Yewe 'duniya siɛnnɛ cɛrigɛ bèle
11
1 Ki 'nyaa duniya siɛnnɛ pe mìɛni 'puu nɛ siɛnrɛ táà nyu; siɛnnuro dáà pe mìɛni 'puu nɛ lúru dè. 2 Bɛ̀ ki 'nyaa pe 'puu nɛ tári nɛ mári cɛngɛnyɛnifoligɔli mɛ́ gè, a pe sɛ́nì kpàanjali wáà nyaa Sinɛyari kùlo nī lè a pe 'tɛ́ni baa.3 A pe 'juu nɛ́ pìye ní, nɛ́ jo: «Yeri báan we‑ jìfaa kpúɔn, we‑ wi fúɔ wi lìri.»
A jìfaa wi sí kò pe mɛ́ kàdari, a gidurɔ kùro tire 'kò pe mɛ́ puuro pe jìfaa wi sɔriyɔ nī yèa. 4 A pe ń'nɛ̀ jo: «Yeri báan, we‑ kàʔa káà faan nɛ́ saakpaʔaligɛ ní, gàa ki bé kpàʔala fúɔ bè sa nɔ̀ nyìʔɛnɛ nɛ̄ lè. Ye‑ tí we‑ weli míʔɛ kpúʔɔ gè, a kire 'laa, weli bága cɛrigɛ duniya tiɛyɛ yi mìɛni nī.»
5 A Yewe sí fali nɛ̀ tìgi nɛ̀ pɛ́nì kàʔa wéli gè nɛ́ saakpaʔaligɛ ní gè, gàa siɛnpiile pe 'puu nɛ faanri gè. 6 A Yewe sí ki juu nɛ́ jo: «Bɛ̀ pe mìɛni yē siɛnnuminɔ níɛ siɛnnuro nyu dè, ki n'gɛ gàa pe séli nɛ kpínʔini gè. A ki 'kò mmɛ gè, yɛgɛ ó yɛgɛ pe 'sɔ̀ngi bè kpíʔile gè, kiǐ pe jáaʔ. 7 Yeri báan, we‑ tìgi we pe siɛnrɛ nyaʔami dè tìi nī, kire ga buu pe fǎga ní de pìye siɛnrɛ lúru dèʔ.»
8 A Yewe 'fali nɛ̀ pe mìɛni cɛrigɛ duniya tiɛyɛ yi mìɛni nī, a kàʔa ki faanna ni mìɛni 'yéri bile. 9 Kire nɛ̄ a pe 'kò nɛ kàʔa ki míʔɛ yeri gè Babɛli, nɛ́ ki cɛ́n kire tiʔɛ nī Yewe nyɛ́nì duniya siɛnnɛ pe mìɛni siɛnrɛ nyaʔami dè tìi nīb, nɛ́ ki cɛ́n kire tiʔɛ kire nī Yewe 'siɛnnɛ pe mìɛni cɛrigɛ duniya tiɛyɛ yi mìɛni nī.
Sɛmi pìile tùlugo siɛnrɛ dè
10 Sɛmi tùlugo siɛnrɛ dī dàa dè:
Kàsakpiile tuulo kàduʔumɛ gè, a yiʔɛlɛ siin ga tóri, a Sɛmi ga yiʔɛlɛ dabataan (100) taa wè, a wi 'Aripakisadi sii. 11 Aripakisadi siile kàduʔumɛ gè, a Sɛmi wi ń'nɛ yiʔɛlɛ sirasiin dabataan (500) taa, nɛ́ nɛ́ nàgabigele nɛ́ pìcapigele sii.
12 A Aripakisadi ga yiʔɛlɛ togo nɛ́ kpɔrigɔ nɛ́ kogunɔ taa wè, a wi 'Sela sii. 13 Sela siile kàduʔumɛ gè, a Aripakisadi wi ń'nɛ yiʔɛlɛ sirasiin nɛ́ taanri (403) taa, nɛ́ nɛ́ nàgabigele nɛ́ pìcapigele sii.
14 A Sela ga yiʔɛlɛ togo nɛ́ kpɔrigɔ taa wè, a wi 'Ebɛri sii. 15 Ebɛri siile kàduʔumɛ gè, a Sela wi ń'nɛ yiʔɛlɛ sirasiin nɛ́ taanri (403) taa, nɛ́ nɛ́ nàgabigele nɛ́ pìcapigele sii.
