Idala ɨlya‑amanye ɨmanyizyo ɨzi‑ilenga nɨ zyɨ lyoli
4
Bhakʉndwe bhaanɨ,
mugandi hubhɨɨtɨshe abhantu bhonti bha bhahwiyanga huje,
bhali nʉ Mʼpepo wa Ngʉlʉbhɨ hu nongwa ya‑aje,
abhakuwi abhinji abhi‑ilenga bhafumiiye mu nsi.
Leelo musimishizyaje shinza amanye,
huje lyoli ʉmuntu alongolwa nʉ Mʼpepo wa Ngʉlʉbhɨ awe ndaadi.
2 Idala ɨlya‑amanye huje ʉmuntu alongolwa nʉ Mʼpepo wa Ngʉlʉbhɨ lya lyɨli,
wowonti wa‑ahwɨtɨha na‑ayanje huje ʉYeesu ʉKilisiti ahɨnzɨle mu nsi,
sha‑ali nʉ mʼbɨlɨ nanshi ʉmuntu,
ʉyo ya‑alongolwa nʉ Mʼpepo wa Ngʉlʉbhɨ.
3 Leelo ʉmuntu wowonti wa saga ahumʼmwɨtɨha ʉYeesu nanshi ɨsho,
saga alongolwa nʉ Mʼpepo wa Ngʉlʉbhɨ.
Ʉmuntu ʉyo alongolwa ni‑ipepo ɨlya nʼnʉgʉ wa Kilisiti.
Namwɨ,
mwʉmvwɨzye huje ipepo ɨlyo lihwɨnza,
ɨshi lyɨnzɨle mu nsi.
4 Leelo amwɨ mubhaana bhaanɨ,
amwɨ mubhantu bha Ngʉlʉbhɨ,
mubhamenile abhakuwi abhi‑ilenga ɨbho hu nongwa ya‑aje ʉMʼpepo wa Ngʉlʉbhɨ ali muuhati yeenyu.
Ʉmwene ali ni‑ikhone ashile ipepo ɨlyo lihubhalongozya abhantu bha saga bhamʼmwɨtɨɨshe ʉNgʉlʉbhɨ.
5 Abhakuwi abhi‑ilenga bhantu bha mu nsi,
sha shɨɨsho bhayanga ɨzya mu nsi.
Bhope abhantu bha saga bhahumʼmwɨtɨha ʉNgʉlʉbhɨ bhahubhatejeelezya.
6 Leelo atɨ tili bhantu bha Ngʉlʉbhɨ.
Ʉmuntu wa‑amʼmɨɨnye ʉNgʉlʉbhɨ,
ahumʼmwʉmvwa,
leelo ʉmuntu wa saga wa Ngʉlʉbhɨ,
saga ahumʼmwʉmvwa.
Ɨsho sha timanya ʉlegano wa bhantu bha bhalongolwa nʉ Mʼpepo ʉwɨ lyoli na bhaala bha bhalongolwa ni‑ipepo ɨli‑ilenga.
Ʉlugano lwa Ngʉlʉbhɨ
7 Bhakʉndwe,
tigananaje,
pɨpo ʉlugano lufuma hwa Ngʉlʉbhɨ.
Ʉmuntu wowonti wa‑ahubhagana abhamwabho,
ʉyo mwana wa Ngʉlʉbhɨ,
nantele amʼmɨɨnye ʉNgʉlʉbhɨ.
8 Leelo ʉmuntu wa saga ahubhagana abhamwabho,
saga amʼmɨɨnye ʉNgʉlʉbhɨ,
hu nongwa ya‑aje ʉNgʉlʉbhɨ yʉ lugano.
9 ɄNgʉlʉbhɨ yʉʉyo ahatilolesiizye ʉlugano lwakwe hwi‑idala ɨlya hunʼsonteelezye ʉMwana waakwe wa‑ali mwene mu nsi ʉmu,
huje tiwaaje ʉwʉʉmi ashilile hwa mwene.
10 Ʉlwu lwʉ lugano huje saga tɨɨtɨ tahanʼgɨɨne ʉNgʉlʉbhɨ,
ndaadi!
