Vagalatiya 3

Kimuhuviilila uYeesu awu kisiyinatila indaji sa Musa

1 Omwe Vagalatiya, shiyooli muli vayasu! Yu naani avahaviile? Navatavililaga bahawuvalafu kiija kwashi uYeesu Kilisito wáfwisaga pa musalaaba. 2 Gina nisakula kimanya kihuma kunyeenyu gageene aga, wuli, uNumbula uMunofu mwayanushila kwa kiiva mwayinatilaga indaji sa Musa, awu kwa kiiva mwapulisaaga na kihuviilila iMola iNofu iya Yeesu? 3 Wuli, omwe muli vayasu ngaja ndeeno? Omwe mwayansaaga uwiikhasi wupya kwa ngufu sa Numbula uMunofu, leelo uluhaavi ulu, mwisakula kiyitenekha mbakha kuwudugo kwa ngufu seenyu yuumwe. 4 Wuli, injowo soona sina sayinsaga, sikhandi sa bule? Sisikwiliile kiiva sa bule! 5 Wuli, uNguluvi avapeelile uNumbula uMunofu na kigaha amabikha mu omwe kwa kiiva mwayinatilaga indaji, awu kwa kiiva mwapulikhaga iMola iNofu iya Yeesu na kiyihuviilila?

6 Hiivaji imola ya Abulahamu. AMayandikhwa aManofu giijova, “UAbulahamu wámuhuviilila uNguluvi, ndeeno uNguluvi wámuvasa kiiva mugolofu pamwene.” 7 Ino, manyaji kiija avaanu vina vikimuhuviilila uNguluvi, vaveene vaana va shiyooli va Abulahamu. 8 AMayandikhwa aManofu gajovaga kihuma paanyuma kiija, avaanu vina vasili Vayahuudi, uNguluvi akhavavasa kiiva vagolofu kwa lihuuvi lyanave. Lino uNguluvi wátalaga kimukhoma uAbulahamu iMola iNofu kiija, “Kishilila kunyaakho, avaanu va nyi soona vakhayimiililwa.” 9 Ndeeno vala vina vikimuhuviilila uNguluvi, viyimiililwa lumo nu Abulahamu yuna wáyimililwagwa kwa kiiva wámuhuvililaga.

Kikulusiwa kihuma kiyiijilwa kwa ndaji sa Musa

10 Leelo woona vina vihuviilila kikulusiwa kwa kigaha gina gisakulwa ni ndaji sa Musa, awo vayijiilwe. Kiiva aMayandikhwa aManofu giijova, “Yoyoona yuna asiyinatila na kigaha goona gina gayandiikhwe mu Mataafili ga ndaji sa Musa, uyo iiva ayijiilwe.” 11 Shiyooli kusiina umuunu yuna ivasiwa kiiva mugolofu pa Nguluvi kwa kisiyinatila indaji, kwa kiiva aMayandikhwa aManofu giijova, “Umuunu umugolofu kwa nsila ya lihuuvi, uyo asiive nu wuumi.” 12 Indaji sa Musa sisihuviilila ilihuuvi, ila injendo sa muunu, ngaja aMayandikhwa aManofu shina giijova, “Umuunu yuna iyinatila goona gina galajisiiwe mu ndaji, akhava muumi.”

13 UKilisito wátukulusaaga kihuma mu luyiijilo lwa ndaji, kwa kilusumula uluyiijilo ulo kwa kiiva yeesu. Kiiva aMayandikhwa aManofu giijova, “Umuunu yuna akhomeleelwe pa musalaaba, ayijiilwe.” 14 Aga gasenjekhaga baheene uluyimiililo luna wápelwagwa uAbulahamu, vapeelwe avaanu vina vasili Vayahuudi woope, kwa nsila ya Kilisito Yeesu. Lino kwa kimuhuviilila uYeesu Kilisito tikwiliile kimuposheela uNumbula uMunofu, yuna uNguluvi wátahisaaga kitupeela.

