Isooho ɨlyɨ mɨnzɨ agɨ wʉʉmi
22
Ɨpo ʉnʼtumi ahandolesya isooho ɨlyɨ mɨnzɨ agɨ wʉʉmi ʉwa wiila na wiila,
lyahali lizelu nanshi ilolwe,
lyahafumile mwi‑itengo ɨlyɨ shimwɨnɨ ɨlya Ngʉlʉbhɨ nɨ lya Mwana Ngoole.
2 Isooho ɨlyo lyahisyaga amɨnzɨ paahati yi‑idala igoosi ɨli‑ibooma ɨlyo.
Mu mbali ɨzi‑isooho ɨlyo mwahali ni‑ikwi ɨlyɨ wʉʉmi ʉwa wiila na wiila.
Ikwi ɨlyo lihwezya amantongooni agɨ waaji ishʉmi na gabhɨɨlɨ,
hwa huje shila mwezi lihwezya amantongooni heeka.
Amatʉndʉ agi‑ikwi ɨlyo mbozyo ya hubhaponie abhantu abha mu nsi.
3 Ibooma ɨlyo saga lyahayibha na hantu hohonti ɨho haguniilwe nʉ Ngʉlʉbhɨ.
Itengo ɨlyɨ shimwɨnɨ ɨlya Ngʉlʉbhɨ nɨ lya Mwana Ngoole lyahayibha mwi‑ibooma ɨlyo.
Abhabhomvi bhaakwe bhahayibha bhahumʼpuuta ʉNgʉlʉbhɨ.
4 Bhahayihushilola ɨsheeni shaakwe,
na shila muntu ahayisimbwa itaawa lya Ngʉlʉbhɨ pa sheeni shaakwe.
5 Ʉsiku saga wahayibha nantele,
abhantu saga bhahayanza ʉlukhozyo awe isanya,
pɨpo ʉMwɨnɨ ʉNgʉlʉbhɨ ahayihubhakhozezya,
bhope bhahayibha bhalongozya wiila na wiila.
6 Ʉnʼtumi ahambʉʉzya ahaga,
“Amazwi ɨga gɨ lyoli nantele ga‑asʉʉbhɨlwe.
ɄMwɨnɨ ʉNgʉlʉbhɨ ʉyo ahubhapeela abhakuwi ʉMʼpepo waakwe ʉMʼfinjile,
anʼsonteleziizye ʉnʼtumi waakwe abhalolesye abhabhomvi bhaakwe ɨgo gakhondɨɨye abhombeshe sinta akhaabhe.”
Aweele hwa Yeesu ʉKilisiti
7 ɄYeesu ayiga,
“Tejeelezyi!
Ɨhwɨnza lubhilo.
Asayiiwe ʉyo akhata amazwi agɨ shikuwi ga gali mu shitaabu ɨshi.”
8 Anɨ nɨYoohani nahagalolile na hugʉmvwe gonti ɨga.
Lwa nagʉmvwa na hugalole,
nahasugamila pitagaalila lya nʼtumi ʉyo ahandolesiizye ɨga,
huje ɨmʼpuute.
9 Leelo ʉmwene ahambʉʉzya ahaga,
“Leha!
Anɨ ɨndi mʼmomvi lwene nanshi aawe na bhamwenyu abhakuwi na bhanjɨ bhonti ɨbho bhahwɨtɨha ɨndajizyo ɨzyo zili mu shitaabu ɨshi.
Ɨshi ʉmʼpuutaje ʉNgʉlʉbhɨ mwene!”
10 Nantele ahaga,
“Ʉgandi hugafise amazwi agɨ shikuwi ga gali mu shitaabu ɨshi,
pɨpo ahabhaazyo aha‑abhombeshe ɨgo hali mu pɨɨpɨ.
11 Ʉmuntu wa‑abhomba ɨmbiibhi,
ajendelelaje abhombe ɨmbiibhi,
wa‑abhomba ʉwaavu,
ajendelelaje abhombe ʉwaavu.
Ʉmuntu wa‑abhomba ʉgolosu wope ajendelelaje abhombe ʉgolosu,
nʉ muntu ʉnʼsangalusu ajendelelaje abhe nʼsangalusu.”
12 ɄYeesu ayiga,
“Enya,
ɨhwɨnza lubhilo hunʼsombe shila muntu alɨngaane nɨ njendo zyakwe.
13 Anɨ nɨ Aalufa nantele Oomega,
hwa huje anɨ nɨ wa hwande nantele ɨndi wa hu malishilo wɨ vintu vyonti.”
14 Bhasayiiwe abhantu ɨbho bhahwisangalusya,
huje bhɨtɨshɨlwe atʉʉshe mwi‑ibooma ashilile mu malyango gaakwe,
na‑alye amantongooni agi‑ikwi ɨlyɨ wʉʉmi ʉwa wiila na wiila.
15 Leelo ʉhwo hwʉnzɨ huli abhalozi,
abheegu,
abhanyambuda,
ɨbho bhapuuta abhangʉlʉbhɨ nɨ‑ɨbho bhonti bha bhasʉngwa ilenga na huliyanje ilenga.
Ɨbho bhahayibha hwʉnzɨ yi‑ibooma nanshi ɨmbwa.
16 “Anɨ nɨYeesu ɨnsonteleziizye ʉnʼtumi waanɨ hubhasimishizye ɨnongwa ɨzi hu vibhanza.
Anɨ ɨndi mpaapo ya mwɨnɨ ʉDaudi.
Anɨ ɨndi ntondwe ɨla ɨngoosi yɨ‑ɨkhozya tee nashampwi.”
17 ɄMʼpepo ʉMʼfinjile nʉ mwegwa ʉyo wa Mwana Ngoole bhayiga,
“Ɨnzaga!”
Wope ʉyo ahwʉmvwa ayanje aje,
“Ɨnzaga!”
Wope wa‑ali nɨ nyoota na hwanze amɨnzɨ ayɨnze,
ayeeje na‑amwele lwene amɨnzɨ agɨ wʉʉmi ʉwa wiila na wiila.
Amazwi aga hu malishilo
18 Ɨhubhasunda abhantu bhonti ɨbho bhahwʉmvwa amazwi agɨ shikuwi ɨgo gali mu shitaabu ɨshi.
Nkashele ʉmuntu wowonti ayonjeezye ahantu hohonti,
ʉNgʉlʉbhɨ wope ahayihumʼmwonjeelezya amayɨmba ɨgo gasimbwilwe mu shitaabu ɨshi.
19 Ʉmuntu wowonti nkashele ayeefwe amazwi gamo agɨ shikuwi ɨgo gali mu shitaabu ɨshi,
ʉNgʉlʉbhɨ wope ahayihuweefwa ʉkhalo waakwe mwi‑ibooma ifinjile.
Nantele ʉmuntu ʉyo saga ahayilya amantongooni agi‑ikwi ɨlyɨ wʉʉmi ʉwa wiila na wiila.
Ɨnongwa ɨzi‑ibooma ɨlyo nɨ zi‑ikwi ɨlyo zisimbwilwe mu shitaabu ɨshi.
20 Ʉyo asimishizya amazwi ɨga ayiga,
“Lyoli,
ɨhwɨnza lubhilo.”
Aameni.
Ɨnzaga,
Mwɨnɨ Yeesu!
21 Ɨmpyana ya Mwɨnɨ ʉYeesu ɨbhanje peeka naamwɨ mwenti.
Aameni.