Shiyanso 31

UYaakobo ikimusiga uLabani

1 Lino, uYaakobo wápulikha kiija, avaana va Labani vingʼuula viija, “UYaakobo wátoola shila shiinu isha wiheesu. Wáapata uwusi woona uwu, kihuma kwa wiheesu.” 2 Khanji uYaakobo wáawona kiija, uLabani asikimutuna wunofu ngaja ulwamwandi.

3 Baheene uMutwa uNguluvi wámujovela uYaakobo wáaja, “Tina ku nyi ya vambuyo na valukholo lwakho, baheene nikhava lumo noowe.”

4 Ndeeno uYaakobo wávashemeela uLaheli nu Leya valute ku luvala luna akhandi adimiile ifidiimwa fyakwe. 5 Baheene wávajovela wáaja, “Naawona kiija, uwiheenyu asikinituna one, ngaja shina akhandi ikinituna ulwamwandi, leelo uNguluvi wa wiheesu ali lumo noone. 6 Omwe mumeenye kiija, namusenjela insengo uwiheenyu kwa ngufu sangu soona. 7 Hata ndeeno uwiheenyu wánijangaga, wáseetula amahombo gangu mala ishumi. Leelo, uNguluvi asikhamutawiile kinitesa. 8 Uwiheenyu pina akhandi iijova kiija, ‘Ifidiimwa ifinya madeeha matiitu, fisiive mahombo gaakho,’ baaho ifidiimwa fyona fyasava inyaana inya madeeha amatiitu. Wáganaga kinijovela kiija, ‘Ifidiimwa ifisheeto fifyene fisiive mahombo gaakho,’ baaho, ifidiimwa fyona fyasava inyaana nsheeto. 9 Shiisho ndeeno shina uNguluvi wámupokhaga uwiheenyu ifidiimwa, baheene wánipeela one.

10 “Uluhaavi lwa kishimbilana ifidiimwa, nikhaweene mu malooto ipongo insheeto, inya madeeha ni nya nondwe nondwe sishimbila itogota. 11 Mu malooto umo, uMalayikha wa Nguluvi wánijovela wáaja, ‘Yaakobo!’ Na yuune nayiitikha naaja, ‘Mwene, one nili panu!’ 12 Baheene wánijovela wáaja, ‘Loleela, imene ipongo soona sina sishimbila imene itogota insheeto, ni nya madeeha amatiitu, ni nya nondwe nondwe, kwa kiiva nagaaga goona gina uLabani wákugahila. 13 One yuune Nguluvi yuna nakutwiwushilaga ku Beteeli^a pa luvala luna walikunulilaga amafuta ilingʼanga lya luuju nu luvala luna wayiyiigaga kunyangu. Lino, wuukha uyileshe inyi iyi, uwuye ku nyi yeenyu.’”

14 Baheene uLaheli nu Leya vamugomosesa uYaakobo vaajova, “Ose tisiina khanji uwuhaasi wowoona kihuma kwa wiheesu. 15 Shiyooli umwene ikituloleela ose ngaja vayinsano, kwa kiiva wátugusaaga na kiilya uwusi woona wuna wáhombwagwa. 16 Shiyooli, uwusi woona wuna uNguluvi wámupokhaga uwiheesu, uwo wusi weesu na vaneesu. Lino gahaga ngaja shina uNguluvi wákujovela.”

17 Baheene uYaakobo wáyipinya, wávayangasa avanaakwe na vadala vaakwe pashaanya pa ngamiya. 18 Wáhwaga ifidiimwa fyakwe fyona, wásumula ifiinu fyakwe fyona fina wákwavaga mu nyi ya Padani-Alaamu. Wáyansa ulushuulo ulwa kiwuya ku nyi ya Kanaani kwa wiihe uIsaaka.

19 Uluhaavi ulo uLabani akhandi alutile kisheena uwaaji inkholo saakwe. Ndeeno uLaheli wápataga imwenshe ya kihiija isanaamu sa manguluvi ga wiihe. 20 Baheene uYaakobo wámujanga uLabani uMwalaamu, wáwuukha bila kimujovela. 21 Isho shisheene shina uYaakobo wátulaga nyangu nu wusi waakwe woona. Wálowokha umukhoga ugwa Efulaati, wáaluta ku fidunda fya nyi ya Gileyadi.

