wi Kulocɛliɛ wi 'mi suɔ Farawɔn kapiɛngbuɔn ŋɔsii mɛ́ wè.»5 Misa 'puu tɛ́niwɛ bùguro nī dè, baa Kulocɛliɛ nyagurugo táanni gè, waama kùlo nī lè. A Zeturo wè, Misa cuɔ tuu wè, a wi 'Misa cuɔ nɛ́ wi jaala kɔ́ri bèle nɛ̀ kɛ́ wi kúrugu. 6 A Zeturo 'tunduro tun Misa mɛ́ wè nɛ́ jo: «Mi nɛ waa baa muɔ kúrugu nɛ́ muɔ cuɔ ní wè nɛ́ muɔ jaala siin ní bèle.»
7 A Misa 'yɛ̀ nɛ̀ yiri nɛ̀ sɛ́nì wi cuɔ tuu kpàli wè, nɛ̀ wi wáa nɛ̀ mígi nɛ́ gbɔbi wi láara. A pe 'pìye síɛri nɛ́ jo: «Yanyige yē baa lé ?» Kire kàduʔumɛ a pe sɛ́nì jíin Misa fɛ̀ni saʔa nī gè. 8 A Misa 'ki juu nɛ̀ tìɛ wi cuɔ tuu nɛ̄ wè gàa ki mìɛni Yewe 'kpíʔile Farawɔn nɛ́ Ezipiti siɛnnɛ nɛ̄ bèle nɛ́ Isirayɛli siɛnnɛ suɔ bèle. A wi ń'nɛ̀ ti mìɛni juu nɛ̀ tìɛ wi nɛ̄ fùrɔyɔ nyáà yi 'peli taa koligo nɛ̄ gè, nɛ́ kɛnmɛ bíì nɛ̄ Yewe 'peli suɔ nɛ̀ síɛ wè. 9 A Zeturo 'fundaanra kpíʔile kacɛ̀ngɛlɛ gálì ke mìɛni wuʔu nɛ̄ gè, gàli Yewe cé kpíʔile Isirayɛli siɛnnɛ mɛ́ bèle, nɛ́ pe suɔ Ezipiti siɛnnɛ pe kiyɛ nī yè.
10 A Zeturo ń'nɛ̀ jo: «Kpuʔɔrɔ 'yɛli de tari Yewe nɛ̄, wire ŋáà wi 'yeli suɔ Farawɔn wi kiyɛ nī yè nɛ́ Ezipiti siɛnnɛ pe kiyɛ nī yè, wire ŋáà wi 'yeli suɔ Ezipiti siɛnnɛ pe parituɔrɔ mɛ́ dè. 11 Píra ŋáà nī wè, mi 'ki cɛ́n Yewe wire wi 'kpúʔɔ nɛ̀ tóri kulocɛlɛlɛ pe mìɛni nɛ̄, nɛ́ ki cɛ́n wire wi nyɛ́nì gàa kpíʔile gè fungbɛnyɛfɔlilɔ bálì nɛ̄ bèle, bàli pe 'puu nɛ yeli wuʔɔ bèle.»
12 Zeturo wè, Misa cuɔ tuu wè, a wi 'yajuʔu káà kpúu nɛ̀ ki kpíʔile kakuɔrɔ kaasuʔuro nɛ́ yanyige suro suʔɔ nìʔɛrɛ Kulocɛliɛ mɛ́, a Arawɔn nɛ́ Isirayɛli liɛlɛ pe mìɛni 'pɛn nɛ̀ pɛ́nì suro lìi dè nɛ́ Misa cuɔ tuu ní wè Kulocɛliɛ yiʔɛ mɛ́ gè.
Misa 'kàyuʔujuulo tɛ́ngɛ
13 Ki kpìɛnduu gè, a Misa 'yɛ̀ nɛ̀ tɛ́ni nɛ siɛnnɛ pe kàyuʔu nyu gè. A siɛnnɛ pe 'pɛn nɛ̀ pɛ́nì yéri nɛ̀ taanni Misa yiʔɛ mɛ́ gè, nɛ̀ ki séli sínbinimɛ táanni bè, fúɔ nɛ̀ pɛ́nì nɔ̀ cɛnguʔɔ táanni gè. 14 Bà Misa cuɔ tuu wi kɛ́nì ki nyaa gàa Misa 'puu nɛ kpínʔini gè siɛnnɛ mɛ́ bèle, a wi 'jo: «Gáa baara muɔ nɛ kúu siɛnnɛ mɛ́ bèle mmɛ gè ? Gáa nɛ̄ muɔ 'tɛ́ni muɔ nigbe, á siɛnniʔɛmɛ báà ní bè yéribe muɔ yiʔɛ mɛ́ gè, nɛ̀ ki líɛ sínbinimɛ táanni bè fúɔ nɛ̀ pɛ́nì nɔ̀ cɛnguʔɔ táanni gè ?»
