Yusufu 'siɛnkpolilo ŋɔ́niyɔ kɔri juu wè pe mɛ́
40
1 Kele gálì kàduʔumɛ gè, a ki pɛ́nì nyaa cɛngɛ káà, Farawɔn siɛnkpolilo pálì siin, yagbuɔkɛnminɛ kàfɔli wè nɛ́ búrukpuɔnnɔ kàfɔli ní wè, a peli 'Ezipiti kùlofɔli wi kanabiɛnnɛ kpíʔile. 2 A Farawɔn wi fungo ki 'yɛ̀ kpuʔɔ siɛnkpolilo bálì siin kúrugu bèle, yagbuɔkɛnminɛ kàfɔli wè, nɛ́ búrukpuɔnnɔ kàfɔli ní wè. 3 A wi 'pe cò nɛ̀ le kasuu nī wè, kasuu ŋáà wi 'puu kùlofɔli wélifɔlilɔ kàfɔli saʔa nī gè, tiʔɛ gíì nī Yusufu yé puu gè. 4 A kùlofɔli wélifɔlilɔ kàfɔli wi 'Yusufu nyíɛnɛ nɛ̀ kɔ̀n wi de baara peli bálì siin mɛ́ bèle. A pe 'lɛ̀lɛ láà kúɔ baa kasuu nī wè.5 Cɛngɛ káà pìlige nī, a ŋɔ́niyɔ 'tuu pe nɛ̄, Farawɔn yagbuɔkɛnminɛ kàfɔli wè nɛ́ búrukpuɔnnɔ kàfɔli ní wè, pe siin bèle baa kasuu nī wè, ŋìi ó ŋìi nɛ́ wi ŋɔ́nigɔ ki kɔri ní wè. 6 Bà Yusufu pɛ́nì pe nyaa sínbinimɛ táanni bè, a wi 'ki nyaa pe mìɛni laamɛ pi yé piɛn pe nī. 7 A wi sí siɛnkpolilo bálì siin yúgo bèle, bàli pe 'puu Farawɔn baakuɔlɔ bèle nɛ́ ní kasuu nī wè nɛ́ Yusufu ní wè, wi kàfɔli saʔa nī gè, nɛ́ pe yɛ: «Gáa nɛ̄ yeli laamɛ pi 'piɛn yeli nī pàngɛ gè mmɛ gè ?»
8 A pe 'Yusufu yɛ wè: «Ŋɔ́niyɔ yi 'tuu weli siɛnnɛ siin nɛ̄ bèle; siɛn sí wè náʔa bè yi kɔri juu wè weli mɛ́ʔ.»
A Yusufu wi sí pe yɛ: «Kulocɛliɛ mɛ́ bɛ̀ʔ ki yē lé, bè ŋɔ́niyɔ kɔri tìɛ wè lé ? Ye‑ yi juu ye tìɛ mi nɛ̄.»
9 A yagbuɔkɛnminɛ kàfɔli wi 'wi ŋɔ́nigɔ juu gè nɛ̀ tìɛ Yusufu nɛ̄ wè, nɛ́ jo: «Mi ŋɔ́nigɔ nī gè mi nyɛ́nì ɛrɛzɛn fétirige nyaa, 10 a fétirige ki 'fali nɛ̀ fìin nɛ̀ yɛ̀ nɛ̀ lèye taanri yige nɛ̀ mígele nɛ̀ fíɛn, nɛ́ fali nɛ pígele sɛngi kàtoyo kàtoyo, a ɛrɛzɛn yasɛnrɛ ti 'fali nɛ̀ nyɛ́nigɛ. 11 A mi 'ki nyaa Farawɔn yagbuɔlɔ, nàa nī nɛ̀jogo gè, ni 'puu mi kɔli nī gè, á mi nɛ ɛrɛzɛn yasɛnrɛ cògí dè nɛ ti yùbú nɛ nii nɛ̀jogo nī gè, nɛ kanʔa Farawɔn mɛ́ wè.»
