Vagalatiya 4

1 Ino iliswi lina nisakula kivajovela lilyene ili, umuhalaaji nda ashaanali mwana, asipungana nu muvanda, hata nda uwusi woona waakwe. 2 Uluhaavi ulo loona iiva pansi ya vayangalilaaji na vayimililaaji, mbakha uluhaavi luna lufwaya kwa wiihe. 3 Na yuuse shiisho ndeeno, uluhaavi luna uKilisito ashaanali kiyinsa, tikhandi ngaja vaana, tikhandi vavanda va ngʼoma sa vaanu. 4 Leelo uluhaavi luna lufwaya lwafikha, uNguluvi wámufilikha mu nyi uLusawo lwakwe. ULusawo uyu wásawaagwa wáava muunu ngaja ose, wáava pansi ya ndaji ya Musa. 5 Wáfilikhwagwa atukuluse ose vina tikhandi vavanda va ndaji sa Musa. Wágahaga ndeeno, baheene ose woona tive vaana va Nguluvi.

6 Kiiva ose tili vaana va Nguluvi, uNguluvi amufiliishe uNumbula wa Mwanaakwe mu numbula seesu. UNumbula uyo ikitugaha timushemeele uNguluvi kiija, “Aba” uluganulo lwakwe, “Daada.” 7 Lino omwe musili vavanda khanji, ila muli vaana va Nguluvi. Nda muli vaana, lino omwe mukhaposheela fyona ifya wuhaasi fina uNguluvi avavishiile avanaakwe.

UPawulo ikivalavila aVagalatiya

8 Pawukuulu musikhandi mumumeenye uNguluvi, mukhandi vavanda va fiinu fina fisili Nguluvi. 9 Leelo uluhaavi ulu, mumumeenye uNguluvi, awu nijove, mumanyikha nu Nguluvi. Lino mukwiliile wuli kiwuyiila mu ngʼoma sa vaanu, sina sisikwiliile kitukulusa! Wuli, mwisakula kiiva vavanda khanji? 10 Mushaanali mupikheete insiku simonga, ameesi gamonga na maakha gamonga kiiva shiwungo sha kimushendeefya uNguluvi! 11 Nitungumala kiija insengo yina navalavilaga, yingava ya bule! 12 Vahuvililaaji vayangu, nikivalomba mandu kiija, muve vaanu vina vayiyesheele ngaja one, kwa kiiva lino nili ngaja omwe vina musili Vayahuudi, shina muyiyesheele kihuma mu ndaji.

Musikhanigahiile wuvi wowoona. 13 Mumeenye kiija, pashiyanso uwutamu wuna nikhandi nawo, wuweene wuna wanipeelaga uluhaavi lwa kivakhoma iMola iNofu omwe. 14 Hata nda uluhaavi lula uwuwoto wangu wukhandi lijelo kunyeenyu, hata ndeeno musikhanisalile awu kinikhaana. Leelo mwaniposheelaga ngaja kimuposheela umalayikha wa Nguluvi, awu ngaja kimuposheela uKilisito Yeesu yumwene. 15 Wuli, uwushendeefu weenyu wuna mukhandi nawo uluhaavi ulo, waaluta kwi? Nilogola ishiyooli, uluhaavi lula mukhandi tayaali kigajodola ameeho geenyu na kinipeela one. 16 Wuli, lino nili mulugu weenyu kwa kiiva ya kivajovela ishiyooli?

17 Avaanu avanji awo vijimba kiija vavalavile omwe, leelo gina visakula gasili manofu. Visakula kivabaagula omwe kunyangu, kiija muvalavile aveene. 18 Lunofu kijimba kigaha amanofu. Leelo mugahaje ndeeno luhaavi loona, hata uluhaavi luna nisili lumo noomwe. 19 Vanangu, ulu luhaavi lunji khanji kunyangu niilava kwa kiiva yeenyu, ngaja shina uwashimaayi umunya lwanda shina iilava pina iisava umwana. Niilava shiisho ndeeno, mbakha pina uwiikhasi wa Kilisito pina wukhawonekha mu wiikhasi weenyu. 20 Nidobokha kiiva lumo noomwe uluhaavi ulu, pamonga ndi nalogola noomwe kwa wuhuugu! Ndeeno, nina muninu noomwe!

Ishihwano sha Hajili nu Saala

21 Nijoveli one, omwe muna mwidobokha kiiva vavanda va ndaji sa Musa, wuli, mumeenye shiyooli shina yilogola indaji? 22 Yiyandiikhwe mu Mayandikhwa aManofu kiija, uAbulahamu akhandi ana vaana vavili. Yumonga wásavaga nu Hajili yuna akhandi washimaayi umuvanda, nu yunji wásavaga nu Saala yuna akhandi washimaayi yuna asili muvanda. 23 Umwana wa mushimaayi umuvanda yula, wásawaagwa nu Abulahamu kwa kijesa kwakwe kikwisa ulutaahiso lwa Nguluvi. Leelo umwana wa mushimaayi yuna asili muvanda, wásawaagwa kwa lugulumilo lwa Nguluvi, kikwisa ulutaahiso lwakwe. 24-25 Avashimaayi vavili awo vakwiliile kitoolwa ngaja shihwano sha mfingo sivili. UHajili iyiima ngaja lufingo lwa wutasi luna lwasenjekhaga pa shidunda sha Sinayi ku nyi ya Alabiya. Avanaakwe vakhasaviilwe ngaja vavanda mu ndaji sa Musa. Avaanu va lino ava ku Yelusalemu vali ngaja avaana va Hajili, kwa kiiva vavanda va ndaji sa Musa, ngaja uHajili umwene na vanaakwe woona. 26 Leelo uwashimaayi uyunji, uSaala, ihwananisiwa ni lijumbi lya Yelusalemu ilya kushaanya kwa Nguluvi. Uyo yu washimaayi yuna asili muvanda, khanji, uyo yu nyineesu. 27 Mu Mayandikhwa aManofu, yiyandiikhwe kiija,

“Ushendeeve owe, yuna usipapukhaga,

khoosa ishawuti owe yuna usinapataje umwana,

kwa kiiva avaana va yula yuna ali mwene duguli vinshi,

kishila avaana va yula yuna atoliilwe.”

28 Ino vahuvililaaji vayangu, omwe muli vaana va Nguluvi kwa lutaahiso lwakwe, ngaja shina akhandi ashwali uIsaaka. 29 Leelo mu nsiku sila, umwana yuna wásawaagwa nu Abulahamu kwa kijesa kikwisa ulutaahiso lwa Nguluvi, wámuletelaga amalava umwana yuna wásawaagwa kwa ngufu sa Numbula uMunofu. Shiisho ndeeno insiku isi, avavanda va ndaji, vikivalafya omwe muna musili vavanda va ndaji. 30 Leelo aMayandikhwa aManofu giijova shishi? Giijova, “Mudaga umuvanda nu mwanaakwe, kwa kiiva umwana wa muvanda asikwiliile kihaala lumo nu mwana wa yuna asili muvanda.” 31 Ino ndeeno vahuvililaaji vayangu, ose tisili vaana va muvanda, leelo tili vaana va washimaayi yuna asili muvanda.