2
1 Bà sí ki 'kpíʔile a nyìʔɛnɛ nɛ́ dàala nɛ́ ni yɛrɛ ti mìɛni 'faan nɛ̀ kúɔ.2 Sɛ́ni cɛnyɛ kɔliniwuʔu ki 'nɔ̀ gè, a Kulocɛliɛ wi 'kúɔ wi baara ti mìɛni nɛ̄ dè, a wi 'ŋɔ́ nɛ́ taa wi baara ti mìɛni nɛ̄ dè cɛnyɛ kɔlisiinwuʔu nɛ̄ gè. 3 A Kulocɛliɛ 'diba taʔa wè cɛnyɛ kɔlisiinwuʔu nɛ̄ gè, nɛ́ ki wàli nɛ̀ tɛ́ngɛ kiiyɛ nɛ́ ki wuʔu kpúʔɔ gè, nɛ́ ki cɛ́n kire cɛngɛ gī Kulocɛliɛ 'ŋɔ́ nɛ̀ taa duniya wi faanna ni mìɛni baara nɛ̄ dè.
Kulocɛliɛ wi 'kákpuɔ tiɛcɛ̀ngɛ gbòbori Edɛni kùlo nī lè
4 Nyìʔɛnɛ nɛ́ dàala yige siɛnrɛ tire dī dàa dè, lɛ̀lɛ níì nī Yewe Kulocɛliɛa wi 'dàala nɛ́ nyìʔɛnɛ yige lè. 5 Ki yé puu yaliire yafiɛn sì yé fìɛ fìinʔ, nɛ́ ki cɛ́n Yewe Kulocɛliɛ wiì yé fìɛ kàsaʔa cáan dàala nɛ̄ lèʔ, nɛ́ ki cɛ́n siɛn sì yé fìɛ puu dàala nɛ̄ lè bèri ni fáliʔ. 6 Nɛ̀ ki yaʔa nyumɔ pi 'puu nɛ yɛ̀gí dàala nī lè nɛ dàala ni mìɛni fuɔnri.
7 A Yewe Kulocɛliɛ wi 'dàala tárigɛ líɛ gè nɛ̀ siɛn faan, a wi 'siɛn fiɛ wè wi fínawiʔile nī gèle, a wi 'fali nɛ̀ kò sìi nɛ̄. 8 A Yewe Kulocɛliɛ wi 'fali nɛ̀ kákpuɔ tiɛcɛ̀ngɛ káà gbòbori Edɛni kùlo nī lè, cɛngɛnyɛnifoligɔli mɛ́ gè. A wi 'fali nɛ̀ siɛn líɛ wè nɛ̀ tɛ́ngɛ baa kire tiʔɛ nī gè. 9 Tiige ó tiige gī wélidanʔa gè, nɛ́ tiiye nyíì yasɛnrɛ dī káadaanra dè, a Yewe Kulocɛliɛ wi 'ti mìɛni felide fìin dè baa kire tiʔɛ nī gè. Tiiye siin 'puu baa kákpuɔ sunʔɔmɔ nī bè, kàa 'puu sìi tiige, gìi ní gè kacɛ̀ngɛ nɛ́ kapiile cɛ́n tiige.
10 Cáʔa káà puu nɛ kɔ́ngi Edɛni kùlo nī lè nɛ báan nɛ kákpuɔ tiɛcɛ̀ngɛ fuɔnri gè; kire tiʔɛ nī gè ki nɛ̂ pɛ́nì wáligi lakoliyo sicɛri. 11 Lakolibelige ki míʔɛ kire ki 'puu Pisɔn, kire ki 'Avila kùlo màʔa lè nɛ̀ kpàri. Kire kùlo lire nī tiɛ wi yē. 12 Kire tiɛ ŋáà wè, wi tɔ̀ni yē cɛ̀nwɛ. Nùdaanna yɛgɛ káà yē baa gàa pe 'yeri bidɛliyɔmi wè, nɛ̀ fàri ɔnikisi kàdɛnigɛ nɛ̄ gè. 13 Siinwuʔu gè ki míʔɛ kire ki 'puu Giyɔn, kire ki nyɛ́ni Kusi kùlo mári lè. 14 Taanriwuʔu gè, ki míʔɛ kire ki 'puu Tiigiri, kire ki nìɛ fúu Asiri kùlo cɛngɛnyɛnifoligɔli mɛ́ gè. Sicɛriwuʔu gè, kire ki 'puu Efirati cáʔa gè.