15 A Misa sí wi cuɔ tuu yɛ wè: «Je siɛnnɛ piyē nɛ báan m'mɛ́ bè pa Kulocɛliɛ yúgo bè wi nyɛ́ni kaala cɛ́n lè wī. 16 A kàsii gbɛ́ni yɛ̀ pe sunʔɔmɔ nī bè, pe nɛ̂ pɛn m'mɛ́, mi nɛ̂ pɛ́nì kàyuʔu juu gè pe mɛ́. Mi nɛ̂ Kulocɛliɛ fànʔa kele nɛ́ wi fànʔa kajuʔulo tìɛ gèle pe nɛ̄.»
17 A Misa cuɔ tuu wi 'jo: «Muɔ baara ti kúɔgɛnmɛ pi wè cɛ̀nbɛʔ. 18 Muɔ bé mìɛ fùrɔ waʔanɛ, muɔ nɛ́ siɛnnɛ pe mìɛni ní bàli bīɛlɛ muɔ táanni wè. Baara tiī nìʔɛrɛ nɛ̀ tóri muɔ nɛ̄. Muɔ sǐ gbɛ̀ jaa bè ti mìɛni kúɔ muɔ nigbeʔ. 19 Píra ŋáà nī wè, -mi siɛnrɛ lúʔu dè. M'bé mi sícilige tìɛ gè muɔ nɛ̄, Kulocɛliɛ sí muɔ saʔa. Muɔ 'yɛli bè puu kàsuluwo siɛnnɛ mɛ́ bèle, Kulocɛliɛ yiʔɛ mɛ́ gè. Muɔ wī ma béri pe kele líi gèle de waa de nyu Kulocɛliɛ mɛ́ wè. 20 Te pe tɛnmɛ fànʔa kele nɛ̄ gèle nɛ́ fànʔa kajuʔulo ní gèle, ma ki tìɛ pe nɛ̄ koligo gáà pe 'yɛli bèri tari gè, nɛ́ gàa pe 'yɛli bèri kpínʔini gè.
21 «Muɔ wè, ma siɛnnɛ pálì nyíɛnɛ ma kɔ̀n pe sunʔɔmɔ nī: bàli bīɛlɛ ŋɔri ní dè nɛ́ kaala cɛ́n wè, níɛ fìʔɛ́ Kulocɛliɛ nɛ̄ wè, nɛ́ siɛn gbɛ̀ tɛ́ngɛ pe nɛ̄ wè, nɛ́ bàli bīɛlɛ núʔɔrɔ kele kiyè pe dɛ́ni bèleʔ, ma pe tɛ́ngɛ siɛnnɛ yiʔɛ mɛ́ gè, wàa puu siɛnnɛ sirakogunɔ (1 000) kàfɔli, wàa sí puu siɛnnɛ dabataan (100) kàfɔli, wàa puu siɛnnɛ togosiin nɛ́ kpɔrigɔ kàfɔli, wàa sí puu siɛnnɛ kiɛ kàfɔli. 22 Peli pe béri siɛnnɛ kàyuʔu nyu gè cɛngɛ ó cɛngɛ. A dìi kɛ́nì pe fungo wúɔ bèle, pe bé pa ti juu muɔ mɛ́. A pe fànʔa sí taa dìi nɛ̄ wè, pe bé ti juu bè ti kúɔ, peli bèle. -Kàa yige muɔ tugoro nī dè, pàli sí muɔ sáʔa ti nɛ̄. 23 A muɔ 'jáa nɛ̀ kire kpíʔile gè, á Kulocɛliɛ muɔ 'yiʔɛ kíni wè, muɔ ŋɔri tiǐ kúɔʔ, nɛ́ míɛni siɛnnɛ bálì pe béri waa yanyige nɛ̄.»
24 A Misa wi 'wi cuɔ tuu siɛnrɛ lúʔu dè. A wi 'fali nɛ̀ ki kpíʔile gàa wi yé juu gè. 25 A Misa 'nàguɔlɔ pálì nyíɛnɛ nɛ̀ kɔ̀n Isirayɛli siɛnnɛ nī bèle, bàli bīɛlɛ pe 'puu ŋɔri ní dè nɛ́ kaala cɛ́n wè. A wi 'pe tɛ́ngɛ siɛnnɛ pe mìɛni nyùgo nɛ̄, wàa ní siɛnnɛ sirakogunɔ (1 000) kàfɔli; ŋìi ní wè siɛnnɛ dabataan (100) kàfɔli; wàa sí ní siɛnnɛ togosiin nɛ́ kpɔrigɔ kàfɔli; wàa ní siɛnnɛ kiɛ kàfɔli. 26 Kire siɛnnɛ bálì pe 'puu nɛ̂ kàyuʔu nyu gè cɛngɛ ó cɛngɛ nɛ kele cuɔnri gèle; gàli kiyè cé gbàli nɛ̀ cáanri gèleʔ, a dìi cé pe 'jaa dè, pe nɛ̂ sɛ́nì tire juu Misa mɛ́ wè. 27 A Misa 'wi cuɔ tuu tórigo wè, a wi 'koli nɛ̀ kɛ́ wi kùlo mɛ́ lè.