4
1 Nikikulajisa pa Nguluvi nu Kilisito Yeesu,
yuna akhavahiga vina wuumi na vina vafwile,
khanji akhayinsa kitema,
kwa kiiva yumwene Mutwa.
2 Uveesaje wiikhoma iLiswi lya Nguluvi,
ugahaje ilyo uluhaavi luna lufwaya na luna lusifwaya.
Uveesaje wipavila na kikhajila,
uvajiniaje avaanu na kivamanyisa kwa lugugumilo loona.
3 Nikikujova ndeeno,
kwa kiiva lukhayinsa uluhaavi,
luna avaanu vakhava vasipuliisa amamanyiso aga shiyooli.
Leelo,
vakhava visakula kipuliisa gina gikivashendeefya hela,
na vakhava visakula avamanyisaaji fipuga fipuga va kivamanyisa gina vidobokha aveene.
4 Vakhava viilekha kipuliisa ishiyooli na vakhava viyinatila insimo sa wudehi.
5 Lino owe,
uve ukiyiyangalila mu goona,
ugugumilaje mu makhamu,
sengaga insengo iya kikhoma iMola iNofu ya Nguluvi,
ugahaje wunofu mu wuvanda waakho woona.
6 Nikikujovela aga,
kwa kiiva visakula kinihumya one ngaja mwela ya divaayi,
yina viiponya pa luvala ulwa kihumisa ishadanda.
a Lulwene niijova,
uluhaavi lwangu ulwa kiifwa lwafikha.
7 Najimba kilwila amaswi ga lihuuvi lyesu.
Lino nagamala amamenano ga luvilo gina nikhandi niisiga,
niyangalila amamanyiso ga lihuuvi.
8 Lino yisigeele kipeelwa ulutono lwa kikhala mu wiikhasi wuna inojelwa wiila uMutwa uMuhigaaji wa shiyooli.
Ulutono ulo akhanipeela ilisiku lila lina tikhahigwa,
yisili kiija yuune hela,
leelo na vaanu woona vina vidobokha mandu kimwaga umwene pina akhayinsa.
Ililombo lya Pawulo
9 Timoteo,
ujimbaje kiyinsa nyangu kunyangu.
10 UDeema wánilekhaga,
kwa kiiva wádobokhaga injowo isa mu nyi muno,
wálamulaga kiluta ku lijumbi lya Tesalonike.
UKelesike wáaluta kula ku Galatiya,
uTito wáaluta ku Dalimatiya.
11 Yu Luuka mwene duguli yuna ali noone apa.
Uluhaavi pina ukhayinsa,
uyinsaje lumo nu Maluko,
kwa kiiva umwene mutango wangu mu nsengo sa Nguluvi.
12 Namufilikhaga uTikiko kula ku lijumbi lya Efeso.
13 Pina ukhava wiyinsa,
uyinsaje ni likhooti lyangu lina nikhalileshile kwa Kalipo kula ku Tulowa,
khanji uyinsaje na mataafili,
mandu gala aga nkwembe.
14 UIsikanda umuponda fyuma,
wánigahila mavi mandu.
UMutwa uYeesu akhamuhiga kwa kiiva ya mavi gaakwe.
15 Na yuuwe uyiyangalilaje nu muunu uyo,
kwa kiiva akhandi igomanjila mandu gina tiikhoma.
16 Pina nikhandi nitaviilila ulwa wutasi pa livansa,
akhandi akwasiina hata yumo umunya kinitanjilisa,
woona vanilekhaga.
Nilomba uNguluvi aleshe kivavasisa uwunansi mu ilyo.
17 Leelo uMutwa akhandi lumo noone,
wánipeela ingufu isa kikhoma iliswi lyakwe mu shiyooli shoona,
baheene avaanu woona vina vasili Vayahuudi vapulishe.
UMutwa wánikulusaaga mu mfwa,
kwa kiiva nikhandi ngaja nili mu mulomo gwa nyalupala.
18 UMutwa akhanikulusa mu mavi goona na kinidiima,
mbakha anifise mu Wutwa waakwe uwa kushaanya.
UNguluvi atupikhwe shiluta na shiluta.
Amina!
Injowo sa wudugo
19 Umuhunjilaje uPulisika nu Akila na vina vali mu nanda ya Onesifolo.
20 UElasito wásigalaga mu lijumbi lya Kolinto.
UTilofimo namulekhaga ku Mileeto,
kwa kiiva akhandi mutamu.
21 Lino,
ugahaje nyangu kiyinsa pina lushaanali kifikha uluhaavi lwa shipepo.
UEwubulo,
uPude,
uLino nu Kilawudiya,
lumo na vahuvililaaji va Yeesu Kilisito woona,
vikikuhunjila.
22 UMutwa uYeesu ave lumo noowe.
Imota yaakwe yive lumo noomwe.