Gina giwonekha insiku isi isa wudugo
3
1 Lino,
umanyaje kiija,
insiku isi isa wudugo kusiive na malava.
2 Uluhaavi ulo,
avaanu vasiyigane vaveene,
vasiive vapafu va kidobokha ihela,
vanya kiyisufya,
vanya shidada,
vanya maligo,
vina vasikivatiila avasafi vaanave,
vina vasihonjesa,
vangaya wuvalafu.
3 Khanji,
vina vasiiva vikivadobokha ava kunyaanave,
vina vasisakula kiyitinkhana,
vahomegania,
vina vangaya kiyiyangalila,
vakhali,
vina vasidobokha amanofu,
4 vadolelaaji,
vanya shidada,
vanya matuupa,
vina vidobokha kigaha gina amavili gaanave gisakula,
viilekha kimugana uNguluvi.
5 Avaanu awo viwonekha pa meeho ga vaanu kiija vikimuyinatila uNguluvi,
leelo mu numbula saanave vikhaana ingufu sa Nguluvi.
Awo usikhahangaga na woope.
6 Mu awo vakwali vina vihuluta kwa lugulumilo luvi mu nanda sa vaanu,
na kivajanjilisa avashimaayi avayasu.
Avashimaayi awo vameniilwe nu wunansi,
vana wupafu winshi.
7 Avashimaayi awo vikiyimanyisa shila lisiku,
leelo vigombola mandu kimanya ishiyooli.
8 Avaanu awo vina vihuluta kwa lugulumilo luvi,
visivila ishiyooli ngaja uYaane nu Yambule,
a vina vakhananiaga nu Musa.
Avaanu ava valulunganisiiwe uluhala,
vasikigahuviilila amamanyiso ga lihuuvi lyesu.
9 Leelo vasikwiliile kifikha popoona,
kwa kiiva uwuyasu waanave wusiive bahawuvalafu ku vaanu woona,
ngaja shina wukhandi uwuyasu wa Yaane nu Yambule.
Indaji sa Pawulo kwa Timoteo
10 Leelo owe,
uyinatile amamanyiso gangu nu lujendo lwangu,
ni lihuuvi,
nu lugugumilo,
nu lugano,
na kiyikhangasa.
11 Umeenye avaanu luna vanilafyaga na kinilemasa pina nikhandi nili mu lijumbi lya Antiyokiya,
lya Ikoniyo ni lya Lisitila.
Khanji,
umeenye kiija nagugumilaga mu malava goona,
mbakha uMutwa wánikulusaaga mu ago.
12 Lulwene,
woona vina visakula kimuyinatila uNguluvi mwa Kilisito Yeesu,
vasiive vilafisiwa.
13 Leelo avadehaaji na vanansi vasikhalekha kiiva vanansi mandu,
vakhava viideha na kidehelwa.
14 Lino owe,
ugayinatilaje amamanyiso gina wamanyisiwaagwa na kigahuviilila kwa shiyooli,
kwa kiiva uvameenye vina vakumanyisaaga.
15 Khanji kihuma uwaana waakho ugameenye aMayandikhwa aManofu gina gikikupeela uwumanyi,
hata kiposheela uwukulukho kwa kimuhuviilila uKilisito Yeesu.
16 AMayandikhwa aManofu goona gayandiikhwe mu wulongosi wa Nguluvi.
Ago gitanga kimanyisa ishiyooli,
kivapavila avaanu uwunansi waanave,
kivalongosa pina vinanga,
na kivapavila baheene vave ni njendo inofu.
17 Umuunu wa Nguluvi yuna isenga insengo ya Nguluvi ave akhamiliishe,
abagwilwe kisenga shila nsengo inofu.