Ibalula ya Pawulo kwa
Vaefeso
UPawulo ikivahunjila aVaefeso
1
1 Ibalula iyi yihumile kunyangu one Pawulo,
yuna nili mwanandejea wa Kilisitob Yeesu ngaja shina akhandi isakula uNguluvi.
Nikivayandishila omwe muna mwikhala [mu lijumbi lya Efeso],
c muna muli vabaagule va Nguluvi,
khanji mukimuhuviilila uKilisito Yeesu.
2 Imota nu wulindamafu kihuma kwa Nguluvi uWiheesu nu Mutwa uYeesu Kilisito,
five lumo noomwe.
UNguluvi atunwajwe kwa lugoto lwakwe ulwa kivakulusa avaanu
3 Atunwajwe uNguluvi,
uDaada wa Mutwa weesu uYeesu Kilisito!
Umwene atuyimiliile kwa luyimiililo loona ulwa shinumbula luna lwihuma kushaanya kwa Nguluvi.
Uluyimiililo ulo tikiluposheela,
kwa kiiva tilungeene nu Kilisito.
4 Uluhaavi uNguluvi pina akhandi ashaanali kiwumba inyi,
wátuhagulaga kiija tive vaanu vaakwe,
kwa nsila ya kilungana kwesu nu Kilisito.
Wágahaga ndeeno baheene tive vagolofu,
vina tisipiikhwa pamwene.
Kwa kiiva ya kitugana ose,
5 uNguluvi wálamulaga kihuma pawukuulu kituviikha kiiva vaana vaakwe,
kishilila kwa Yeesu Kilisito.
Wálamulaga kigaha ndeeno,
kwa kiiva shiisho ndeeno shina yikimushendeefya,
6 baheene woona timusufye uNguluvi kwa mota yaakwe iya kiswiga.
Imota iyo wátupeelaga kishilila kwa Lusawo lwakwe,
d uMugani.
7 Kishilila idanda ya Kilisito pina wáfwisaga pa musalaaba,
tikulusiiwe,
uluganulo lwakwe kiija,
tisajiilwe uwunansi weesu.
Aga gasenjekhaga kwa kiiva ya wukhome wa mota yaakwe,
8 yina atupeelile mandu.
UNguluvi wátupeelaga imota iyo mandu,
khanji wátupeelaga uluhala loona nu wumanyi.
9 Wátugahaga kilumanya ulugoto lwakwe ulwa wufiho.
Wágahaga ndeeno kwa kiiva shiisho ndeeno shina yikimushendeefya.
Ulugoto ulo wálamulaga kiwonensa kishilila kwa Kilisito.
10 Ulugoto lwa Nguluvi lulwene ulu,
nda uluhaavi luna aluhagwile pina lukhava lwafikha,
akhafikungaania lumo ifiwumbwa fyona,
fina fikwali mu nyi awu fina fikwali kushaanya.
Khanji akhamugaha uKilisito ave mukhome wa fiwumbwa ifyo.
11 Ifiinu fyona fisenjekha kwa kiiva ya lugoto nu wulamulaaji wa Nguluvi.
Woope uNguluvi kihuma pawukuulu wátuhagulaga ose ti Vayahuudi,
kiija tive vaana vaakwe kwa nsila ya kilungana nu Kilisito.
12 Wágahaga ndeeno,
kiija ose vina tili Vayahuudi vina tatalaga kimuhuviilila uKilisito,
tive tikimusufya uNguluvi kwa wutupikho waakwe.
13 Omwe khanji vina musili Vayahuudi,
mwapulikhaga iliswi lya shiyooli,
uluganulo lwakwe iMola iNofu iya Nguluvi yina yikivakulusa.
Mwaganaga kipulikha,
mwamuhuviilila uKilisito,
woope uNguluvi ngaja wávavavaga kiwonensa kiija,
muli vaakwe.
Uluvawo ulo,
yu Numbula uMunofue yuna wátahisaaga kitupeela.
14 UNguluvi wátupeelaga uNumbula waakwe ave ngaja shiinu sha kikhomekha,
ikitubedela kiija tikhaposheela uwuhaasi kihuma kwa mwene,
mbakha uluhaavi pina akhasa kitukulusa khabisa ose ti vaanu vaakwe.
UNguluvi wágahaga ndeeno,
kiija timusufye umwene kwa wutupikho waakwe!
UPawulo ikivafuunyila aVaefeso
15 Nikimuhonjesa uNguluvi,
kwa kiiva ya njowo iso soona sina wátugahilaga.
Kihuma pina napulikhaga kiija mukimuhuviilila uMutwa uYeesu na kivagana avahuvililaaji woona va Nguluvi,
16 nisileshile kimuhonjesa uNguluvi kwa kiiva yeenyu na nikivakumbukha luhaavi loona mu mafuunyo gangu.
17 Nilomba kiija,
uNguluvi wa Mutwa weesu uYeesu Kilisito,
uWiheesu wa wutupikho,
avapeele uwumanyi nu wugubutulo kihuma kwa Numbula uMunofu kiija,
mumumanye mandu.
18 Khanji nilomba avadindule ameeho ga mu numbula,
baheene mumanye wunofu shila shina avashemeleele kiija muposheele,
baheene muveesaje nu luhuviililo ulwa shiyooli.
Ishiinu isho wusi wa wuhaasi uwunya wutupikho wuna wátahisaaga kivapeela avabaagule vaakwe.
19 Khanji mumanye ingufu saakwe inkhome.
Ingufu iso sisenga insengo mu numbula seesu vina timuhuviliile uYeesu.
Ingufu iso,
silingaana ni ngufu yaakwe inkhome
20 yina uNguluvi wámufyusaaga uKilisito kihuma kwa vina vafwile na kimuviikha kushaanya kwa mwene ku liwokho lyakwe ilya kundiilo,
mu luvala ulwa lishima likhome mandu.
21 Ukho uKilisito mukhome kishila uwutwa nu wutawulilwa woona,
hata ifiwumbwa fyona ifinya wutawulilwa,
kiyansisa uluhaavi ulu na luna luyinsa.
22 UNguluvi wámupeelile ingufu ya kitema ifiinu fyona na kimuviikha mu shipuga sha vahuvililaaji kiija,
ave Mukhome kwa fiinu fyona ngaja mutwe mu muvili.
23 Ishipuga sha vahuvililaaji,
ngaja muvili gwa Kilisito.
Umwene ikwisa ifiinu fyona shila luvala.