ULabani ikimufwata uYaakobo

22 Saganile kishila nsiku sitatu, uLabani wájovelwa kiija uYaakobo wáatula. 23 Baheene, wávatoola avalukholo lwakwe kiija vamufwate. Pina vamufwataga kwa nsiku fungati, vamwaga ku fidunda fya nyi ya Gileyadi. 24 Leelo, ishilo shila pina uLabani asinamwaje uYaakobo, uNguluvi wámulutila kwa malooto uLabani uMwalaamu wámujovela wáaja, “Yangalilaga wunofu! Usikhamukhalipilaga uYaakobo!”

25 ULabani wámwaga uYaakobo asenjile ilitinga lyakwe mu fidunda fya Gileyadi, woope wásenga ilitinga na valukholo lwakwe nkholeela nu Yaakobo. 26 Baheene uLabani wámujovela uYaakobo, “Kwashi wanitula ndeeni? Wanijanga, wavatoola avaali vangu ngaja vaanu vina vatoliilwe ku wulugu. 27 Kwashi wanitulaga usikhanihwesiise, khanji wanijangaga? Waali unijovelaje, nda nisakuhwesaaga kwa filuulu, injeyemo, ingadule ni malimba? 28 Kwashi usikhanileshile nivanoonele avanangu na vasukulu vangu? Shiyooli waagaha shiyasu! 29 Nikwiliile kivagaha shiinu shoshoona ishivi. Leelo, uNguluvi wa wiiho wániyinsila ishilo sha minsiyaano wánijovela wáaja, ‘Yangalilaga wunofu usikhajelaga kimujovela uYaakobo iliswi lyolyona lila, live linofu awu livi.’ 30 Nimeenye kiija, una lihaahi mandu ilya kiwuya kwa wiiho. Kwashi wahiija isanaamu isa manguluvi gangu?”

31 UYaakobo wámujovela wáaja, “Nawuukhaga kwa kitula, kwa kiiva nikhandi nitiila. Nahiivaga kiija, hambi ukinipokha avaaliwo. 32 Leelo, nda usimwaje umuunu yoyoona yuna ana sanaamu saakho, abudwe! Valekha avalukholo lwesu ava, vave valunjikhaaji, sakulaga nda usishaaje ishiinu shaakho shoshoona mu fiinu fyangu. Nda usishaaje, shitoolaga.” Uluhaavi ulo, uYaakobo akhandi asimeenye kiija, uLaheli wáhiijaga isanaamu sa Labani.

33 Baheene uLabani wáhuluta mu litinga lya Yaakobo, mwa Leya na mu matinga ga Biliha nu Silipa avavanda vaanave, leelo asikhashaajile shiinu. Kihuma mu litinga lya Leya, baheene wáhuluta mu litinga lya Laheli. 34 ULaheli akhandi atoolile isanaamu sila wásifiha mu figonelo fya ngamiya, baheene wákhalila pashaanya. ULabani wásisakula mu litinga lyona, leelo asikhasaajile. 35 Woope uLaheli wámujovela uwiihe, “Wiheesu, nilomba usikhakhalalaga, nisikwiliile kiyiima panyaakho kwa kiiva naatamwa uwutamu wa vashimaayi.” Lino, uLabani wásakulaga isanaamu isa manguluvi gaakwe, leelo asikhasaajile.

36 Baheene, uYaakobo wákhalala mandu, wámudalishila uLabani wáajova, “Uwunansi wangu wuli kwi? Nananga shishi mbakha wanifwata ndeeni? 37 Waseveta mandu inkhonkholo sangu soona, shiinu shishi shina washaaga shaakho? Wonensa panu pa valukholo lwangu na valukholo lwakho, kiija vatuhije one noowe!