12 A Yusufu sí wi yɛ: «Ŋɔ́nigɔ ki kɔri wire wī ŋàa wè: lèye taanri yè, kire yē cɛnyɛ taanri yī. 13 Náʔanɛ cɛnyɛ taanri, Farawɔn wi bé muɔ yige kasuu nī wè, bé ní muɔ baara kɛn dè muɔ mɛ́ yagbuɔkɛnminɛ wori dè, muɔ bé ní de nɛ̀jogo kanʔa gè wi mɛ́ wiri gbun bɛ̀ faʔa tíɛlɛ gè. 14 Mi sí nɛ muɔ náari, a muɔ kɛ́nì yiri á muɔ kele ke 'nyuɔ gèle, ma sɔ̀ngi ma taa nɛ́ mi ní, ma nyuɔ mi nɛ̄ ma mi wori juu dè ma tìɛ Farawɔn nɛ̄ wè, kire ga buu wi‑ mi yige kasuu ŋáà nī wè. 15 Nɛ́ ki cɛ́n, pe 'mi cò nɛ̀ kɔ́n nɛ́ mi ní Eburulo kùlo mɛ́ lè nɛ̀ pɛn nɛ́ mi ní náʔa gè; mi sì yafiɛn kpíʔile náʔa gè míɛniʔ, á pe 'mi cò nɛ̀ tɔ́n kasuu ŋáà nī wè.»
16 Bà búrukpuɔnnɔ kàfɔli wi tire lúʔu dè, á wi 'ki nyaa a Yusufu 'ŋɔ́nigɔ ki siɛnrɛ juu dè tàanra dè, a wi 'Yusufu yɛ wè: «Mi míɛni nyɛ́nì ŋɔ́nigɔ káà ŋɔ́ni, a mi 'ki nyaa daanya taanri 'puu tugoyo mi nyùgo nī gè nɛ́ yakaara ní dè. 17 Danʔa gíì ki 'puu naamɛ gè, kire ki 'puu nɛ́ búru feliye ní yè nyàa yi yé Farawɔn dɛ́ni wè, á búrukpuɔnwɔ wi 'wi kpíʔile kùlofɔli mɛ́ wè. Bà ti yé puu baa tugoro mi nyùgo nɛ̄ gè, á sínjapigele ke pɛ́nì ti jóri baa danʔa nī gè.»
18 A Yusufu sí wi yɛ: «Ŋɔ́nigɔ ki kɔri wire wī ŋàa wè: daanya taanri yè, yire yē cɛnyɛ taanri. 19 A cɛnyɛ taanri pɛ́nì kúɔ yè, Farawɔn wi bé muɔ yige kasuu nī wè bè muɔ nyùgo ceri gè, bé muɔ súu bè nɔri tiige nɛ̄ kpànʔanɛ gè. Kire tiʔɛ nī gè dìbarɛ ti bé ba muɔ céri júɔ dè bè láʔa kácere nɛ̄ dè.»
20 Bà sí ki 'kpíʔile, cɛnyɛ taanri kàduʔumɛ gè, bà Farawɔn wi siijɛngɛ ki 'nɔ̀ gè, a wi 'pùrɔrɔ kpíʔile nɛ́ wi baakuɔlɔ pe mìɛni ní. Á wi 'siɛnkpolilo siin bálì yige bèle kasuu nī wè, yagbuɔkɛnminɛ kàfɔli wè nɛ́ búrukpuɔnnɔ kàfɔli ní wè, nɛ́ pe tɛ́ngɛ wi baakuɔlɔ sunʔɔmɔ ní bè. 21 A wi 'yagbuɔkɛnminɛ kàfɔli wi baara kɛn dè wi mɛ́, wi ní de nɛ̀jogo kanʔa gè Farawɔn mɛ́ wè wiri gbun, 22 nɛ́ sí búrukpuɔnnɔ kàfɔli wire puɔ nɛ̀ tùɔn tiige nɛ̄ gè bɛ̀ Yusufu cé ki juu kɛnmɛ bíì nɛ̄ bè. 23 Kele gálì ke mìɛni kàduʔumɛ gè, yagbuɔkɛnminɛ kàfɔli wiì sɔ̀ngi nɛ̀ taa nɛ́ Yusufu ní wèʔ, bɛ̀ Yusufu wi cé ki juu wi mɛ́ kɛnmɛ bíì nɛ̄ wè, á wi 'fìʔɛ nɛ́ Yusufu ní wè péwu !