3
Ɨshi enyaaji,
ɨsho ʉDaada ʉNgʉlʉbhɨ sha‑atigɨɨne tee,
hwope tikwiziwa bhaana bhaakwe!
Nantele,
lyoli sha tilɨɨho.
Sha shɨɨsho abhantu bha saga bhahumʼmwɨtɨha ʉNgʉlʉbhɨ,
saga bhatimɨɨnye atɨ hu nongwa ya‑aje,
saga bhamʼmɨɨnye ʉNgʉlʉbhɨ.
2 Bhakʉndwe bhaanɨ,
ɨshi atɨ tili bhaana bha Ngʉlʉbhɨ,
leelo saga ɨmanyiishe pa pazelu sha tahayibha.
Lyoli timɨɨnye huje ʉKilisiti lwa‑aweela,
tahayikholana nawo,
pɨpo tahayihunʼnola sha‑alɨɨho.
3 Wowonti wa‑ali nʉ lusʉʉbhɨlo ʉlwu,
ahwisangalusya,
huje abhe nʼsangalusu nanshi ʉKilisiti sha‑ali nʼsangalusu.
4 Shila muntu wa‑abhomba ɨmbiibhi,
ashenta huzitinishe ɨndajizyo zya Ngʉlʉbhɨ.
Ɨnjanjile ɨsho,
pɨpo abhombe ɨmbiibhi hu huzishente ɨndajizyo.
5 Mumɨɨnye huje ʉKilisiti ahɨnzɨle huzyefwe ɨmbiibhi zyetu.
Nantele ʉmwene saga abhomba ɨmbiibhi dumu.
6 Ɨshi wowonti wa‑ajendeelela akhale palishimo nʉ Kilisiti,
saga ajendeelela abhombe ɨmbiibhi.
Wope wa‑alʉbhɨɨlɨla abhombe ɨmbiibhi,
saga ahuzyaganya huje ʉKilisiti weenu,
nantele saga amʼmɨɨnye.
7 Ɨshi bhaana bhaanɨ,
mugandi ahwɨtɨshe huje ʉmuntu wowonti abhateezye.
Ʉmuntu wa‑abhomba agɨ golosu,
ʉyo nʼgolosu pa maaso ga Ngʉlʉbhɨ,
nanshi ɨsho ʉKilisiti sha‑ali nʼgolosu.
8 Leelo ʉmuntu wa‑abhomba ɨmbiibhi,
ʉyo muntu wa Seetano.
Zili ɨsho,
pɨpo ʉSeetano abhomba ɨmbiibhi afume hu wandilo.
Ɨshi hu nongwa ɨnɨ,
ʉMwana wa Ngʉlʉbhɨ ahɨnzɨle mu nsi,
huzinangaanye ɨmbombo zya Seetano.
9 Shila muntu wa‑ali mwana wa Ngʉlