Kiwuyangalila uwuyeeshelo
5
1 UKilisito atupeelile uwuyeeshelo,
baheene tikhale mu wuyeeshelo.
Lino muyikhangasaaje,
musikhayitikhaji kitemwa khanji ni ndaji sa Musa ngaja umunjeganjega umusito.
2 Puliisi!
Yuune Pawulo nikivajovela aga!
Nda muyiitishe kiyinjisiwa ijando kwa kiiva ya kisiyinatila indaji sa Musa,
apo uKilisito asiiva nu lutono loloona kunyeenyu.
3 Nikivapavila khanji bahawuvalafu kiija,
yoyoona yuna ikunda kiyinjisiwa ijando,
isakulwa kiyinatila indaji soona isa Musa.
4 Nda muhuviilila kivasiwa kiiva vagolofu pa Nguluvi kwa kisiyinatila indaji,
mumanyaje kiija mwayiwuusa yuumwe kwa Kilisito,
ndeeno muli kunja ya mota ya Nguluvi.
5 Leelo ose,
kishilila uNumbula uMunofu tihuviilila kiija,
tikhavasiwa nu Nguluvi kiiva vagolofu kwa kimuhuviilila uYeesu.
6 Ino nda tilungeene nu Kilisito Yeesu,
kiyinjisiwa ijando awu kilekha kiyinjisiwa ijando,
kungaya nsengo yoyoona.
Ishiinu ishikhome shina shisakulwa,
lihuuvi lyesu lyene,
lina liwonekha kwa kikhala kwa lugano.
7 Ulwamwandi mukhandi mwigaha wunofu!
Lino yu naani yuna avasiviile kiyinatila ishiyooli?
8 Uwukweheleso uwo wusiihuma kwa Nguluvi yuna avashemeelile.
9 Leelo mumanyaje kiija,
amamanyiso ga wudehi ago gageene ngaja avaanu shina viijova kiija,
“Ilihelu lidoodo hela,
liwumula uwutine woona!”a
10 UMutwa uYeesu anipeelile ishiyooli kiija,
musifwata amaswi ga vaanu avanji,
leelo musifwate amaswi gangu.
Khanji yoyoona yuna ikivapalankhania omwe,
shiyooli akhahigwa hata nda ave yu naani.
11 Vahuvililaaji vayangu,
avanji viijova one nishaanali niikhoma kiija,
woona visakulwa kiyinjila ijando.
Nda naali niiva niijova ngaja ndeeno,
kwashi aVayahuudi vikinilafya?
Nda naali niiva niijova ngaja ndeeno,
kikhoma kunyangu ulwa mola sa mfwa ya Yeesu pa musalaaba,
kwali kwiva kusikivakhalasa.
12 Nidobokha kiija,
avaanu vina vikivalulungania omwe kwa njowo sa kiyinjisiwa ijando,
vaali vayiyiipaje vaveene!
13 Vahuvililaaji vayangu,
uNguluvi avashemeelile,
baheene muyiyesheele.
Lino uwuyeeshelo weenyu,
musikhawugahilaji uwupafu uwuvi uwa muvili,
leelo mutanjilisaniaje na kiganana.
14 Indaji soona isa Musa sikwali mu ndaji yimo yina yiijova,
“Umuganaje umuyaago,
ngaja shina uyiganile yuuwe.”b
15 Leelo nda mulumana na kiliisana ngaja nkhanu,
muyivavalaje musikhabudanaga.
Kimuhuviilila uNumbula uMunofu
16 Ino nikivajovela kiija,
uwiikhasi weenyu wuve wilongosewa nu Numbula uMunofu,
baheene musikhafwataji khanji uwupafu uwuvi uwa muvili.
17 Nikivajovela ndeeno,
kwa kiiva fyona fina idobokha umuunu umunansi,
yisili ngaja shina isakula uNumbula uMunofu.
UNumbula uMunofu nu muunu umunansi vasipulinkhana,
ndeeno,
musikwiliile kigaha shoshoona shina mwidobokha.
18 Leelo nda mwilongosewa nu Numbula uMunofu,
musiitemwa ni ndaji sa Musa.
19 Ino timeenye gina vikigasenga avaanu kwa kiwuyinatila uwupafu waanave uwuvi uwa muvili,
uwushemi,
uwushaafu,
kigaha injowo sa nsoni,
20 kifuunya amanguluvi,
uwuhavi,
uwulugu,
ilibaatu,
uwushooyo,
inkhalasi,
uwubwalukha,
ulukhania,
kibagunkhana,
21 ijiila,
uwugaasi,
kiiva nu wupafu uwuvi,
na ganji gina gihwanana na ago.
Nikivajovela khanji ngaja shina nikhandi nivajoveele kiija,
avaanu vina viigaha ago,
vasikhahaala uWutwa wa Nguluvi.c
22 Leelo nda tilongosewa nu Numbula uMunofu,
tisiive ni likhomo ilya Numbula uMunofu.
Ilikhomo ilyo lilyene,
ulugano,
uwushendeefu,
uwulindamafu,
kiyijimfilisa,
uwugolofu,
ulusungu,
uwuyaminifu,
23 uwuhuugu na kiyiyangalila.
Kusiina indaji yina yikhaana ago.
24 Avaanu nda valungeene nu Kilisito Yeesu,
amavili gaanave gakhomeleelwe pa musalaaba,
lumo na mahiiva gaanave amavi nu wupafu uwuvi uwa muvili.
25 UNumbula atupeelile uwiikhasi uwupya,
ino tikhalaje ngaja shina ikitulongosa.
26 Tisikhayisufyaga,
tisikhayansaniaga ilibaatu,
awu kiwifushilana.