Ɨmwanya ɨmpya nɨ nsi ɨmpya
21
Ɨpo naheenya,
nahalola ɨmwanya ɨmpya nɨ nsi ɨmpya.
Ɨmwanya ɨla ɨya hwande nɨ nsi ɨya hwande zyahali zishilile,
yope ɨnsʉmbi saga yahabha nantele.
2 Ɨpo nahalola ibooma ifinjile,
ɨlyo Yelusaleemu mpya,
lihwiha afume hu mwanya hwa Ngʉlʉbhɨ.
Ibooma ɨlyo lyahali lidoniilwe nanshi ʉmwali sha‑adonwa lwa‑abhala hwa nʼnume waakwe.
3 Ɨpo nahʉmvwa izwi igoosi afume pi‑itengo ɨlyɨ shimwɨnɨ liyiga,
“Enya!
Ʉkhalo wa Ngʉlʉbhɨ wuli peeka na bhantu.
Ahayikhala peeka nabho,
bhahayibha bhantu bhaakwe,
wope ahayibha Ngʉlʉbhɨ waabho.
4 Ʉmwene ahayihubhasyʉmʉla amansozi gaabho gonti.
Ʉfwe saga wahayibha nantele,
awe ʉzugumizu,
awe alile,
awe ʉbhaavi,
pɨpo agɨ mandɨ gashilile.”
5 Ɨpo ʉNgʉlʉbhɨ wa‑ahali akhɨɨye pi‑itengo ɨlyɨ shimwɨnɨ ahaga,
“Enya ɨbhomba gonti abhe mapya.”
Nantele ahambʉʉzya ahaga,
“Simba ɨnongwa ɨzi,
pɨpo ɨnongwa ɨzi zya‑asʉʉbhɨlwe nantele zyɨ lyoli.”
6 Ahaga,
“Gabhombɨɨshe!
Anɨ nɨ Aalufa nantele Oomega,
hwa huje anɨ nɨ wa hwande nantele ɨndi wa hu malishilo.
Shila muntu wa‑ali nɨ nyoota,
ɨnza humʼpeele amɨnzɨ agɨ lwene huje amwele afume mu mbwiwi ɨyɨ mɨnzɨ agɨ wʉʉmi ʉwa wiila na wiila.
7 Ʉmuntu wowonti ʉyo ahayimena ɨnjelo,
ahayigabhilwa ɨvyo vyonti,
nanɨ nahayibha Ngʉlʉbhɨ waakwe,
wope ahayibha mwana waanɨ.
8 Leelo abhantu abhɨ lyoga,
ɨbho saga bhali nʉ lwɨtɨho,
bha bhahwibhɨɨha ʉwaavu,
abhanyambuda,
abheegu,
abhalozi,
bha bhapuuta abhangʉlʉbhɨ na bhi‑ilenga,
ɨbho bhonti ʉkhalo waabho wahayibha mu nsʉmbi ɨyɨ mwotoa ʉnʼkhali tee.
Ʉwo wahayibha fwe wa bhɨɨlɨ.”
ƗYelusaleemu ɨmpya
9 Ɨpo ʉnʼtumi ʉmo mu bhaala pʉnga (7) ɨbho bhahali nɨ mbakuuli pʉnga ɨzyɨ mayɨmba ɨgo pʉnga aga hu malishilo ahɨnza na humbʉʉzye,
“Ɨnza!
Nanɨ ɨnza hulolesye ʉmwali,
ʉnʼshɨ wa Mwana Ngoole.”
10 ɄMʼpepo ʉMʼfinjile ahaniishila,
wope ʉnʼtumi ahantwala pa mwanya pi‑igamba itali tee.
Ahandanga ibooma ifinjile ɨlyɨ Yelusaleemu ɨlyo lihwiha afume hu mwanya hwa Ngʉlʉbhɨ.
11 Ibooma ɨlyo lyahali lilawuha hu mwamu wa Ngʉlʉbhɨ.
Lyahali lilawuha nanshi iwe ɨlyɨ mpɨɨya ɨngoosi ɨli‑iyiisipi nantele nanshi ilolwe.
12 Ibooma ɨlyo lyahazyʉngʉlɨɨlwe nʉ lubhaga ʉlugoosi nantele ʉlutali,
lyahali na malyango ishʉmi na gabhɨɨlɨ.
Shila lyango gwahali gulɨndɨɨlɨlwa nʉ nʼtumi,
nantele shila lyango gwahali gusimbwilwe pa mwanya yaakwe itaawa ɨlyɨ shikholo sheeka mu vikholo viila ishʉmi na vibhɨɨlɨ ɨvya Bhaizilaeeli.
13 Ɨmbali zyonti zinɨ ɨzi‑ibooma zyahali na malyango gataatu gataatu.
14 Ʉlubhaga lwi‑ibooma ɨlyo lwahazengwilwe mu lwalo ʉlwɨ mawe ishʉmi na gabhɨɨlɨ.
Shila liwe lyahali lisimbwilwe itaawa lya muntu weeka mu bhasontwa ishʉmi na bhabhɨɨlɨ abha Mwana Ngoole.
