Kimuyinatila uNguluvi
4
1 Amabaatu na makhaananio munyeenyu gihonsewa ni shi?
Gihonsewa nu wupafu weenyu wuna wumenana ni numbula seenyu!
2 Mwidobokha mandu ifiinu,
leelo musikifipata mbakha mwidobokha kibuda.
Muna jiila ku fiinu fya vaanu.
Khanji pina mwapootwa kifipata,
mwiyansa kidalinkhana na kiilwa.
Fina mukifidobokha musikifipata,
kwa kiiva musikifilomba kwa Nguluvi!
3 Hata pina mwilomba musikifipata,
kwa kiiva mwilomba fivi.
Mwilomba kwa lugulumilo ulwa kiyishendeefya mu wupafu weenyu.
4 Omwe vaanu vina musili vagolofu,
muhwaneene na vaafu!
Wuli,
musimeenye kiija kidobokha kigaha ngaja shina viigaha avanansi va mu nyi muno,
uyo iiva mulugu wa Nguluvi?
Umuunu yoyoona yuna idobokha kigaha ngaja avanansi va mu nyi muno,
uyo iiva mulugu wa Nguluvi.
5 Lino musikhahiivaji kiija,
aMayandikhwa aManofu giijova wudehi kiija,
uNguluvi wátuwumbile ose na idobokha mandu tive vaanu vaakwe hela.a
6 Lumo na ago,
imota yina tipeelwa nu Nguluvi yina ngufu mandu,
lulwene yiyandiikhwe mu Mayandikhwa aManofu kiija,
“Avaanu vina vikiyitumfya,
uNguluvi ikivakhaana,
leelo vina vikiyiyiisa,
ikivapeela imota.”b
7 Ndeeno,
mumuyinatilaje uNguluvi.
Mudagaji uShetaani,
baheene woope asivasije.
8 Muvejeelaji uNguluvi,
baheene woope asivavejeele omwe.
Omwe mu vanya wunansi,
musikhagahaji uwunansi,
musikhaveesaji na mahiiva gavili,
leelo mulambisilaje uwunansi weenyu.
9 Sugumilwaji,
khoolaji na kiyaalama,
kwa kiiva ya wunansi weenyu.
Uwushendeefu weenyu wuseetushe wuve kisugumilwa.
10 Muyiyisaaje pa Mutwa uNguluvi,
baheene woope akhavatupikha.
Musikhasalanaji
11 Vahuvililaaji vayangu,
musikhasenkhanaji.
Umuunu yuna ikimusenkha umuyine,
awu yuna ikimupiikha umuyine,
uyo iiva wásisala indaji sa Nguluvi na kisaaga kiija mbi.
Insengo yeenyu yisili kiyisala indaji nda yive nofu,
leelo kiyiyinatila.
12 Leelo yu Nguluvi mwene duguli,
yumwene yuna ikisiviikha indaji,
khanji yumwene Muhigaaji.
Yumwene hela yuna akwiliile kikulusa awu kibuda.
Lino,
owe yuuwe naani yuna ukimuhiga umuyaago?
Amapavilo aga kiyitumfya
13 Lino,
munipulisaaje wunofu omwe muna mwilogola mwijova,
“Iminsiyaano awu pamulaawu,
tikhaluta ku lijumbi limonga.
Ukho tikhakhala mwakha goona,
tiigula na kigusa na kikwava uwusi.”
14 Omwe musimeenye hata gina gakhawonekha pamulaawu!
Uwuumi weenyu shiinu shishi?
Wuhwaneene ni likungugu lina liwonekha kwa luhaavi lufupi,
khanji luhaavi luulo ilikungugu liiyaga!
15 Lino,
jovaji ndeeni,
“UMutwa uNguluvi nda agane tive wuumi,
tisiigahe ili awu lila.”
16 Leelo omwe mukiyitumfya kwa gina muhiiva kigasenga.
Kiyitumfya ngaja ndeeno,
kuvi.
17 Lino,
umuunu yoyoona yuna ameenye kigaha amanofu,
leelo asiigaha,
uyo iiva iigaha uwunansi.