Leelo,
ʉmwene wa‑ahatigɨɨne atɨ,
hwope ahanʼsonteelezya ʉMwana waakwe abhe nsangu ɨya‑abudwe,
huje azyefwe ɨmbiibhi zyetu na hutileete mu lwʉmvwano nʉ Ngʉlʉbhɨ.
11 Bhakʉndwe bhaanɨ,
nkashele ʉNgʉlʉbhɨ atigɨɨne atɨ nanshi ɨshi,
natɨ tihwanziwa huje tigananaje.
12 Saga alɨɨho ʉmuntu wowonti wa‑anʼnolile ʉNgʉlʉbhɨ nka lumo.
Leelo nkashele tiganana,
ʉNgʉlʉbhɨ akhala mu lwʉmvwano naatɨ,
lwope ʉlugano lwakwe lumemile muuhati yeetu.
13 Timanya huje tikhala palishimo nʉ Ngʉlʉbhɨ,
wope ʉNgʉlʉbhɨ akhala palishimo naatɨ.
Timanya ɨsho pɨpo atipiiye ʉMʼpepo waakwe.
14 Atɨ tinʼnolile na hubhasimishizye abhanjɨ huje ʉDaada ʉNgʉlʉbhɨ ahanʼsonteleziizye ʉMwana waakwe mu nsi,
huje abhe Mʼfyʉli wa bhantu bhonti.
15 Ʉmuntu wowonti wa‑ahwɨtɨha na‑ayanje huje ʉYeesu Mwana wa Ngʉlʉbhɨ,
ʉNgʉlʉbhɨ akhala palishimo nawo,
wope ʉmuntu ʉyo akhala palishimo nʉ Ngʉlʉbhɨ.
16 Ɨshi,
atɨ timɨɨnye na hwɨtɨshe huje ʉNgʉlʉbhɨ atigɨɨne.
ɄNgʉlʉbhɨ yʉ lugano.
Wowonti wa‑akhala mu lugano,
akhala palishimo nʉ Ngʉlʉbhɨ.
ɄNgʉlʉbhɨ wope akhala palishimo nʉ muntu ʉyo.
17 Ɨshi hwi‑idala ɨlyo,
ʉlugano lwa Ngʉlʉbhɨ lumemile muuhati yeetu,
huje tibhe nʉ dandamazu pi‑isiku ɨlya‑alongwe.
Tahayibha nʉ dandamazu,
pɨpo ʉlemvu weetu mu nsi ʉmu wulɨngɨɨne na shiila ʉYeesu sha‑ahalembaga.
18 Pa pali nʉ lugano,
saga pali nʉ wooga.
Leelo ʉlugano ʉlwɨ lyoli luhwefwa ʉwooga wonti.
Ʉlongwe lwa luhubhabhɨɨha abhantu huje bhabhe nʉ wooga.
Ʉmuntu wowonti wa‑ali nʉ wooga,
ʉlugano lwa Ngʉlʉbhɨ saga lukwɨlɨɨne muuhati yaakwe.
19 Atɨ tinʼgɨɨne ʉNgʉlʉbhɨ na bhantu abhanjɨ hu nongwa ya‑aje ʉmwene wa‑ahatalile hutigane.
20 Nkashele ʉmuntu ayanga huje anʼgɨɨne ʉNgʉlʉbhɨ,
ʉhwu ahunʼsyonshela ʉmwoziwa ʉwamwabho,
ʉyo nʼgobezi.
Ɨnjanjile ɨsho,
pɨpo ʉmuntu wa saga ahunʼgana ʉmwoziwa ʉwamwabho wa‑abhajiiye hunʼnole na maaso,
saga abhajiiye hunʼgane ʉNgʉlʉbhɨ wa saga ahunʼnola na maaso.
21 Ɨshi,
ɨnɨ yɨ ndajizyo ya tipewiilwe nʉ Kilisiti,
huje ʉmuntu wowonti wa‑ahunʼgana ʉNgʉlʉbhɨ,
ahwanziwa aje anʼganaje nʉ mwoziwa ʉwamwabho.a