16 A Ebɛri ga yiʔɛlɛ togo nɛ́ kpɔrigɔ nɛ́ sicɛri taa wè, a wi 'Pelɛgi sii. 17 Pelɛgi siile kàduʔumɛ gè, a Ebɛri wi ń'nɛ yiʔɛlɛ sirasiin togo nɛ́ kpɔrigɔ (430) taa, nɛ́ nɛ́ nàgabigele nɛ́ pìcapigele sii.
18 A Pelɛgi ga yiʔɛlɛ togo nɛ́ kpɔrigɔ taa wè, a wi 'Erewu sii. 19 Erewu siile kàduʔumɛ gè, a Pelɛgi wi ń'nɛ yiʔɛlɛ sirakeli nɛ́ kacɛri (209) taa, nɛ́ nɛ́ nàgabigele nɛ́ pìcapigele sii.
20 A Erewu ga yiʔɛlɛ togo nɛ́ kpɔrigɔ nɛ́ siin taa wè, a wi 'Serugu sii. 21 Serugu siile kàduʔumɛ gè, a Erewu wi ń'nɛ yiʔɛlɛ sirakeli nɛ́ kɔlisiin (207) taa, nɛ́ nɛ́ nàgabigele nɛ́ pìcapigele sii.
22 A Serugu ga yiʔɛlɛ togo nɛ́ kpɔrigɔ taa wè, a wi 'Nakɔri sii. 23 Nakɔri siile kàduʔumɛ gè, a Serugu wi ń'nɛ yiʔɛlɛ sirakeli (200) taa, nɛ́ nɛ́ nàgabigele nɛ́ pìcapigele sii.
24 A Nakɔri ga yiʔɛlɛ togo nɛ́ kacɛri taa wè, a wi 'Tera sii. 25 Tera siile kàduʔumɛ gè, a Nakɔri wi ń'nɛ yiʔɛlɛ dabataan nɛ́ kpɔrigɔ nɛ́ kacɛri (119) taa, nɛ́ nɛ́ nàgabigele nɛ́ pìcapigele sii.
26 A Tera ga yiʔɛlɛ togotaanri nɛ́ kpɔrigɔ taa wè, a wi 'Birama, nɛ́ Nakɔri, nɛ́ Aran sii.
BIRAYIMA SIƐNRƐ DI
(11.27–25.18)
Tera pìile siɛnrɛ dī dàa dè
27 Tera pìile siɛnrɛ dī dàa dè: a Tera 'Birama, nɛ́ Nakɔri, nɛ́ Aran sii. A Aran 'Lɔti sii, 28 a Aran sí kɛ́nì kùu wi tuu Tera nyɛni nɛ̄, kàʔa gáà nī pe 'wi sii gè, pe tobilo kàʔa nī gè. Ki míʔɛ kire ki 'puu Uri, Kalideyé kùlo nī lè. 29 A Birama nɛ́ Nakɔri pe 'cɛlilɛ líɛ. Birama cuɔ wi míʔɛ kire ki 'puu Sarayi. Pórifɔlilɔ siin pe 'puu Aran mɛ́. Pe 'puu nɛ wàa yeri Milika níɛ ŋìi yeri wè Yisika. A Nakɔri 'Milika líɛ wi cuɔ. 30 Nɛ̀ ki yaʔa Sarayi wè, Birama cuɔ wè, wi yé puu sìndigicuɔ; pùɔ sì puu wi mɛ́ʔ.
31 A Tera 'wi jaa kɔ́ri wè, Birama wè, nɛ́ wi pínɛnyɛninɛ ní bèle; nɛ́ Lɔti ní, Aran jaa wè; nɛ́ Sarayi, Birama cuɔ wè. A pe 'pínɛ nɛ̀ yiri Uri kàʔa nī gè, Kalideyé tɛ́nimɛ nī bè, nɛ̀ kɛ́ Kanaa kùlo kɔli mɛ́ gè. A pe 'kɛ́ fúɔ nɛ̀ sɛ́nì nɔ̀ Karan kàʔa nɛ̄ gè a pe 'tɛ́ni baa kire tiʔɛ nī gè. 32 Tera yiʔɛlɛ ke 'puu yiʔɛlɛ sirakeli nɛ́ kogunɔ, a Tera wi 'kùu Karan kàʔa nī gè.