32
1 A Laban 'yɛ̀ sínbiniwuuro nī dè, nɛ̀ wi pórilo nɛ́ wi póripiile suɔn suɔn bèle gàangbuʔulo nɛ̄ gèle nɛ́ diba kpíʔile pe mɛ́, nɛ́ koli nɛ̀ kɛ́ wi tiʔɛ nī gè.2 A Yakuba wire sí yɛ̀ nɛ̀ wi koligo líɛ gè nɛ waa, a Kulocɛliɛ tundunminɔ pe sɛ́nì wi kpàli. 3 Bà Yakuba 'pe nyaa bèle, a wi 'jo: «ʔá ! Je Kulocɛliɛ kòridiʔɛ sí gī náʔa gè díɛʔ !» A wi 'fali nɛ̀ tiʔɛ ki míʔɛ le gè nɛ ki yeri Maʔanayimi (ki kɔri wire wi: kòridiɛyɛ siin).
Yakuba 'kpuʔɔrɔ tórigo Ezawu mɛ́
4 A Yakuba wi 'siɛnnɛ yɛ̀gɛ nɛ̀ tórigo wìi yiʔɛ mɛ́ gè baa wi luɔ Ezawu kúrugu wè, Edɔmi tɛ́nimɛ nī bè, Seyiiri kùlo mɛ́ lè. 5 A wi tunduro dáà juu dè pe mɛ́ nɛ́ jo: «A yeli sɛ́nì nɔ̀ baa wè, ye‑ mi kàfɔli Ezawu yɛ wè, dí ‹Muɔ baakuɔwɔ Yakuba wi 'jo: Mi yé kɛ́ Laban tiʔɛ nī gè nɛ̀ sɛ́nì mɔgɔ baa fúɔ nɛ̀ pɛ́nì nɔ̀ lɛ̀lɛ náà nī lè, 6 a mi 'nìɛyɛ taa, nɛ́ sèfɛngɛlɛ ní, nɛ́ sìnbaara ní, nɛ́ síkaala, nɛ̀ fàri baakuɔlɔ nɛ̄, nàguɔlɔ nɛ́ cɛlilɛ. A mi sí jo m'bé tundunminɔ tun pe‑ sa ki juu mi kàfɔli Ezawu mɛ́ wè, kire ga buu mi‑ kpuʔɔrɔ taa wi yiʔɛ mɛ́.› »
7 A tundunminɔ pe 'koli nɛ̀ pɛ́nì ki juu Yakuba mɛ́ wè nɛ́ jo: «Weli sɛ́nì muɔ luɔ Ezawu kpàli wè, nɛ̀ wi nyaa wi 'báan muɔ kúrugu nɛ́ siɛnnɛ sirasiin (400) ní.»
8 A fíɛrɛ 'Yakuba cò wè kpuʔɔ. A wi 'wi siɛnnɛ wáligi bèle gbuʔulo siin, nɛ́ yajuuro wàli dè gbuʔulo siin: síkaala nɛ́ sìnbaara ní dè, gboli nigbe; nìɛyɛ nɛ́ nyuʔɔmɔnɔ ní bèle, gboli láà nigbe. 9 Nɛ́ ki cɛ́n wi yé ki sɔ̀ngi nɛ́ jo: a Ezawu pɛ́nì gboli láà kpúu lè, gboli siinwoli lè ni bé suɔ.
10 A Yakuba wi sí Kulocɛliɛ náari wè, nɛ́ jo: «Cáa ! Kulocɛliɛ, muɔ ŋáà wī mi tuuliʔɛ Birayima Kulocɛliɛ wè, nɛ́ mi tuu Siaga Kulocɛliɛ wè, cáa ! Yewe, muɔ ŋáà ma 'ki juu mi mɛ́ nɛ́ jo: ‹Koli mari waa muɔ kùlo mɛ́ lè, muɔ wuulo tiʔɛ nī gè, dí mi bé kacɛ̀ngɛ kpíʔile muɔ nɛ̄ wè,› 11 mi nyɛ́nì cɛ́ri nɛ̀ tóri muɔ bànguɔ dɛ́nigɛ kele nɛ́ muɔ kányiʔɛ kaala ní lè, gàli muɔ nɛ kpínʔini mi mɛ́ gèle, mi ŋáà wī muɔ baakuɔwɔ wè. Mi kàgbiile lire ni 'puu mi mɛ́ lɛ̀lɛ líì nī mi Zurudɛn cáʔa jeli gè. Pàngɛ gè, mi n'ŋɛ, mi siɛnmɛ pi 'niʔɛ nɛ̀ kò gbuʔulo siin.
