Ulujendo ulunofu ulwa muhuvililaaji wa Kilisito
3
1 Uvakumbusaaje avaanu kiiva vapulikhaaji kwa vayimililaaji na ku vanya wutawulilwa,
na kiiva vayinatilaaji.
Khanji,
vaveesaje vayipinyile kisenga insengo sosoona inofu.
2 Uvajovaje vasikhamuligaga umuunu yoyoona,
vasikhaveesaga na mabaatu,
vakhalaje wunofu na kipulinkhana,
vave vahuugu ku vaanu woona vina vikivalafya.
3 Na yuuse na vaanu woona paanyuma tikhandi tingaya luhala,
tikhandi vanansi,
tijanjilisiiwe.
Tikhandi vavanda va wupafu wuvi uwa mwalu mwalu.
Uwuumi weesu wukhandi wa wunansi ni jiila,
avaanu vakhandi vikitukhalalila,
na yuuse tikhandi tikivakhalalila.
4 “Leelo uNguluvi uMukulusaaji weesu,
atuwonensiise uwunofu nu lugano lwakwe,
5 kwa kitukulusa.
Yisili kiija wásengaga ndeeno kwa kiiva ya nsengo seesu ingolofu sina tisenjile ose,
humbe wásengaga kwa kiiva ya lusungu lwakwe.
Wátukulusaaga kwa kituyoosa uwunansi weesu,
kwa nsila ya kitusava wupya,
khanji ikitupeela uwuumi wupya kwa nsila ya Numbula uMunofu.a
6 Wátududumisisa uNumbula uMunofu kwa winshi kishilila uYeesu Kilisito uMukulusaaji weesu.
7 Mu ilyo,
ku mota yaakwe,
atuvasisiise kiiva vagolofu pamwene,
baheene tive vahalaaji va wuumi wa shiluta wuna tiyihuviliile.”
8 Iliswi ilyo lya kihuviililwa.
Nisakula ukhangasaaje amaswi aga,
baheene vina vikimuhuviilila uNguluvi,
vahiivaje na kijimba kikhala uwiikhasi wunofu.
Aga maswi manofu kwa vaanu,
khanji gana lutono.
9 Lumo na ago,
uleshe kihanga mu lukhaananio lwa shiyasu,
ni nsimo sa mataawa ga shikholo ga va paanyuma,
ilibaatu nu lukhaananio lwa ndaji sa Musa.
b Aga goona gangaya lutono.
10 Umuunu umuhomegania,
umupavilaje ulwa wutasi nu lwa wuvili,
nda asipulikha,
muwusaaji muna muhanjile.
11 Wiimanya kiija umuunu ngaja uyo aleshile ishiyooli,
khanji munansi,
uyo wáyihiga yumwene.
Amaswi aga wudugo
12 Nikhamufilikha kunyaakho uAlitema awu uTikiko.
Nda ayinse ukho unyangupaje kiluta ku Nikapoli titangaane,
kiiva nisakula kiluta kikhala kula uluhaavi lwa shipepo.
13 USeena yuna mumanyi wa ndaji nu Apolo,
uvapeele fyona ifya kivatanga mu nsila,
vasikhashepushilwagwa shiinu shimonga.
14 Avaanu veesu woona vina vikimuhuviilila uNguluvi ava ku Kileete,
vayimanyise kivatanjilisa avaanu ifiinu fina fisakulwa insiku soona,
ku vaanu vina vali mu malava na vina vagayile ifiinu ifya kivasunga.
15 Avaanu woona vina tili lumo,
vikikuhunjila.
Lino na yuuwe uvahunjilaje woona vina vatugeene muna tihanjile mu lihuuvi.
Imota ya Mutwa uNguluvi yive lumo noomwe woona.