Tito 1

Ibalula ya Pawulo kwa

Tito

UPawulo ikimuhunjila uTito

1 Ibalula iyi yihumile kunyangu one Pawulo, yuna nili muvanda wa Nguluvi, khanji nili mwanandeje wa Yeesu Kilisito. One nifiliikhwe nivataviilile avabaagule va Nguluvi na kivajinia vina vikimuhuviilila uNguluvi, khanji nivamanyise vave viimanya ishiyooli vave ni shitiilo shina shikivalongosa pa Nguluvi. 2 Mu ago, viiva nu luhuviililo lwa wuumi wa shiluta, wuna uNguluvi wáwutahisaaga kihuma pina inyi yisinawumbwe, kiiva uNguluvi asilogola uwudehi. 3 Lino, uluhaavi lwa Nguluvi lwafikha, wávajovelaga avaanu iLiswi lyakwe kwa nsila ya kilikhoma one, mu mola yina wánipeelaga niyiyalaalise ngaja shina wánilajisaaga uNguluvi uMukulusaaji weesu. 4 Nikikuyandishila owe Tito, yuna lusawo lwangu lwa shiyooli kwa lihuuvi lina tihanjile.

Imota nu wulindamafu kihuma kwa Nguluvi uWiheesu nu Kilisito Yeesu uMukulusaaji weesu, five lumo noowe.

Insengo ya Tito kula ku Kileete

5 Nakulekhaga kula ku Kileete kiija unosaaje gina gashepwishe mu shipuga sha vahuvililaaji va Yeesu, na kihaagula avayimililaaji vina viyimiilila mu majumbi goona ngaja shina nakulajisaaga. 6 Umuyimililaaji wa shipuga sha vahuvililaaji va Yeesu, isakulwa kiiva muunu yuna asipiikhwa. Aveesaje ana mudala yumo, avanaakwe vaveesaje vahuvililaaji va Yeesu na vasikhaveesaga ni shidada awu maleefi. 7 Umwene kwa kiiva muyimililaaji, apeliilwe insengo ya Nguluvi, asisakulwa kiiva muunu wa kipiikhwa. Aleshe kiyisufya, yuna agaya nkhalasi, yuna asili mugaasi, yuna agaya mabaatu, khanji agaya wupafu uwa kipata uwusi mu nsila sina sisifwaya. 8 Leelo isakulwa kiiva munya lusaajisa, yuna idobokha kigaha gina manofu, munya kiyisunga, mugolofu, mubaagule, munya nkhanga. 9 Ave iikhata wunofu iMola iNofu iya Yeesu Kilisito, ngaja shina wámanyisiwaagwa. Baheene avajinie avaanu mu mamanyiso ga shiyooli, na kivamena vina vikhaania iliswi lya Mutwa.

10 Nilogola aga kiiva vakwali avaanu vinshi vina vikhaania amamanyiso ga shiyooli, vilogola amaswi gina gangaya lutono, khanji vadehaaji, mandu aVayahuudi vina vashaanali vikhangasa ingʼoma saanave. 11 Avaanu awo uvakhaane kimanyisa, kwa kiiva vikivayasa, vinanga ilihuuvi lya vaanu woona mu majumbi minshi, pina vimanyisa gina gasifwaya. Visenga ndeeno baheene vapate ihela. 12 Khanji umukuwamalago yumo mu vakuwamalago ava ku Kileete wálogolaga, “AVakileete vadehi nsiku soona, vali ngaja nkhanu inkhali sa mu lihakha, vapafu, khanji woolo.” 13 Ulubedalo ulu lwa shiyooli. Mu ili uvakhajile kwa wukhali vina vikimuhuviilila uNguluvi, baheene vayinatilaje amamanyiso aga shiyooli. 14 Valeshe kiyinatila insimo sa Shiyahuudi ni ndaji sa vaanu vina valeshile ishiyooli. 15 Awo vimanyisa kiija, fikwali ifiinu fina fikwiliile kimushafula umuunu. Leelo ku vala avagolofu pa Nguluvi, ifiinu fyona fivalasiiwe. Ku vala avaafu, khanji vasiina lihuuvi, ifiinu fyona fyafu, kwa kiiva uluhala na mahiiva gaanave, gamemile uwaafu. 16 Vikiyijova vaveene kiija vamumeenye uNguluvi, leelo mu njendo saanave vikimukhaana. Awo vaveene vina vikimukhalasa uNguluvi, vanansi, vina vasifwaya hata mu nsengo yoyoona inofu.