UPawulo iikhoma iMola iNofu ya Yeesu Kilisito
2
1 Vahuvililaaji vayangu,
uluhaavi pina nikhayinsile kunyeenyu kivakhoma iliswi lya wufiho wa Nguluvi,
nisikhalogwele kwa wunofu mandu wala kwa wumanyi.
2 Pina nikhandi kunyeenyu,
nalamulaga kiija nilogole hela kiija uYeesu yu Mukulusaaji yuna uNguluvi wátahisaaga kimufilikhaa hela,
mandu kiifwa kwa mwene pa musalaaba,
bila kilogola ishiinu ishinji.
3 Uluhaavi pina nili kunyeenyu,
nikhandi muwoto,
khanji nikhandi nitiila na kitetema mandu.
4 Pina nikhandi nikivamanyisa na pina nikhandi niikhoma,
nisikhandi niijova kwa maswi ga wumanyi kiija,
nivahonse muhuviilile,
leelo mwahuvililaga kwa kiiva mwasaagaga ingufu sa Numbula uMunofu.
5 Naakhoma ilyo,
baheene musikhahuvililaji uwumanyi wa vaanu,
leelo muhuvililaje ingufu sa Nguluvi.
Uwumanyi kihuma kwa Numbula uMunofu
6 Lino aga tiijova,
uwumanyi kwa vaanu vina vakhangeele ilihuuvi.
Uwumanyi uwo wusili wa mu nyi iyi wala wa vatemaaji va mu nyi iyi,
vina uluhaavi lwanave ulwa kitema lwisila.
7 Leelo uwumanyi wuna tiijova wa Nguluvi,
wuna wukhandi wufihiilwe.
Pina ashaanali kiwumba nyi,
uNguluvi akhagulumiile kiwugubutula uwumanyi uwo,
baheene tihanje mu wutupikho waakwe.
8 Kusiina hata yumonga mu vatemaaji va nyi iyi yuna wámanyaga ilyo,
kwa kiiva,
vaali vamanyaje nda vasamukhomelelaga pa musalaaba,
uMutwa umunya wutupikho.
9 Shiisho ndeeno shina yiyandiikhwe mu Mayandikhwa aManofu,
“Gina ameeho gasinagaagaje hata gwalimo,
awu ilikutu lisinajelaje kipulikha,
gina umuunu asinajelaje kihiiva hata gwalimo,
ago gageene gina uNguluvi avavishiile vina vamugeene.”b
10 Leelo ose uNguluvi wátusonelaga ago kishilila kwa Numbula waakwe,
kwa kiiva uNumbula wa Nguluvi iseesa goona,
hata gina uNguluvi agafihile mukhati yaakwe.
11 Kusiina umuunu yuna akwiliile kimanya gina umuunu uyunji ihiiva,
leelo gimanyikha nu mwene hela.
Shilushwali,
kusiina yuna akwiliile kimanya gina uNguluvi ihiiva,
leelo gimanyikha nu Numbula wa Nguluvi hela.
12 Lino ose,
tisikhayanushiile inumbula yina yiihuma mu nyi iyi,
leelo tayanushilaga uNumbula yuna iihuma kwa Nguluvi,
baheene tigamanye gina tipeliilwe kwa mota ya Nguluvi.
13 Khanji,
tisiijova amaswi gina timanyisiiwe kwa wumanyi wa vaanu,
leelo tiijova amaswi gina timanyisiiwe nu Numbula wa Nguluvi.
Tiganula imola isa Numbula kwa vina vali nu Numbula uyo.
14 Lino umuunu yuna asiposheelile uNumbula wa Nguluvi,
asikwiliile kiposheela gina giihuma kwa Numbula wa Nguluvi.
Kunyaakwe ago ga shiyasu,
khanji asikwiliile kigamanya,
kwa kiiva umuunu ikigamanya ago kwa mutango gwa Numbula wa Nguluvi hela.
15 Leelo umuunu yuna ilongosewa nu Numbula wa Nguluvi,
uyo ikigajela goona,
leelo avaanu avanji vasikwiliile kimumanya umwene.
16 “Kusiina umuunu yuna agameenye amahiiva ga Mutwa uNguluvi,
khanji kusiina umuunu wa kimutanga amahiiva.”
c
Leelo ose vahuvililaaji va Kilisito, tina mahiiva gina giihuma kwa Kilisito.