15 Ʉnʼtumi ʉyo ahayanjile naanɨ ahali nɨ ndɨɨsa ɨyɨ zahaabu ɨya hwolele ibooma ɨlyo na malyango gaakwe nʉ lubhaga lwakwe.
16 Ɨpo ahoola ibooma ɨlyo nɨ ndɨɨsa yaakwe.
Lyahali nʉ tali,
ʉbabaale nʉ tali ʉwa‑abhale pa nsi,
ɨvyo vyonti vyahali nɨ shoolelo sheeka.
Lwa woola,
ahazyaga ɨkilomeeta ɨelufu zibhɨɨlɨ nɨ mya zinɨ.
17 Nantele ʉnʼtumi ahoola ʉvilima wɨ lubhaga ʉlwo lwahazyʉngʉʉlɨle ibooma ɨlyo.
Ʉvilima wɨ lubhaga ʉlwo wahali ɨmeeta amashʉmi nʼtanda,
alɨngaane nɨ shoolelo sha bhantu ɨsho ʉnʼtumi aholɨɨye.
18 Ʉlubhaga ʉlwo bhahazenjɨɨye amawe agɨ mpɨɨya ɨngoosi nanshi iyiisipi,
lyope ibooma bhahalizenjile hu zahaabu ɨnyinza yɨ‑ɨloleha nanshi ilolwe.
19 Ʉlwalo lwɨ lubhaga lwi‑ibooma ɨlyo lwahadoniilwe shinza hu mawe agɨ mpɨɨya ɨngoosi agɨ waaji nʉ waaji.
Iwe ɨlya hwande lyahali lishamamu,
bhahagaga iyiisipi,
iwe ɨlya bhɨɨlɨ lyahali libuluulu,
bhahagaga yaakuti,
iwe ɨlya taatu lyahali lilemba,
bhahagaga kalikeedoni,
iwe ɨlya wunɨ lyahali lilemba,
bhahagaga zumaliidi.
20 Iwe ɨlya saanu lyahali lizelu,
bhahagaga salidooniki,
iwe ɨlya nʼtanda lyahali lishamamu,
bhahagaga akiiki,
iwe ɨlya pʉnga (7) lyahali lipʉʉtɨla,
bhahagaga kilisoliiti,
iwe ɨlya naana lyahali lilemba,
bhahagaga zabalajadi.
Iwe ɨlya fundihandwɨmo (9) lyahali lipʉʉtɨla,
bhahagaga topazi,
iwe ɨli‑ishʉmi lyahali lilemba,
bhahagaga kilisopilaasi,
iwe ɨli‑ishʉmi na lyeka lyahali libuluulu,
bhahagaga hiyakinti,
ni‑iwe ɨli‑ishʉmi na gabhɨɨlɨ lyahali livuutu,
bhahagaga ametisiiti.
21 Amalyango ishʉmi na gabhɨɨlɨ agi‑ibooma ɨlyo gahalɨnganyiziiwe hu nyambo ɨzyɨ mpɨɨya ɨngoosi,
shila lyango bhahalɨngɨɨnye hu lwambo ʉlugoosi lweka.
Idala igoosi ɨli‑ibooma ɨlyo lyahalɨngɨɨnywe hu zahaabu ɨnyinza,
ɨyo yahalawuuhaga nanshi ilolwe.
22 Saga nahayilolile ɨnyumba ɨmfinjile ɨya Ngʉlʉbhɨ mwi‑ibooma ɨlyo,
pɨpo ʉMwɨnɨ ʉNgʉlʉbhɨ ʉwi‑ikhone lyonti nʉ Mwana Ngoole bha bhɨɨbho nyumba mfinjile ya Ngʉlʉbhɨ.
23 Ibooma ɨlyo saga lihwanza isanya awe ʉmwezi akhozye,
pɨpo ʉmwamu wa Ngʉlʉbhɨ wa wukhozya,
wope ʉMwana Ngoole lwʉ lukhozyo lwakwe.
24 Abhantu abhɨ nsi zyonti bhahayikhala mu lukhozyo lwi‑ibooma ɨlyo,
na bhamwɨnɨ abhɨ nsi zyonti bhahayitʉʉha ʉmwo aleete ɨvintu vyabho ɨvyɨ mpɨɨya ɨngoosi.
25 Amalyango gonti agi‑ibooma gahayibha miigule hu habhaazyo honti,
pɨpo saga wahayibha ʉsiku.
26 Abhantu abhɨ nsi zyonti bhahayileeta ɨvintu vyabho ɨvyɨ mpɨɨya ɨngoosi nʉ tabhazi waabho mwi‑ibooma ɨli.
27 Leelo nahamo ahaavu hohonti ɨho hahayitʉʉha ʉmwo mwi‑ibooma,
nantele nʉʉmo ʉmuntu ʉyo abhomba aga‑aviisye awe ayanje ilenga wa‑ahayitʉʉha ʉmwo.
Lyoli,
bhahayitʉʉha ɨbho amataawa gaabho gasimbwilwe mu shitaabu ɨshɨ wʉʉmi ɨsha Mwana Ngoole.