15 A Yewe Kulocɛliɛ wi 'siɛn líɛ wè nɛ̀ wi tɛ́ngɛ Edɛni kákpuɔ tiɛcɛ̀ngɛ nī gè wiri ki fáli béri ki wéli. 16 A Yewe Kulocɛliɛ wi 'ki juu nɛ̀ gbɛ̀ngɛ siɛn mɛ́ wè nɛ́ jo: «Muɔ bé gbɛ̀ri kákpuɔ yasɛnrɛ ti mìɛni káa, 17 nɛ̀ yiri tiige gáà gī baa gè, gàa gī kacɛ̀ngɛ nɛ́ kapiile cɛ́n tiige gè, muɔ sì yɛli bàga ki yasɛngɛ káà káaʔ, nɛ́ ki cɛ́n cɛngɛ gíì muɔ bé kàa káa gè, muɔ bé kùu wī.»
18 A Yewe Kulocɛliɛ wi 'jo: «Kiì yɛli nàguɔ wi‑ kò wìi nigbeʔ; m'bé sáʔafɔli faan bè kɛn wi mɛ́, ŋàa wi bé yɛli nɛ́ wi ní wè.»
19 Bà Yewe Kulocɛliɛ wi cé tárigɛ líɛ nɛ̀ nyàʔa yawiire ti mìɛni faan nɛ́ yafinide ní dè, a wi 'ti mìɛni tórigo nàguɔ mɛ́ wè, bè ki wéli kɛnmɛ bíì nɛ̄ wi bé ti míɛyɛ le yè. Míʔɛ ó míʔɛ nàguɔ wi yé le yawiʔi ó yawiʔi nɛ̄, a kire 'kò ti mìɛni míɛyɛ yè. 20 A nàguɔ wi 'yajuuro nɛ́ yafinide nɛ́ nyàʔayɛrɛ ti mìɛni míɛyɛ le yè ti nɛ̄. Nɛ̀ sí ki taa, wiì kàa nyaaʔ gàa ki bé gbɛ̀ puu wire sáʔafɔli wè bè yɛli nɛ́ wire ní wèʔ.
21 A Yewe Kulocɛliɛ wi sí ŋɔ́nigbuɔmɔ cáan nàguɔ nɛ̄ wè a wi 'ŋɔ́ni, nɛ́ wi gèdiige káà kɔ̀n nɛ́ koli nɛ̀ ki tiʔɛ tɔ́n gè. 22 A Yewe Kulocɛliɛ wi 'kire gèdiige líɛ gè nɛ̀ cɛliwɛ faan nɛ́ ki ní, nɛ́ wi kɔ́ri nɛ̀ pɛn nàguɔ mɛ́ wè.
23 A nàguɔ wi 'jo: «ʔá ! píra ŋáà nī wè, ŋàa wire wè wi 'yiri mi kácere nī, wi 'yiri mi céri nī; kire nɛ̄ pe béri wi yeri cɛliwɛ nɛ́ ki cɛ́n wi nyɛ́nì yiri nàguɔ nīb.»
24 Kire nɛ̄ a nàguɔ 'cɛliwɛ líɛ wè, wi bága laʔa wi tuu nɛ́ wi yàa nɛ̄ wè bè wìi puɔ wi cuɔ nɛ̄ wè, pe sí kò cetinnɛ nigbe.
25 Nàguɔ nɛ́ wi cuɔ ní wè, pe siin pe 'puu náborilo; piyè cé fìɛrɛ cɛ́nʔ.