Shiyanso 32

1 UYaakobo wáava apishuula, baheene wátangaana na vamalayikha va Nguluvi. 2 Wáganaga kivaaga wáaja, “Ava vasulukhali va Nguluvi!” Baheene uluvala ulo wálutambulila Mahanayimu.^a

UYaakobo ikiyipinyanga kitangaana nu Esawu

3 Apo, uYaakobo wávafilikha avanandeje valongole kiluta ku Seyili mu nyi ya Edomu kwa muvaha waakwe uEsawu. 4 Wávalajisa ndeeni, “Mujovelaji umutwa wangu uEsawu kiija, ‘Umuvanda waakho uYaakobo wáajova ndeeni, nikheele ku wuhensa kwa Labani nsiku nyinshi mbakha iminsiyaano. 5 Nina ngʼombe, dogovi, mene ni nkholo, avavanda va shidala na va shigoosi. Lino nafilikha imola iyi kunyaakho owe mutwa wangu, baheene niyiitikhwe noowe.’” 6 Avanandeje vala vaganile kiwuya kwa Yaakobo vamujovela, “Taafikha kwa muvaha waakho uEsawu, woope ali mu nsila ayinsile na vagoosi magana gana (400) kiija atangaane noowe!” 7 UYaakobo wáganile kipulikha ndeeno wátiila, wátungumala mandu. Baaho, avaanu vina akhandi na woope wábaagula pavili, inkholo, imene, ingʼombe ni ngamiya. 8 UYaakobo akhandi ihiiva kiija, “UEsawu nda iyinsa kiniyalushila ku shipuga shimo, ishipuga ishinji shikwiliile kikulukha.”

9 Baheene uYaakobo wámufuunya uNguluvi wáaja, “Wee Nguluvi wa mbuya uAbulahamu, uli Nguluvi wa daada wangu uIsaaka, yuna wánijovelaga one kiija, ‘Wuya kunyeenyu kwa valukholo lwakho, one nisikuyimiilile.’ 10 One ni muvanda waakho nisikwiliile kigahilwa hata padoodo, uwunofu uwu wuna wanigahila. Nalowokhaga umukhoga gwa Yolodani nu lukwegu hela, leelo lino ninafyo fipuga fivili. 11 Nikikulomba unikuluse kiyalushilwa nu muvaha wangu uEsawu, kiiva nitiila kiija, umwene hambi iyinsa kiniyalushila, na kitubuda lumo na vashimaayi na vanangu. 12 Leelo, mbona wanijovelaga, ‘Shiyooli nisikugahile wunofu na ishisafi shaakho shisiyooloshe ngaja luhankha lwa mu bahali, luna lusikwiliile kivasiwa.’”^b

13 Ishilo isho, uYaakobo wáagona baaho. Wáagava uwusi waakwe kiija, amupeele ulutono umuvaha waakwe uEsawu. 14 Wásitoola imene itogota magana gavili (200), imene ipongo mashumi gavili, inkholo itogota magana gavili (200), inkholo iduuvi mashumi gavili. 15 Wásitoola ingamiya sina siyonsa mashumi gatatu ni nyanaave, ingʼombe indama mashumi gana, igida ishumi, idogovi imbalusi mashumi gavili ni dogovi inkholowa ishumi. 16 UYaakobo wávapeela avasenga nsengo vaakwe awo ifidiimwa, shila shipuga shahwagwa sheene duguli. Baheene wávajovela, “Longoli, leelo muleshelanaje imwenshe kihuma shipuga shimo mbakha ishipuga ishinji.” 17 Wámulajisa umuvanda yuna akhandi alongwele wámujovela wáaja, “Pina usitangaane nu muvaha wangu uEsawu asikupose, ‘Wiiluta kwi? Uli muvanda wa naani? Ifidiimwa fyona ifi fina ulongwese fya naani?’ 18 Owe mujovelaga ndeeni, ‘Ifidiimwa ifi fya muvanda waakho uYaakobo, akuleteele ulutono owe Esawu yuna uli mutwa waakwe. Woope ali kunyuma ayinsile.’” 19 Khanji wámulajisa uwa shipuga sha wuvili ni sha wutatu ni fipuga fyona fina akhandi alongoseenie nafyo wáajova, “Omwe woona mujovelaji uEsawu shiisho pina hambi mwitangaana nawo. 20 Musikhasamwaji kimujovela kiija, ‘Umuvanda waakho uYaakobo ali kunyuma ayinsile.’” UYaakobo akhandi ihiiva kiija, “Ifiinu fya lutono fina nalongosa asifiyanushile na fisivatamye inumbula ya muvaha wangu, baheene tisitangaane lumo.” 21 Ndeeno uYaakobo wávalongosa avasenga nsengo vaakwe nu lutono lwa Esawu. Leelo ishilo shila, umwene wásigala ku litinga.

UYaakobo imenana nu Nguluvi

22 Ishilo shishila uYaakobo wálamukha, wávatoola avadala vaakwe vavili, avavanda vaakwe ava shihinja vavili, uSilipa nu Biliha na vanaakwe ishumi na yumo. Baheene wávalowosa pa lilowokho lya mukhoga gwa Yaboki. 23 Ndeeno wávalowosa avaanu woona vina akhandi nawo nu wusi woona wuna akhandi anawo. 24 Leelo, uYaakobo wásigala mwene duguli ku litinga.

Lino, umuunu yumonga wáyinsa kiilwa nawo kwa lupaso mbakha pina kuhenga kunena. 25 Wáganile kiwona kiija asikwiliile kimumena uYaakobo, baheene wámutova uYaakobo pa shinyungʼunyu. Apo ishinyungʼunyu sha Yaakobo shategukha pina akhandi imenana nu muunu yula. 26 Baheene umuunu uyo wámujovela uYaakobo wáaja, “Nileshela, niwuushe kwa kiiva kuhenga kunena.” Leelo, uYaakobo wámujovela, “Nisikikuleshela ngʼo, mbakha uniyimiilile!” 27 Umuunu yula wámuposa uYaakobo, “Ilitaawa lyakho yuuwe naani?” Woope wámujovela, “Yuune Yaakobo.” 28 Umuunu yula wámujovela, “Ilitaawa lyakho usikhashemeelwa Yaakobo khanji, leelo ilitaawa lyakho ukhava wishemeelwa Isilaheli,^c kwa kiiva waalwa nu Nguluvi na vaanu, na yuuwe wáamena.” 29 Baheene uYaakobo wámuposa wáaja, “Nilomba, unijovele ilitaawa lyakho.” Leelo, umuunu yula wámujovela, “Kwashi ukiniposa ilitaawa lyangu?” Baheene wámuyimiilila uYaakobo.

30 Baheene uYaakobo wáaja, “Namwaga uNguluvi kwa meeho leelo nisifwile.” Kwa kiiva ya ilyo, uluvala ulo wálushemeela Penuweli.^d

31 Ilijuva likhandi lidibula pina uYaakobo akhandi ilowokha ulukwawo pala pa Penuweli, leelo wáali idudiila kwa kiiva ishinyungʼunyu shikhandi shitegwishe. 32 Lulwene, mbakha iminsiyaano aVaisilaheli vasiilya ulukhole lwa shinyungʼunyu sha nyama, kwa kiiva uNguluvi wámutegulaga uYaakobo ishinyungʼunyu.