12 «‑Mi suɔ mi luɔ Ezawu mɛ́ wè, nɛ́ ki cɛ́n mi nɛ fìʔɛ́ wi fǎga ba mi kpúuʔ, nɛ́ mi pìile ní bèle nɛ́ pe yàala ní bèle, wi fǎga wàa nigbe yaʔaʔ. 13 Nɛ̀ ki yaʔa muɔ sí yé ki juu nɛ́ jo dí muɔ bé kacɛ̀ngɛ kpíʔile mi nɛ̄, bè mi siimɛ niʔɛ bè bɛ̀ kuʔɔjii gògoyo dàrimiʔɛ tíɛlɛ gè, gàa gī siɛn sǐ gbɛ̀ tɔ́ri gèʔ, bɛ̀ ki 'niʔɛ gè.»
14 A Yakuba 'súɔn baa kire tiʔɛ nī gè ki pìlige nī gè. Bà kpìɛnmɛ pi 'tuu bè, a wi 'wi yɛrɛ táà líɛ nɛ̀ kɛ́ bè sa kpuʔɔrɔ kpíʔile Ezawu mɛ́ wè: 15 síkacɛlilɛ sirakeli (200) nɛ́ síkapɛngɛlɛ togo, nɛ́ sìnbacɛlilɛ sirakeli (200) nɛ́ sìnbapɔlilɔ togo, 16 nɛ́ nyuʔɔmɔnɔ togo nɛ́ kpɔrigɔ nɛ́ pe pìile ní bèle bàli pe 'puu nɛ ŋɔri nɛ tíin pe nɔminɔ mɛ́ bèle, nɛ́ nɛ̀nɔminɔ togosiin nɛ́ nɛ̀piʔɛlɛ kiɛ, nɛ̀ fàri sèfɛnjɛlilɛ togo nɛ́ sèfɛnbɔlilɔ kiɛ ní.
17 A wi 'ti mìɛni tíla tíla nɛ́ ti kɛn wi baakuɔlɔ mɛ́ bèle, nɛ̀ yɛli nɛ́ ti gbuʔulo kɛnmɛ ní bè, nɛ́ pe yɛ: «Ye‑ kíni mi yiʔɛ mɛ́ gè, yé lariyɛ yaʔa gbuʔulo ke sunʔɔmɔ ní bè.»
18 A wi 'ki juu nɛ̀ gbɛ̀ngɛ wi baakuɔwɔ mɛ́ wè, ŋàa wi 'puu pe yiʔɛ mɛ́ gè, nɛ́ jo: «A mi luɔ Ezawu wi sɛ́nì kpàli nɛ́ muɔ ní wè, nɛ́ muɔ yúgo, ‹Ŋáa wuu wī muɔ wè ? Sé muɔ nɛ waa ? Ŋáasiɛn wori dī yajuuro dáà ti 'waa muɔ yiʔɛ mɛ́ gè ?›, 19 ma wi yɛ: ‹Mi kàfɔli Ezawu yo, Yakuba wori dī. Wi 'jo mi‑ ba kpuʔɔrɔ kpíʔile muɔ mɛ́ nɛ́ yajuuro dáà ní dè. Wire tíimɛ yē nɛ báan baa kàduʔu mɛ́ gè.› »
20 A wi 'siɛnnuro juu dè nɛ̀ gbɛ̀ngɛ wi baakuɔlɔ pe mìɛni mɛ́, siinwuu wè, nɛ́ taanriwuu ní wè, nɛ́ bìli mìɛni pe nyɛ́ni tári yajuuro kúrugu dè, nɛ́ pe yɛ: «A yeli sɛ́nì Ezawu nyaa wè, ye mìɛni yeri siɛnnuro tire nyu wi mɛ́. 21 Ye‑ ti juu wi mɛ́ míɛni, ye‑ jo: ‹Muɔ baakuɔwɔ Yakuba wè, wiī nɛ báan baa kàduʔu mɛ́ gè.› »
Yakuba wi yé ki sɔ̀ngi nɛ́ jo, wire bé gbɛ̀ Ezawu fungo nyígi gè a wire 'kire kpíʔile mmɛ gè, nɛ́ kpuʔɔrɔ dáà tórigo dè wire yiʔɛ mɛ́ gè. Kire kàduʔumɛ gè, a wire sɛ́nì wi nyaa wè, wi bé wire kpàli nɛ́ fundaanra ní.
