Yewe wi 'jaafɔli sii wori juu dè Sara mɛ́ wè
18
1 Bà tire 'tóri dè, a Yewe 'wìi tìɛ Birayima nɛ̄ tiikpoliyo tiɛliʔɛ táanni gàa gī Mambire wuʔu gè. Birayima 'puu tɛ́niwɛ cɛnvunyiɛnɛ nɛ̄ kélikeli, wi fɛ̀ni saʔa wìile yiʔɛ mɛ́ gè, 2 a wi 'yiʔɛ yɛ̀gɛ gè nɛ siɛnnɛ taanria nyaa yérile wi yiʔɛ mɛ́. Bà wi 'pe nyaa bèle a wi 'fali nɛ̀ fɛ̀ nɛ̀ láʔa wìile táanni lè nɛ̀ sɛ́nì pe kpàli nɛ́ tuu nɛ̀ cúbulo bè pe gbùʔɔrɔ. 3 A wi 'ki juu wàa nigbe mɛ́ nɛ́ jo: «Mi kàfɔli, a ki yē mi 'kpuʔɔrɔ taa muɔ mɛ́, ma fǎga tóri mi tiʔɛ táanni gè, mi ŋáà wī muɔ baakuɔwɔ wè. 4 Ye‑ ki yaʔa m'bé tí pe‑ luʔɔ kɛn yeli mɛ́ ye‑ tɔliyɔ jíge yèb, yé ŋɔ́ ye taa tiige láara gè. 5 Bɛ̀ yeli nɛ tóri mi tiʔɛ táanni gè, mi ŋáà wī yeli baakuɔwɔ wè, ye‑ ki yaʔa mi‑ pɛn nɛ́ yaliire táà cɛ̀ri míɛni ní, ye‑ pa lìi yé sí ŋɔri taa béri waa yeli koligo nī gè.»A pe 'jo: «Sa ki kpíʔile, gàa muɔ 'juu gè.»
6 A Birayima 'fìɛlɛ nɛ̀ kɛ́ fáari fɛ̀ni saʔa mɛ́ gè, a wi sɛ́nì ki juu wi cuɔ Sara mɛ́ wè nɛ́ jo: «Te waa maa míivɔnmɔ gbɔngbonyiɛyɛ taanri kíri fáari, ma pi píri, ma ki káli ŋɔ̀mi.» 7 A Birayima 'fɛ̀ nɛ̀ kɛ́ nɛ̀ sɛ́nì wi nɛ̀duʔu nɛ̀piɛyɛlilɛ láà cò nàa nī sùnmɔ ní bè, nɛ̀ pɛ́nì kɛn wi baakuɔwɔ nàgapunwɔ wáà mɛ́ a wire 'fìʔɛlɛ nɛ̀ wi kpúu a pe 'suʔɔ. 8 A Birayima wi 'nɛ̀yirimɛ líɛ bàa pi 'tanʔana bè, nɛ́ nɛ̀yirimɛ páà ní bàa piì tanʔana bèʔ, nɛ́ nɛ̀piɛyɛlilɛ kaara ní dè dàa pe 'suʔɔ dè, nɛ̀ ti kɛn nabɔnminɔ mɛ́ bèle, nɛ́ yéri pe táanni tiige láara gè á pe nɛ líi.
9 A pe 'wi yúgo, «Sé muɔ cuɔ Sara wi yē ?»
A wi 'jo, «Wiī baa fɛ̀ni saʔa nī gè.»
10 A pe wàa nigbe kɛ́nì jo: «Kányiʔɛ nɛ̄, yiɛlɛ láà bìinɛ ŋáà nī wè, m'bé ní koli bɛn muɔ mɛ́; wéli, muɔ cuɔ Sara wi bé jaafɔli taa.»
Sara wire sí puu fɛ̀ni saʔa wìile táanni lè wi kàduʔu mɛ́ gè níɛ lúru. 11 Nɛ̀ ki yaʔa Birayima wire nɛ́ Sara ní wè, pe yé tɔ̀ni nɛ̀ liɛ; Sara wiì puu nɛ yege nyaʔa gè cíginiʔ. 12 A Sara 'tíʔɛ wi fungo nī gè nɛ́ jo: «Mi ŋáà mi 'liɛ nɛ̀ kúɔ mmɛ gè o, m'bé ní gbɛ̀ laala taa lé ? Mi saʔafɔli wi sí liɛ nɛ̀ kúɔ.»
