1 Vakolinto 1

Ibalula ya wutasi iya Pawulo kwa

Vakolinto

UPawulo ikivahunjila aVakolinto

1 Ibalula iyi yihumile kunyangu one Pawulo lumo nu Sositene, umuhuvililaaji muyeesu. UNguluvi wánishemeelaga ngaja shina akhandi ageene, nive mwanandeje wa Kilisito Yeesu. 2 Tikivayandishila omwe shipuga sha vahuvililaaji va Nguluvi, muna muli ku lijumbi lya ku Kolinto. UNguluvi avabagwile muve shipuga shimo nu Kilisito Yeesu na kivashemeela muve vaanu vaakwe. UNguluvi avagahile ndeeno, lumo na vaanu woona ava mbali soona vina vikimufuunya uYeesu Kilisito, yuna Mutwa waanave khanji na yuuse Mutwa weesu.

3 Imota nu wulindamafu kihuma kwa Nguluvi uWiheesu nu Mutwa uYeesu Kilisito, five lumo noomwe.

UPawulo ikimuhonjesa uNguluvi

4 Nikimuhonjesa uNguluvi wangu wiila kwa kiiva yeenyu, kiiva avapeelile imota yaakwe kishilila kwa Kilisito Yeesu. 5 Ndeeno, kwa kilungana lumo nu Kilisito muna wusi wa fipeelwa finshi fina fili paayo paayo, mandu mu wulogolaaji weenyu nu wumanyi weenyu. 6 Ago giwonensa kiija, imola iya Yeesu Kilisito yina takhomaga kunyeenyu, ya shiyooli. 7 Lino musashepushilwagwa hata shipeelwa shimo kihuma kwa Numbula uMunofu, pina muheepile kwa lihaahi kigubutulwa bahawuvalafu kwa Mutwa weesu uYeesu Kilisito. 8 Umwene ikivajinia mbakha kuwudugo, baheene musikhapikhwagwa, ilijuva lila lina uMutwa weesu uYeesu Kilisito akhatina kivahiga avaanu. 9 UNguluvi akhagaha ago kwa kiiva umwene muyinatifu. Uyo yumwene wávashemeelaga omwe, muveesaje muhanjile nu Lusawo lwakwe, uYeesu Kilisito, uMutwa weesu.

Kibagunkhana kwa shipuga sha vahuvililaaji

10 Lino omwe vahuvililaaji vayangu, nikivalomba mandu kwa wutawulilwa wa Mutwa weesu uYeesu Kilisito, muveesaje vaanu vina mupulinkhana. Musikhabagunkhanaga, leelo muveesaje shipuga shimo kwa gina mugulumiile na gina muhiiva. 11 Vahuvililaaji vayangu, avaanu vamonga va mu nanda ya Kilowe vanijovela kiija, kunyeenyu kuna libaatu. 12 Lino, nisakula kijova kiija, shila muunu munyeenyu iijova gaakwe. Yumo iijova, “One, nili wa Pawulo.” Uyunji iijova, “One, nili wa Apolo.” Uyunji iijova, “One, nili wa Petulo.” Uyunji iijova, “One, nili wa Kilisito.” 13 Wuli, umwene uKilisito abagunkheene? Wuli, uPawulo yumwene wákhomelelwagwa pa musalaaba kwa kiiva yeenyu? Wuli, mwatwinisiwaagwa kwa litaawa lya Pawulo?

14 Nikimuhonjesa uNguluvi, kwa kiiva kunyeenyu navatwiniaga veene duguli ava Kilisipo nu Gaayo, nisikhavatwiniise avanji. 15 Lino, kusiina yuna akwiliile kijova kiija, atwinisiiwe kwa litaawa lyangu. 16 Nikumbukha lino kiija, navatwiniaga na vaanu va mu nanda ya Sitefano. Leelo nisimeenye kiija namutwiniaga umuunu uyunji, kishila avaanu awo. 17 UKilisito asikhanifiliishe kitwinia avaanu, leelo wánifilikhaga kikhoma iMola iNofu. Pina niikhoma, nisikhahuvililaga uwumanyi wangu uwa kilogola finofu, baheene nisikhayiyasaaga ingufu iya kiifwa kwa Kilisito pa musalaaba.

