Kiiva nu lugugumilo mu nsengo sa Nguluvi
2
1 Lino owe muswamu wangu,
uve ni ngufu sina siihuma kwa Kilisito Yeesu kwa kishilila imota yaakwe.
2 Wapulikhaga gina nikhandi nimanyisa pa valunjikhaaji vinshi.
Lino ago amamanyiso ugatawule ku vaanu vayinatifu vina vakwiliile kivamanyisa avanji.
3 Ugugumilaje mu malava lumo noone,
ukho kukwene kiiva musulukhali munofu wa Kilisito Yeesu.
4 Umusulukhali ihegukha kisenga insengo isinji sina sisili sa shisulukhali,
baheene amushendeefye umukhome waakwe.
5 Shiisho ndeeno umunya kimenana mu luneeno,
asipeelwa ulutono,
nda asamenana mu lugoto lwa luneeno.
6 Umuunu yuna iilima kwa kijimba,
uyo isakulwa kiiva wa wutasi kiposheela amakhomo.
7 Timoteo,
ugaviishe mu numbula gina nikikujovela,
kwa kiiva uMutwa akhakupeela uluhala lwa kigamanya goona.
8 Shila lisiku umukumbukhaje uYeesu Kilisito kihuma mu shikholo sha mutwa uDawudi,
a yuna uNguluvi wámufyusaaga kihuma kwa vina vafwile,
ngaja shina yiijova iMola iNofu yina niikhoma.
9 Kiiva ya ilyo,
one nilafisiwa hata kipinywa na manyololo ngaja nili munansi.
Leelo iLiswi lya Nguluvi lisiipinywa.
10 Lino,
one nigugumila mu goona kwa kiiva ya vabaagule va Nguluvi,
kiija woope vakulusiwe nu Kilisito Yeesu,
na kiiva lumo mu wutupikho uwa shiluta.
11 Iliswi ili lya kihuviililwa kiija,
“Nda tafwisaga lumo nu Kilisito,
khanji tikhava wuumi lumo na woope.
12 Nda tigugumila,
tikhatema lumo na woope.
Nda tikimukhaana umwene,
woope akhatukhaana ose.
13 Nda ose tisikimuhuviilila,
umwene akhasigala wa kihuviililwa
kwa kiiva umwene shila lisiku wa shiyooli.”
Umusenga nsengo yuna ayitiikhwe nu Nguluvi
14 Uvakumbusaaje ago na kivapavila pa Nguluvi,
valeshe kikhaanania kwa kiiva ya tujowo tudoodo.
Amakhaananio ago gangaya lutono,
leelo gikivananga vina vikinipulikha.
15 Ujimbaje kikhoma iliswi lya shiyooli,
ngaja shina isakula uNguluvi.
Apo usiive musenga nsengo yuna ungaya nsoni kwa kiiva ya nsengo yaakho.
Kisenga ndeeno,
kukwene uNguluvi idobokha.
16 Uleshe kiyiyinjisa mu njowo sina sisili sa Mutwa sina singaya lutono,
kwa kiiva ago gikivaviikha avaanu kutali mandu nu Nguluvi.
17 Amamanyiso gaanave giyalaalila ngaja lilonda lina lisiipona lina liyalaalila muvili goona.
Mu shipuga sha awo vakwali uHimenayo nu Fileto,
18 vina valeshile ishiyooli,
vayajile mandu.
Vinanga ilihuuvi lya vaanu avanji pina viijova kiija ulufyukho lwa vina vafwile lwashilaga.
19 Leelo uluutu luna luvishiilwe nu Nguluvi lujinile,
luyandiikhwe amaswi aga,
“UMutwa avameenye avaanu vaakwe,”
b
khanji,
“Umuunu yoyoona yuna ikiyishemeela kiija umwene wa Mutwa,
awuleshe uwunansi.”c
20 Mu nanda ya munya wusi sikwali inkhonkholo inofu isa lutogo,
khanji sikwali inkhonkholo sina sisili sa lutogo.
Inkhonkholo iso sikwali isinji sa kisenjela insengo sa shitiilo,
isinji sa kisenjela insengo sa mwalu mwalu.
21 Lino,
umuunu nda ayivalase kwa kihegukha uwunansi uwo woona,
asiive ngaja nkhonkholo imbaagule yina yivalasiiwe na kitiilwa.
Ndeeno asiive ikimutanga uMutwa,
khanji hambi iiva mubaagule wa nsengo soona inofu.
22 Uwuhegukhaje uwupafu wa wujeleelo,
uveesaje mu wugolofu,
mu lihuuvi,
mu lugano na mu wulindamafu.
Uve mu ago goona lumo na vina vifuunya kwa Mutwa,
kwa numbula mbalafu.
23 Usikhajelaga kiyinatila ulukhaani lwa shiyasu luna lungaya lutono,
kwa kiiva umeenye kiija uwo wuhonsa amabaatu.
24 Khanji,
yisisakulwa umuvanda wa Mutwa kiiva munya mabaatu.
Leelo,
ave muhuugu kwa vaanu woona,
mugugumilaaji,
yuna ameenye kimanyisa.
25 Khanji,
ave ikivapavila kwa wuhuugu vina vikhaanania nu mwene,
baheene kwa kimuhuviilila uNguluvi avapeele kilambiisila na kishimanya ishiyooli.
26 Lino,
uluhala lwanave lutine,
vapoole mu lutego lwa Shetaani,
d yuna avakheete kiija vave viigaha gina idobokha umwene.