Nɔwe nɛ́ wi siɛnnɛ pe 'yiri kɔ́rikpuʔɔ nī gè
8
1 A Kulocɛliɛ 'sɔ̀ngi nɛ̀ taa Nɔwe kaala nɛ̄ lè, nɛ́ yawiire ti mìɛni nɛ́ yajuuro ní dè dàa ti 'puu nɛ́ Nɔwe ní wè kɔ́rikpuʔɔ nī gè. A Kulocɛliɛ 'káfaligɛ káà yɛ̀gɛ ki‑ luʔɔ fii gè a luʔɔ ki 'koli nɛ tíri. 2 A lakpuʔɔ sícuugo lawiʔile nɛ́ nyìʔɛnɛ kàliile ke mìɛni 'tɔ́n, a kàsaala ni 'ceri. 3 Á luʔɔ ki 'koli nɛ tíri nɛ waa ki kòridiɛyɛ mɛ́ yè. Cɛnyɛ tekɔlisiin nɛ́ kpɔrigɔ (150) kúɔmɔ mɛ́ bè, a luʔɔ ki 'tìgi nɛ̀ yɛli. 4 Yeye kɔlisiinwuʔu nɛ̄ gè, cɛnyɛ kiɛ nɛ́ kɔlisiinwuʔu nɛ̄ gè, a kɔ́rikpuʔɔ ki sɛ́nì tɛ́ni Arara kùlo nyagurugo káà nɛ̄. 5 Á luʔɔ ní gè nɛ tíri nɛ waa súuri fúɔ nɛ̀ sɛ́nì nɔ̀ yeye kiɛwuʔu nɛ̄ gè, kire yege ki cɛnbelige nɛ̄ gè, a nyaguruyo yi mijuʔulo ke 'yiri.6 Bà cɛnyɛ togosiin 'tóri yè, a Nɔwe 'kɔ́rikpuʔɔ kàlii múgu wè, ŋàa wi yé kpíʔile wè, 7 nɛ́ dìbawuɔlɔ láà yige a lire sɛ́ni fini nɛ mári fúɔ nɛ̀ taa a luʔɔ ki pɛ́nì lìri nɛ̀ kúɔ dàala nɛ̄ lè. 8 A wi ń'nɛ̀ gòtolo láà yige bè ki wéli a ki yē luʔɔ ki nyɛ́nì tìgi nɛ̀ kúɔ dàala nɛ̄ lè. 9 A ki sɛ́nì nyaa gòtolo niì tɔligɔ tɛ́ngɛdiʔɛ taaʔ, nɛ́ ki cɛ́n luʔɔ ki 'puu nɛ tíin dàala nɛ̄ lè, a ni 'koli nɛ̀ pɛn Nɔwe kúrugu baa kɔ́rikpuʔɔ nī gè. A Nɔwe 'kɔli yige gè nɛ́ ni cò nɛ̀ nyɔ́gɔ kɔ́rikpuʔɔ nī gè. 10 A Nɔwe 'cɛnyɛ kɔlisiin sige cígini nɛ́ ń'nɛ̀ koli nɛ̀ ni yige kɔ́rikpuʔɔ nī gè. 11 Cɛnguʔɔ kɔli mɛ́ gè, a gòtolo ni sí koli nɛ̀ pɛn nɛ́ wolivia tiige wabunyɔ yáà ní. A Nɔwe 'fali nɛ̀ ki cɛ́n luʔɔ ki nyɛ́nì tìgi nɛ̀ líili dàala nɛ̄ lè. 12 A wi ń'nɛ̀ cɛnyɛ kɔlisiin yáà sige nɛ́ ń'nɛ̀ gòtolo yige lè; gòtolo niì ń'nɛ̀ koli nɛ̀ pɛn wi mɛ́ cíginiʔ.
13 Nɔwe sìi yiʔɛlɛ ke sirataanri nɛ́ nigbe nɛ̄ wè, ki cɛnbelige gè, a luʔɔ ki 'tìgi nɛ̀ kò fàrigɛ dàala nɛ̄ lè. A Nɔwe 'kɔ́rikpuʔɔ ki yatɔngɔ múgu gè nɛ́ wéli nɛ̀ màʔa, nɛ́ sí ki mìɛni nyaa fàrigɛ púrɔ. 14 Yeziinwuʔu ki cɛnyɛ togo nɛ́ kɔlisiinwuʔu nɛ̄ gè, a dàala ni 'waʔa péwu !
15 A Kulocɛliɛ sí fali nɛ̀ juu Nɔwe ní nɛ́ jo: 16 «Yiri kɔ́rikpuʔɔ nī gè, muɔ wè, nɛ́ muɔ cuɔ ní wè, nɛ́ muɔ jaala ní bèle, nɛ́ muɔ jaala cɛlilɛ ní bèle. 17 Yawiire dáà ti mìɛni felide dī nɛ́ muɔ ní wè, ma ti mìɛni yige nɛ́ muɔ ní, kire 'jo yafinide dè, nɛ́ yafulolido ní dè dàa ti fulolo dàala nɛ̄ lè, nɛ́ yajuuro ní dè. Ti de sii bè niʔɛ dàala nɛ̄ lè.»
18 A Nɔwe 'yiri kɔ́rikpuʔɔ nī gè, wire nɛ́ wi cuɔ ní wè, nɛ́ wi jaala ní bèle, nɛ́ wi jaala pe cɛlilɛ ní bèle; 19 a nyàʔayɛrɛ ti mìɛni 'yiri, nɛ́ yafulolido ní dè nɛ́ yafinide ní dè nɛ́ yawiire dáà ti nyaari dàala nɛ̄ lè, ti mìɛni nɛ̀ yɛli nɛ́ ti felide ní dè.
20 A Nɔwe 'fali nɛ̀ Yewe gbùʔɔrɔdiʔɛb káà faan, nɛ́ yajuuro dáà dī cìilide dè, nɛ́ yafinide dáà dī cìilide dè, a wi 'tire táà cò nɛ̀ sɛ́nì ti kɔ̀n kakuɔrɔ kaasuʔuroc, gbùʔɔrɔdiʔɛ nɛ̄ gè.
21 A Yewe 'ti nùdaanna suɔ lè a wi fungo ki 'nyígi, a wi 'ki kɔ̀rirɔ nɛ̀ ki yɛ̀gɛ wi fungo nī gè nɛ́ jo: «Mi sì ní ga tíi dàala cúʔɔ lè siɛn kɛnmɛ nɛ̄ʔ, nɛ́ ki cɛ́n siɛn wi funzɔngirɔ tiī sìpiire nɛ̀ líɛ wi pìimɛ lɛ̀lɛ nī lè. Mi sì ní ga tíi yawiire nɛ́ siɛnnɛ kpúu bèle kɛnmɛ báà nɛ̄ mi 'ki kpíʔile gèʔ.
22 Lɛ̀lɛ ó lɛ̀lɛ nī dàala
ni bé puu bile lè,
yaliire tánʔa lɛ̀lɛ
nɛ́ yaliire líɛ lɛ̀lɛ,
wiire lɛ̀lɛ nɛ́ káfugo lɛ̀lɛ,
ŋùʔɔ lɛ̀lɛ nɛ́ gbìnʔɛ lɛ̀lɛ,
cɛnvugo lɛ̀lɛ nɛ́ pìlige lɛ̀lɛ,
lɛ̀gɛlɛ gálì ke mìɛni
sǐ ga tíi kúɔʔ.»