Uwumanyi wa Nguluvi

18 Avaanu vina vayajile viiwona kiija imola iya kiifwa uKilisito pa musalaaba ya wuyasu, leelo kunyeesu vina tikulusiiwe, imola iyo ngufu ya Nguluvi. 19 Shiisho ndeeno shina yiyandiikhwe mu Mayandikhwa aManofu kiija,

“Avaanu avanya wumanyi, nikhananga uwumanyi waanave,

avanya luhala, nikhayasa uluhala lwanave.”

20 Lino vali kwi avanya wumanyi? Vali kwi avamanyisaaji va ndaji sa Musa, na vaanu vina vameenye kilogola wunofu insiku isi? Wuli, uNguluvi asiwugahile uwumanyi wa mu nyi iyi, kiiva wuyasu? 21 UNguluvi wálamulaga kwa wumanyi waakwe kiija, avaanu vasikwiliile kimumanya umwene kwa nsila ya wumanyi waanave. Leelo uNguluvi idobokha kivakulusa vina vikimuhuviilila kwa nsila ya Mola yina tikiyikhoma. Avaanu vina vasimumeenye uNguluvi viijova, iMola iyo ya wuyasu. 22 Kiiva mu vaanu awo, aVayahuudi visakula ifimanyilo baheene vahuviilile, vina vasili Vayahuudi visakula uwumanyi. 23 Leelo ose, tiikhoma imola kiija, uMukulusaaji yuna uNguluvi wátahisaaga kimufilikha wáfwisaga pa musalaaba. IMola iyo yikivakhalasa aVayahuudi, kwa vina vasili Vayahuudi mola ya wuyasu. 24 Leelo kwa vina uNguluvi wávashemeelaga kiiva vaanu vaakwe, aVayahuudi awu vina vasili Vayahuudi, uKilisito yumwene ngufu ya Nguluvi, khanji yumwene wumanyi wa Nguluvi. 25 Amaswi gina vikigaaga avaanu kiija wuyasu wa Nguluvi, gashilile uwumanyi wa vaanu, na gina vikigaaga kiija wuwoto wa Nguluvi, gashilile ingufu sa vaanu.

26 Lino vahuvililaaji vayangu, mukumbukhaje shina mukhandi mushwali uluhaavi pina mwishemeelwa nu Nguluvi. Vinshi munyeenyu vakhandi viwonekha pa vaanu ngaja vangaya wumanyi. Khanji vinshi musikhandi na mataawa makhome, hata kisawa mu nanda isa vatiilwa. 27 Leelo uNguluvi wávabagulaga vina viwonekha pa vaanu vayasu, baheene avayegule avanya wumanyi. UNguluvi wávabagulaga vina viwonekha pa vaanu vawoto, baheene avayegule avanya ngufu. 28 UNguluvi wávabagulaga mu nyi avaanu vina vasisaviilwe mu nanda sa vatiilwa, vina vasaliilwe, vina viwonekha ngaja vasili vaanu, baheene awonense kiija, avaanu vina viwonekha vatiilwa mandu, vangaya lutono. 29 Wágahaga ilyo kiija, umuunu yoyoona asikhayisufyaga pa Nguluvi. 30 UNguluvi yumwene wávalunganiaga nu Kilisito Yeesu. Umwene amugahile uKilisito Yeesu wumanyi weesu. Lulwene kiija kwa nsila ya Mutwa uYeesu, uNguluvi atugahile kiiva vagolofu pamwene, atugahile kiiva vaakwe, khanji atukulwise. 31 Lino, shiisho ndeeno shina yiyandiikhwe mu Mayandikhwa aManofu, “Umuunu yoyoona yuna isakula kiyisufya mu lujowo loloona, ayisufyaje kwa kiiva ya Mutwa.”