Inaahiso sa Nguluvi kwa Abulahamu ni ndaji saakwe kwa Musa

15 Vahuvililaaji vayangu, leshi nivajovele ishihwano kihuma mu wiikhasi weesu. Hiivaji ulufingano ulwa vaanu vavili. Kusiina umuunu yoyoona yuna akwiliile kipyanisa awu kiyonjelesa lyolyona, shilushwali kwa liswi ngaja ili. 16 UNguluvi wátahisaaga kwa Abulahamu umbuyeesu, umwene lumo ni shisafi shaakwe. AMayandikhwa aManofu gasiijova, “Ni fisafi fyakwe,” uluganulo lwakwe vinshi, leelo giijova, “Ni shisafi shaakwe,” uluganulo lwakwe, umuunu yumo, uyo yu Kilisito. 17 Lina nisakula kilogola lilyene ili, uNguluvi wáfingaga mu maakha ga magana gana na mashumi gatatu (430) pina sishaanali kiyinsa indaji sa Musa. Ndeeno indaji iso sisikwiliile kiluwuusa ulufingo ulo, wala kiseetula gala gina wátahisaaga. 18 Nda avaanu vaali viposheela uwuhaasi waanave kihuma kwa Nguluvi kwa kisiyinatila indaji, ino uwuhaasi uwo wusaali wukwiliile khanji kihuviilila ulutaahiso lwa Nguluvi. Leelo uNguluvi kwa mota yaakwe, wámupeelaga uAbulahamu uwuhaasi wa lufingo kwa kiiva wámutahisaaga ndeeno. 19 Lino indaji saashi? Sayonjelesewaagwa mu lufingo, pina lwaganile kishila luhaavi, baheene sivawonense avaanu kiija vali mu wunansi, mbakha pina iyinsa yula yuna shisafi sha Abulahamu, yuna uNguluvi wátahisaaga. Indaji iso, uNguluvi wámupeelaga uMusa kishilila kwa vamalayikha, nayu Musa wáava paakhati naakhati ya vaanu nu Nguluvi. 20 Umuunu uwa paakhati naakhati ngaja uyo, isakulwa kiiva akwali, nda mbali sivili sifingana. Leelo uNguluvi yumwene wáfingaga kwa Abulahamu, bila kiiva nu muunu ngaja uyo.

21 Wuli, indaji sikhaanania nu lutaahiso luna uNguluvi wátahisaaga? Ndaali hata padoodo! Kiiva nda indaji yaali yive yikwiliile kivapeela avaanu uwiikhasi uwupya, apo taali tiiva tikwiliile kivasiwa kiiva vagolofu kwa kiyinatila indaji. 22 Leelo yisili ndeeno. AMayandikhwa aManofu giijova, avaanu woona vali mu wutawulilwa wa wunansi, baheene kwa nsila ya kimuhuviilila uYeesu Kilisito, tiyanushila gina wátahisaaga uNguluvi.

23 Uluhaavi lwa lihuuvi mwa Yeesu Kilisito pina lusinayinse, indaji satugahaga kiiva vavanda, tikhandi tihepeleese kigubutulilwa ilihuuvi ilyo. 24 Lino indaji iso sikhandi sikituyangalila mbakha uKilisito pina wáyinsaga, baheene tikwiliile kivasiwa kiiva vagolofu kwa lihuuvi. 25 Leelo kwa kiiva ilihuuvi lila lifishile, ose tisiyangalilwa khanji ni ndaji.

26 Kwa nsila ya lihuuvi, omwe woona muli vaana va Nguluvi, kwa kilungana nu Kilisito Yeesu. 27 Omwe woona muna mutwinisiiwe, mulunganisiiwe nu Kilisito, muli ngaja mumufwele uKilisito. 28 Ndeeno uMuyahuudi na yuna asili Muyahuudi vasili paayo, umuvanda na yuna asili muvanda, umugoosi nu mudala. Woona muli shiinu shimo, kwa kiiva mulungeene nu Kilisito Yeesu. 29 Kiiva omwe muli vaanu va Kilisito, ino muli shisafi sha Abulahamu, ndeeno mukhaposheela gala gina uNguluvi wámutahisaaga uAbulahamu.