Uwudehi uwa Ananiya nu Safila
5
1 Akhandi akwali umuunu yumonga,
ilitaawa lyakwe itambulwagwa Ananiya.
UAnaniya nu mudala waakwe uSafila,
woope vaagusa umugunda gwanave.
2 Ihela sina vapataga mu mugunda gula,
uAnaniya wásheepula isinji,
wáafiha.
Umudala waakwe woope wámanyaga.
Ihela sina sasigalaga,
uAnaniya wátwala kwa vanandeje va Yeesu.
3 Leelo uPetulo wámujovela wáaja,
“Ananiya!
Kwashi wamulekha uShetaania wáyinjila mu numbula yaakho?
Mbakha walogola uwudehi kwa Numbula uMunofu.
Wasifiha ihela isinji sina waposheela mu mugunda gwakho.
4 Pina ushaanali usinaaguse,
gukhandi mugunda gwakho!
Khanji waganile kigugusa,
ihela iso sina waposheelaga ukhandi ukwiliile kilamula kisenjela shoshoona shina wisakula owe!
Lino!
Kwashi walamula kigaha amaswi ngaja aga?
Usilogwele wudehi hela ku vaanu,
leelo walogola wudehi na kwa Nguluvi!”
5 UAnaniya wáganile kipulikha amaswi ago aga Petulo,
baaho wáagwa pansi,
wáafwa.
Woona vina vapulikhaga imola iso,
vatungumeele mandu.
6 Baheene vayinsa avajeleelo,
vagubishila umufimba gwakwe nu mwenda ugwa kisiilila,
vaguhumya kunja,
vagusiila.
7 Gaganile kishila ngaja masala gatatu ndeeni,
umudala wa Ananiya woope wáhuluta mu nanda yila,
asikhameenye gina gasenjekhaga.
8 UPetulo wámuposa wáaja,
“Nijovela,
ihela sina mwagusa umugunda gwenyu,
wuli,
siseene isi seene?”
Wámugomosesa wáaja,
“Shiyooli,
siseene iso!”
9 UPetulo wámujovela wáaja,
“Kwashi mwajovana nu mugoosi waakho kimujela uNumbula uMunofu wa Mutwa uNguluvi?
Puliisa!
Avajeleelo vina vamusiila umugoosi waakho,
awo vali panja pa mulyango apo,
vasigutwale umufimba gwakho kunja vagusiile.”
10 Baaho,
uSafila woope wáagwa pa magulu ga Petulo,
wáafwa.
Avajeleelo vala vaganile kihuluta,
vamwaga uSafila woope afwile.
Vaguhumya kunja umufimba gwakwe,
vagusiila palubali pa mugoosi waakwe.
11 Ishipuga sha vahuvililaaji vatungumala mandu,
lumo na vanji woona vina vapulikhaga ago.
Avanandeje viigaha amabikha minshi
12 Kwa ngufu sa Nguluvi,
avanandeje vakhandi viigaha amiitu na mabikha minshi mu vaanu.
Avahuvililaaji woona vakhandi vikungaana kwa lugulumilo lumo mu lukeeke lwa nanda imbaagule,
mu Nsila yina niime iya Selemaani.
13 Avaanu vina vasikhamuhuviliile uYeesu vakhandi vikivasufya mandu avahuvililaaji.
Leelo,
kusiina yuna wájelaga kilongosania nawo kwa kiiva ya kitiila.
14 Hata ndeeno,
avagoosi na vashimaayi vinshi,
vayansaaga kimuhuviilila uMutwa uYeesu na kiyonjelela mandu mu vahuvililaaji vala.
15 Kwa kiiva ya mabikha ago,
avaanu vakhandi vikivaviikha avatamu mu nsila mu wusaga,
na mu mashekha,
kiija uPetulo pina iishila,
umusinsi gwakwe guvafishile avamonga vapone.
16 Avaanu vinshi vahumile mu majumbi ga mulubali,
vakhandi vikungaana kwa winshi apo pa Yelusalemu.
Vakhandi vikivaleeta avatamu na vala vina amalungu gavakhataga,
woona vakhandi viponisiwa.
Avanandeje va Yeesu vilafisiwa
17 Baheene umutambule umukhome lumo na vayine woona va shipuga sha Vasadukaayo,
ijiila yavakhata mandu kwa kiiva ya vanandeje.
18 Vavakhata avanandeje,
vavadindila mu shifungo.
19 Leelo paashilo umalayikhab wa Mutwa uNguluvi wáyinsa,
wádindula amalyango ga shifungo,
wávalongosa kiluta kunja.
Wávajovela wáaja,
20 “Lutaji muyiime mu lukeeke lwa nanda imbaagule iya kifuunyila,
kivakhoma avaanu amaswi goona aga wuumi wa shiluta.”
21 Baheene avanandeje awo vayilaava ulwamilaawu mandu mu lukeeke lwa nanda imbaagule iya kifuunyila,
ngaja umalayikha wa Mutwa uNguluvi shina wávajovelaga,
vayansa kivamanyisa avaanu mula.
Kwa luhaavi ulo,
umutambule umukhome,
lumo na vayine vaafikha,
vavakungaania avakhome woona va livansa lya Vayahuudi.
Vafilikha avayangalilaaji ku shifungo kiija,
vavaleete avanandeje vala.
22 Leelo avasulukhali vaganile kiyinjila mu shifungo,
vasikhavaajile avanandeje mula.