22 Bà ki 'kpíʔile, a Yakuba 'kpuʔɔrɔ tórigo dè a ti 'kɛ́ wi yiʔɛ mɛ́ gè, kpuʔɔrɔ dáà wi yé kɛn dè. Kire pìlige nī gè, a Yakuba wire 'súɔn baa wi kòridiʔɛ nī gè.
23 Kire pìlinugo nī gè, a wi 'yɛ̀ nɛ̀ wi cɛlilɛ siin líɛ bèle, nɛ́ wi sùkulocɛlilɛ siin ní bèle, nɛ̀ fàri wi pìile kiɛ nɛ́ nigbe nɛ̄ bèle, nɛ̀ Yabɔki lakolibile jeli lè. 24 A wi 'pe líɛ nɛ̀ lakolibile jeli lè, nɛ̀ wi yɛrɛ ti mìɛni pínɛ nɛ̀ jeli nɛ́ pe ní.
Yakuba 'cáan nɛ́ Kulocɛliɛ ní
25 Bà Yakuba 'kò wi nigbe wè, a siɛn wáà pɛ́nì cáan nɛ́ wi ní fúɔ nɛ̀ pɛ́nì kpìɛnmɛ tuu bè. 26 Bà siɛn wi kɛ́nì ki nyaa wire sǐ jáa Yakuba nɛ̄ wèʔ, a wi 'Yakuba kpúɔn cenyugo nɛ̄ gè nɛ̀ ki 'fùgu, á pe ní cáanra nɛ̄ dè. 27 A nàguɔ wi kɛ́nì jo: «‑Mi yaʔa mi‑ kɛ́, nɛ́ ki cɛ́n kpìɛnmɛ pi 'tuu wī.»
A Yakuba sí wi yɛ: «Miǐ ga tíi muɔ yaʔa muɔ kɛ́ʔ, ka laa muɔ sì diba taʔa wè mi nɛ̄ʔ !»
28 A nàguɔ wi sí Yakuba yúgo wè: «Pe 'muɔ ye gáa ?»
A Yakuba wi 'jo: «Pe 'mi ye Yakuba.»
29 A nàguɔ wi sí ń'nɛ̀ jo: «Piyě ní de muɔ yeri Yakuba cíginiʔ; muɔ míʔɛ ki bé yiʔɛ bè kò Isirayɛlia, nɛ́ ki cɛ́n muɔ nyɛ́nì cáan nɛ́ Kulocɛliɛ ní, nɛ́ siɛnnɛ ní bèle, a muɔ 'fànʔa taa.»
30 A Yakuba wi 'nàguɔ yúgo wè: «A muɔ míʔɛ gè do ?»
A nàguɔ wi 'jo: «Gáa nɛ̄ muɔ kpáan nɛ̀ mi míʔɛ yúgo gè ?» Nɛ́ fali nɛ̀ diba taʔa wè Yakuba nɛ̄.
31 A Yakuba 'tiʔɛ gáà ki míʔɛ le gè nɛ ki ye Peniyɛli (ki kɔri wire wī: Kulocɛliɛ yiʔɛ), gìi wi 'puu nɛ caa bè juu wè, «Mi nɛ́ Kulocɛliɛ we 'yiɛyɛ le yè wìye nī, a mi 'kò sìi nɛ̄.» 32 Bà cɛngɛnyɛni ni 'puu nɛ foligi lè, a Yakuba míɛni nɛ yigi Peniyɛli nī wè, nɛ̀ ki yaʔa Yakuba 'puu nɛ tári nɛ̀ siʔi cenyugo nɛ̄ gè. 33 Kire kɛnmɛ nɛ̄ a Isirayɛli siɛnnɛ pe 'yajuʔu kpúu gè, pe nɛ̌ fɔ̀li bé ki cenyugo kaara káa dèʔ, nɛ́ ki cɛ́n cáanra lɛ̀lɛ nī lè, Kulocɛliɛ cé Yakuba luɔ cenyugo nɛ̄ gè.