38 “Maakha mashumi gavili aga, nikheele kunyaakho, inkholo saakho ni mene saakho sikhandi sisihopola, nisinaliisaje hata nkholo iduuvi yaakho. 39 Ishidiimwa nda shikhandi shikhatiilwe ni nkhanu sa mu lihakha, nikhandi nihomba yuune. Ukhandi ukinihomfya kwa shoshoona shina shikhandi shihijiilwe ishiminsi awu ishilo! 40 Uwu wukhandi wiikhasi wangu, ishiminsi ilijuva lyanikholelaga na paashilo imepo yanipinyaga yikhandi yiitisa utulo. 41 Kwa maakha mashumi gavili naakhala kunyaakho, maakha ishumi na gana nakusenjelaga kwa kiiva ya vaali vaakho vavili na maakha mutanda aga kigula ifidiimwa kihuma kunyaakho. Khanji wasetulaga amahombo gangu mala ishumi! 42 UNguluvi wa mbuya wangu uAbulahamu, uNguluvi yuna wátilwagwa nu Daada wangu uIsaaka, nda asikhandi noone, shiyooli ndi wanilekhaga niwuye kunyeesu nigaya shiinu! Leelo, uNguluvi wágaaga amalava gangu ni nsengo yangu yina nasengaga na mawokho gangu, na wákukhajila ishilo sha minsiyaano.”

UYaakobo nu Labani vifingana

43 ULabani wámugomosesa uYaakobo, “ULeya nu Laheli vanangu na vaana vaanave, woope vangu. Nashi shipuga shoona shina ukishaaga, shangu! Leelo, nikwiliile kigaha shishi lino kwa vaali vangu na vaana vaanave vina vanawo? 44 Lino, tifingane one noowe kiwonensa kiija, tapulinkhana.”

45 Ndeeno, uYaakobo wátoola ilingʼanga, wáliyiimya ngaja nsimbili ya luuju. 46 Wávajovela avalukholo lwakwe kiija, vakungaanie amangʼanga mbakha gave lilundo. Apo baheene uYaakobo nu Labani vaalya ishakiilya sha lufingo kulubali lwa shilundo isho. 47 ULabani wáshitambulila ishilundo isho, Yegali-Sahaduta,^b leelo uYaakobo wáshitambulila Galeedi.^c

48 ULabani wáaja, “Ishilundo ishi shive luuju lwa lufingano lwesu.” Lulwene uluvala ulu lutambulwa Galeedi. 49 Khanji uluvala ulu lukhandi lutambulwa Misipa,^d kwa kiiva uLabani wájovile, “UMutwa uNguluvi atuyangalile uluhaavi luna tisiive kutali, tisitangaana. 50 Nda uvalafye avaali vangu, awu utoole avadala avanji, hata one nda nive nisimeenye, leelo uNguluvi wáava mulunjikhaaji weesu!”

51 Khanji uLabani wámujovela uYaakobo, “Loleela ishilundo ishi isha mangʼanga, apa papeene pina insimbili yina niyiyimiishe kwa kiiva yangu noowe. 52 Ishilundo ishi shive shilunjikho ni nsimbili iyi yive lulunjikho, kiija nisikhalowokha ishilundo ishi kiyinsa ulubali lwakho kikuyalushila, na yuuwe kiija, usikhalowokhaga ishilundo ishi ni nsimbili iyi kiyinsa ulubali lwangu kiniyalushila. 53 UNguluvi wa Abulahamu, nu Nguluvi wa Naholi ave mulamulaaji weesu.”

Apo, uYaakobo wáyiyiiga kwa litaawa lya Mutwa uNguluvi yuna akhandi itiilwa nu wihaanave uIsaaka. 54 Baheene uYaakobo wáahumya ishadanda ku shidunda kula na wávayaana avalukholo lwakwe kiilya ishakiilya. Vaganile kiilya, vaakhala ku shidunda ishilo shoona. 55 Ulwamilaawu njine pina kuhenga kunena, uLabani wálamukha, wávanoonela avasukulu vaakwe na vaali vaakwe na kivayimiilila. Baheene wáwuukha iiwuya kukhaaya yaakwe.