Amapavilo kwa vanya wusi avajansi
5
1 Lino omwe vanya wusi,
munipuliise wunofu!
Mukhoole mandu na kiyaalama,
kwa kiiva ya malava makhome mandu gina gikivayinsila omwe.
2 Uwusi weenyu wuwolile,
amenda geenyu galiviilwe ni malata.
3 Isahaabu ni hela seenyu sina nkhamasi.
Inkhamasi iyo ngaja lubedelo kunyeenyu uluhaavi luna uNguluvi akhavahiga.
Mu wuhigo uwo amavili geenyu gakhananjikha ngaja mooto shina gunanga,
kwa kiiva mukiyikunganisisa ifiinu mu fihenje fyenyu mu nsiku isi isa wudugo.
4 Puliisi shina avasenga nsengo veenyu vingʼuula!
Vamalaga kisenga insengo ya kikungula mu magunda geenyu,
leelo omwe musivahombile,
amangʼuulo gaanave uNguluvi uMunya Ngufu Soona ikigapulikha.
5 Mukheele mu wusi na kiyishendeefya mandu mu wiikhasi weenyu.
Munenepeele nkhaani mu lusiku lwa wuhigo,
ngaja ingʼombe sina sineneepe sina sisakulwa kishinjwa.
6 Mukivahiga na kivabuda avaanu vina vikimuyinatila uNguluvi,
vina vasikivasivila shoshoona.
Kigugumila mu malava
7 Lino vahuvililaaji vayangu,
gugumilaji mbakha pina uMutwa uYeesu Kilisito akhayinsa.
Loleelaji ulugugumilo ulwa mulimaaji.
Kihuma inoonya iya mingo mbakha injanusa,
iheepa ifimelo filembe mu magunda na kijina finofu.
8 Shiisho ndeeno na yuumwe gugumilaji na kijina mu numbula seenyu,
kwa kiiva kiyinsa kwa Mutwa uYeesu Kilisito kuli nkholeela.
9 Vahuvililaaji vayangu,
musikhangʼulilanaji,
baheene musikhahigwa nu Nguluvi.
Muyangalilanaje,
kiiva uMuhigaaji ali pa mulyango,
iyinsa!
10 Vahuvililaaji vayangu,
puliisi!
Avakuwamalago va Nguluvi valogolaga gala gina uNguluvi wávafilikhaga.
Valafisiwaagwa,
leelo vagugumilaga mu makhamu goona.
Lino na yuumwe muveesaje shiisho.
11 Tiija vayimiliilwe vina vigugumila.
Mugameenye gina gamupataga uAyubu,
a kwa kiiva ya kigugumila kwakwe,
kuwudugo uNguluvi wámutangaga.
Ago goona giwonensa shina uNguluvi ana lusungu nu wugani wukhome.
12 Ku goona ago,
vahuvililaaji vayangu,
musikhayiyiigaji kwa shiinu shoshoona,
shive sha kushaanya,
isha mu nyi awu kwa shiinu ishinji shoshoona.
Nda mwiyiitikha ishiinu jovaji “Eena” hela,
nda mwikhaana jovaji “Ndaali” hela,
apo baheene musikhahigwa.
Kimufuunya uNguluvi kwa kimuhuviilila
13 Wuli,
munyeenyu akwali umuunu yoyoona yuna iilava?
Uyo,
isakulwa amufuunye uNguluvi.
Awu umuunu umunya lushendeewo?
Isakulwa ayeyeme injeyemo isa kimusufya uNguluvi.
14 Wuli,
muna muunu umutamu?
Nda akwali,
isakulwa avashemeele avayimililaaji va shipuga sha vahuvililaaji,
baheene vayinse vamususuute amafutab kwa litaawa lya Mutwa uYeesu Kilisito,
na kimufuunyila kwa Nguluvi.
15 Kimufuunya uNguluvi kwa lihuuvi,
kusimuponie umutamu uyo,
hata nda ana wunansi,
asisaajilwe.
16 Lino,
mulambisilanaje uwunansi weenyu na mufunyilanaje kwa Nguluvi,
baheene musiipone amatamu geenyu.
Amafuunyo ga mugolofu pa Nguluvi,
giiva gana ngufu,
khanji gisenga insengo.
17 Umukuwamalago uEliya akhandi muunu ngaja yuuse.
Wáfuunyile mandu kwa Nguluvi,
kiija inoonya yisikhatoonyaga mu nyi,
shiyooli yisikhatoonyile maakha gatatu na meesi mutanda.
18 Khanji,
wámufuunya uNguluvi kiija inoonya yitoonye.
Baheene inoonya yatoonyaga mbakha pina inyi yaamesa na kikhangasa ifyakiilya.c