13 A Yewe 'ki juu Birayima mɛ́ nɛ́ jo: «Gáa nɛ̄ Sara wi 'mi siɛnrɛ tíʔɛ dè, dàa mi 'juu dè ? Gáa nɛ̄ wiī nɛ káala nɛ́ jo wire bé ní gbɛ̀ pùɔ taa lé bà wire liɛ nɛ̀ kúɔ wè ? 14 Yakaa yē baa lé gàa ki 'Yewe jáa wè ? Yiɛlɛ láà bìinɛ ŋáà nī wè, m'bé ní koli bɛn muɔ mɛ́; Sara wi bé jaafɔli taa.»
15 A Sara wi 'fíɛ, a wi 'finɛ nɛ́ jo: «Mi sì tíʔɛʔ.»
A Yewe 'jo: «ʔúnʔun, muɔ nyɛ́nì tíʔɛ wī.»
Birayima wi 'Yewe náari wi fǎga Sodɔmi kàʔa cúʔɔ gèʔ
16 A nabɔnminɔ pe 'yɛ̀ nɛ waa, a Birayima 'pe tórigo, a pe sɛ́nì yéri nɛ̀ wéli baa táanmɛ gè, Sodɔmi kàʔa kɔli mɛ́ gè.
17 A Yewe sí ki sɔ̀ngi nɛ́ jo: «Mi 'yɛli lé bè ki làrigɛ Birayima nɛ̄ gàa mi je kpíʔile gè ? 18 Nɛ́ ki cɛ́n Birayima siimɛ pi bé ba kò kùpolo láà, nàa ni bé puu nɛ́ fànʔa ní gè. Duniya siɛnfeliye yi mìɛni béri diba kpínʔini wè bìli mɛ́ bèle wire kɛnmɛ nɛ̄. 19 Nɛ́ ki cɛ́n wire mi nyɛ́nì nyíɛnɛ nɛ̀ kɔ̀n, wi de wi pìile nɛ́ wi kpáa wuulo kàrigí bèle bàli pe báan wi kàduʔumɛ gè, pe‑ taʔa Yewe koligo nɛ̄ gè bèri kasingele kpínʔini béri siɛnnɛ kele sɔ́migi gèle de cuɔnri, kire ga buu nyasiɛnrɛ dáà mi Yewe 'juu Birayima mɛ́ wè mi‑ ti kpíʔile bè fori.»
20 A Yewe 'jo: «Mi nyɛ́nì dìgire yékpuʔulo lúʔu gèle gàli pe 'wáari Sodɔmi nɛ́ Gomɔri kàaya nī yè, nɛ́ ki cɛ́n pe kapiʔile ke nyɛ́nì niʔɛ nɛ̀ lúbugo nɛ̀ tóri. 21 M'bé tìgi bè ki wéli a ki yē kányiʔɛ gī gàa pe kɔnwaara ti 'nyu dè; á kire bɛ̀ʔ gè, m'bé ki cɛ́n.»
22 A nàguɔlɔ bílì siin pe 'yiʔɛ nɛ waa Sodɔmi kɔli mɛ́ gè, á Yewe 'yéri bile Birayima táanni. 23 A Birayima 'sìʔɛrɛ nɛ̀ kpɔni Yewe nɛ̄ wè nɛ́ jo: «Miì tɛ́ngɛ ki nɛ̄ʔ muɔ‑ fɔ̀li bè siɛnsinminɛ kpúu bèle nɛ́ siɛnpiile ní bèle ! 24 A ki 'nyaa siɛnnɛ togosiin nɛ́ kpɔrigɔ bé nyaa baa kàʔa nī gè siɛnsinminɛ bèle o, muɔ bé pe mìɛni pínɛ bè kpúu lé ? Muɔ̌ fɔ̀li bè ki yaʔa léʔ kàʔa nɛ̄ gè siɛnsinminɛ togosiin nɛ́ kpɔrigɔ bàli peli kɛnmɛ nɛ̄ lé ? 25 Kiǐ gbɛ̀ kpíʔileʔ, muɔ‑ siɛnsinwɛ kpúu wè nɛ́ siɛnpiiwe ní wè, muɔ‑ pe mìɛni cò sìnjaa mmɛ gè ! Duniya wi mìɛni kàyuʔujuufɔli wiǐ fɔ̀li léʔ bè siɛnnɛ kàyuʔu juu gè bè sín ?»