Vaawuya kwa vakhome,
vavajovela vaaja,
23 “Taagana kifikha ku shifungo kula,
tagaaga amalyango madinde hela,
avayangalilaaji vayiimile palubali viyangalila.
Leelo taagana kidindula amalyango,
tisamwaga muunu yoyoona mula!”
24 Umukhome wa vayangalilaaji lumo na vatambule avakhome,
vaganile kipulikha ago,
vasugumilwagwa mandu,
vaposania vaaja,
“Lino,
injowo isi hambi siiva shihwana wuli?”
25 Apo wáyinsile umuunu yumonga,
wávajovela wáaja,
“Puliisi!
Avaanu vala vina mwavadindilaga mu shifungo,
vavala khanji vayiimile mu lukeeke lwa nanda imbaagule iya kifuunyila,
vimanyisa avaanu.”
26 Baheene umukhome wa vasulukhali,
lumo na vasulukhali vaakwe vala,
vaaluta kivaleeta avanandeje vala.
Leelo vavatwalaga avanandeje vasikhawuyile vavabunshe,
kiiva vavatiilaga avaanu vasivahude na mangʼanga.
27 Vaganile kivafisa avanandeje,
vavayimyaga pa livansa,
umutambule umukhome yula wáyansa kivajovela wáaja,
28 “Omwe tavalajisaaga kiija,
musikhavamanyisaaji avaanu kwa wutawulilwa wa litaawa lya Yeesu!
Leelo omwe mupiiluta kiyalaalisa amamanyiso geenyu mu lijumbi ili lyona ilya Yelusalemu.
Mwisakula kitupiikha ose kwa mfwa ya muunu uyo!”
29 UPetulo na vanandeje vayine vamugomosesa vaaja,
“Tisakulwa kimutiila uNguluvi,
kulikho avaanu!
30 Hata nda mwamubudaga uYeesu kwa nsila ya kimukhomeelela pa musalaaba,
leelo uNguluvi wa vambuyeesu,
wámufyusaaga.
31 UNguluvi wámutupikhaga uyo kwa kimuviikha ulubali lwakwe ulwa kundiilo,
kiija ateme na kiiva Mukulusaaji,
baheene avapeele aVaisilaheli woona insila ya kilambiisila uwunansi waanave na kisaajilwa.
32 Ose tili valunjikhaaji va ago goona,
woope uNumbula uMunofu,
yuna uNguluvi avapeelile vina vikimuyinatila.”
33 Avakhome vala vaganile kipulikha ago,
vakhalalaga mandu,
vakhandi visakula kiija,
vavabude.
34 Leelo pa livansa pala pakhandi nu Mufalisaayoc yumonga,
ilitaawa lyakwe itambulwagwa Gamaliyeli.
Uyo akhandi mumanyisaaji wa ndaji sa Musa,
yuna avaanu woona vakhandi vikimutiila.
Wáyiima pa livansa lila wálajisa kiija,
vavapoose kunja avanandeje kwa luhaavi lufupi.
35 Baheene wávajovela avakhome vayine vala wáaja,
“Omwe vagoosi va muno mu Isilaheli,
ili lina musakula kiligaha kwa vaanu ava,
muhiivaje wunofu.
36 Mukumbukhaje uluhaavi luna lwashilaga,
wáyinsile umuunu yumonga yuna wátambulwagwa Tewuda,
yuna akhandi ikiyihala kiija umwene muunu mukhome.
Uyo akhandi isakula kiyigoma inyi,
avaanu vina vamufwataga vakhandi ngaja magana gana (400) ndeeni.
Leelo kuwudugo vamubuda,
vala woona vina vakhandi vikimufwata,
vapalankhanaga.
Insengo yaakwe yoona yasililaga baaho.
37 Khanji kuunyuma,
uluhaavi lula luna iselekhaali yavasaaga avaanu,
wáyinsa uMugalilaya yumonga,
ilitaawa lyakwe vamutambulaga Yuuda.
Woope wávajanjilisaaga avaanu vamufwataje,
baheene avalongosaaje pina iigoma inyi.
Leelo woope vamubudaga,
vala woona vina vakhandi vikimufwata,
woope vapalankhanaga.
38 Lino nikivajovela kiija,
musikhavagahaji shiinu shoshoona avaanu ava!
Muvaleshe valutaje!
Nda amahiiva ni nsengo saanave sina viigaha siihuma ku vaanu,
sikhasila seene.
39 Leelo nda siihuma kwa Nguluvi,
musikwiliile kivasivila,
kwa kiiva musiive mwilwa nu Nguluvi yumwene.”
40 Iliswi lila lya Gamaliyeli valiyiitikha.
Baheene vavashemeela avanandeje vala,
valajisa kiija shiyooli vatowe.
Vavalajisa kiija,
vasikhamanyisaaga kwa wutawulilwa wa litaawa lya Yeesu.
Vavatawula kiija,
vawuye kunyaanave.
41 Avanandeje vala vawuukha mu livansa lya Vayahuudi kuno vashendeevile,
kwa kiiva uNguluvi wávaagaga kiija,
vifwaya kisalwa kwa kiiva ya litaawa lya Yeesu.
42 Nsiku soona vasikhaleshile kimanyisa na kikhoma iMola iNofu mu lukeeke lwa nanda imbaagule iya kifuunyila na mu nanda sa vaanu,
kiija uYeesu yu Mukulusaaji yuna uNguluvi wátahisaaga kimufilikha.d