Amamanyiso kwa fipuga fya vahuvililaaji
2
1 Leelo owe Tito,
uve wimanyisa avaanu kilingana na mamanyiso aga shiyooli.
2 Lulwene niijova,
avagosiivaha vayiyangalilaje,
khanji vave vikiyisunga,
vave ni njendo nofu,
vave vikigahuviilila aga shiyooli,
vave vanya lugano nu lugugumilo.
3 Shiisho ndeeno,
woope aVadalaavaha vaveesaje ni njendo sina sikimusufya uNguluvi,
vasikhahomeganiaga,
vasikhagaalaga,
humbe visakulwa kimanyisa injendo inofu.
4 Mu ilyo,
viiva vikivamanyisa avahinja vina vatoliilwe kivagana avagoosi vaanave na vaana vaanave.
5 Khanji vavamanyisaaje avahinja,
vaveesaje vanya kiyisunga,
vagolofu,
vasengaje insengo wunofu mu nanda saanave,
vave vana lusungu,
vanya kivatiila avagoosi vaanave,
baheene iLiswi lya Nguluvi lisikhasalwagwa.
6 Shiisho ndeeno,
woope avajeleelo uvapavilaje vave vanya kiyisunga.
7 Na yuuwe,
uve shihwano mu nsengo soona inofu,
uwonense ishiyooli nu wuyinatilo mu mamanyiso gaakho.
8 Gina wiijova gaveesaje ga shiyooli,
uluhaavi pina avaanu viijesa kikukhaania,
vagombole iliswi lya kikuliga,
baheene vawonaje nsoni.
9 Uvajovaje avavanda,
vavatiilaje avatwa vaanave,
vavashendefyaje mu njowo soona,
valeshe kikhaanania nawo.
10 Vasikhahiijaga,
humbe vawonensaaje uwuyinatilo wunofu woona,
baheene injendo saanave soona sidobokhwajwe na vaanu vapulisaaje amamanyiso ga Nguluvi uMukulusaaji weesu.
11 Umanyise ago,
kwa kiiva uNguluvi wáwonensa imota yaakwe,
yina yikivakulusa avaanu woona.
12 Imota iyi,
yikitumanyisa kikhaana uwuvi nu wupafu wuna wukhaania gina idobokha uNguluvi na kigagana amanofu.
Uluhaavi luna tili mu nyi iyi tive vanya kiyisunga,
va shiyooli,
khanji vagolofu.
13 Ndeeno pina tikheele tihepeleese,
kiyinsa kwa Yeesu Kilisito mu wutupikho waakwe uwukhome,
yuna Nguluvi Mukhome na Mukulusaaji weesu.
Ili lilyene lihuviililo lyesu lina likitupeela uwushendeefu.
14 Uyo wáhumyaga uwuumi waakwe kwa kiiva yeesu,
baheene atukuluse mu wunansi woona,
na kituvalasa tive vaanu vaakwe va shiyooli,
vina vijimba kisenga amanofu.
15 Amaswi ago gageene uvamanyisaaje avaanu.
Uvajiniaje inumbula na kivapavila kwa ngufu.
Usikhamukundaga umuunu yoyoona akusale.