26 A Yewe 'jo: «A mi 'siɛnsinminɛ togosiin nɛ́ kpɔrigɔ nyaa baa Sodɔmi kàʔa nī gè, m'bé kàʔa ki mìɛni yaʔa peli kɛnmɛ nɛ̄.»
27 A Birayima ń'nɛ̀ jo: «Mi ŋáà wī tárigɛ gè o nɛ̀ ní cúnʔɔ gè o, bɛ̀ mi 'fɔ̀li nɛ̀ nìɛ lìri nɛ́ sìʔɛrɛ nɛ̀ kpɔni mi Kàfɔli nɛ̄ wè o, níɛ náari wi mɛ́ wè o, 28 dùʔɔ ki bé sa nyaa siɛnsinminɛ togosiin nɛ́ kpɔrigɔ sǐ sa taa baa kàʔa nī gèʔ. A ki sí nyaa kogunɔ nyɛ́nì fɔ̀n baa pe nī wè o, muɔ bé fɔ̀li lé bè kàʔa ki mìɛni cúʔɔ nɛ́ ki cɛ́n siɛnsinminɛ kogunɔ nyɛ́nì fɔ̀n baa pe nī ?»
A wi 'jo: «Mi sǐ fɔ̀li bé kàʔa ki mìɛni cúʔɔʔ a ki 'nyaa siɛnsinminɛ togosiin nɛ́ kogunɔ yákuɔ bé taa baa wè.»
29 A Birayima ń'nɛ̀ juu nɛ́ wi ní nɛ́ jo: «Dùʔɔ ki bé sí nyaa siɛnsinminɛ togosiin bé taa baa ?»
A Yewe 'jo: «Mi sǐ ki kpíʔileʔ a siɛnsinminɛ togosiin 'taa baa wè.»
30 A Birayima ń'nɛ̀ jo: «Mi nɛ muɔ fiɛn wī, mi Kàfɔli, fǎga muɔ fungo yɛ̀gɛ gè mi kúruguʔ, ‑ki yaʔa mi ní juu nɛ́ muɔ ní: a ki yē siɛnsinminɛ togo nɛ́ kpɔrigɔ bé taa baa wè do ?»
A wi 'jo: «Mi sǐ ki kpíʔileʔ a siɛnsinminɛ togo nɛ́ kpɔrigɔ 'taa baa wè.»
31 A Birayima ń'nɛ̀ jo: «Bɛ̀ mi 'fɔ̀li nɛ̀ nìɛ lìri nɛ́ sìʔɛrɛ nɛ̀ kpɔni mi Kàfɔli nɛ̄ wè níɛ náari wi mɛ́ wè, a ki sí nyaa majo siɛnsinminɛ togo bīɛlɛ baa wè do ?»
A Yewe 'jo: «Miǐ ga tíi ki cúʔɔʔ, siɛnsinminɛ togo peli kɛnmɛ nɛ̄.»
32 A Birayima 'jo: «Mi nɛ muɔ fiɛn wī, mi kàfɔli, fǎga muɔ fungo yɛ̀gɛ gè mi kúruguʔ, ‑ki yaʔa mi ní náarizɛngɛ kpíʔile gè muɔ mɛ́: a ki yē siɛnsinminɛ kiɛ bé taa baa wè do ?»
A wi 'jo: «Miǐ ga tíi ki cúʔɔʔ, siɛnsinminɛ kiɛ peli kɛnmɛ nɛ̄.»
33 Bà Yewe 'juu nɛ̀ kúɔ nɛ́ Birayima ní wè, a Yewe 'yɛ̀ nɛ̀ kɛ́. A Birayima 'koli nɛ̀ pɛn wi kpáa mɛ́ gè.