Kitanjilisania
6
1 Vahuvililaaji vayangu,
umuunu nda agwile mu wunansi,
omwe vina mwilongosewa nu Numbula uMunofu mugomolaji kwa wuhuugu.
Yiyangalilaji,
baheene omwe musikhajelwaji kifwata injendo saakwe.
2 Muyanushilanaje amasigo geenyu,
kukwene kisiyinatila indaji sa Kilisito.
3 Lino yoyoona yuna ikiyiwona kiija,
muunu kishila avayine,
uyo asili muunu,
leelo ikiyijanga hela.
4 Shila muunu ayisesaaje wunofu injendo saakwe.
Nda iigaha amanofu,
apo baheene akwiliile kiyihala kwa manofu gina iigaha.
Leelo asikhayihwananisaaga na ganji gina umuunu uyunji agahile,
5 kwa kiiva shila muunu isakulwa kisumula umusigo gwakwe yumwene.
6 Umuunu yuna imanyisiwa iLiswi lya Nguluvi,
ave ikimugavila umumanyisaaji waakwe amanofu gina agapatile.
7 Musikhayijangaji,
uNguluvi asiibedwa.
Umuunu shina avyalile,
shisheene shina akhakungula.
8 Lino yuna ifwata uwupafu uwuvi uwa muvili,
akhafwa.
Leelo yuna ikimufwata uNumbula uMunofu,
akhapata uwuumi wa shiluta.
9 Ino tisikhakhatalaga kisenga amanofu.
Nda tigugumila,
tikhakungula amanofu pina uluhaavi lwafikha.
10 Lino,
luhaavi loona nda tina mwenshe,
tivagahilaje amanofu avaanu woona,
mandu avahuvililaaji vayeesu.
Amapavilo aga wudugo aga Pawulo
11 Loleeli shina niyandiishe kwa mayandikhwa amakhome.
Niyandiishe kwa liwokho lyangu yuune.
12 Avaanu vina vikivakhamiilisa omwe kiyinjisiwa ijando,
viigaha ndeeno kwa kiiva visakula kitiilwa na Vayahuudi.
Visakula vasilaave valafisiwe kwa kiiva ya kikhoma ulwa mola sa mfwa ya Yeesu Kilisito pa musalaaba.
13 Hata vina visakula kiiva vahuvililaaji woona vayinjisiwe ijando,
vasikisifwata indaji soona.
Visakula omwe muyinjisiwe ijando,
baheene vayisufye kwa shimanyilo isho mu mavili geenyu.
14 One nisiiva na shoshoona isha kiyisufisa,
leelo nikiyisufya yuune duguli mu musalaaba gwa Mutwa weesu uYeesu Kilisito.
Kwa kiiva ya mfwa yaakwe,
injowo soona isa nyi iyi siyasiise ulutono kunyangu,
na uwiikhasi wangu uwa pawukuulu wafwisaga lumo nu mwene pa musalaaba.
15 Kiyinjisiwa ijando awu kilekha kiyinjisiwa ijando,
kungaya nsengo yoyoona.
Ishiinu ishikhome,
kiwumbwa wupya nu Nguluvi.
16 Uwulindamafu nu lusungu kihuma kwa Nguluvi luve na vaanu vina viyinatila ishiyooli ishi,
aveene shiyooli vaanu va Nguluvi.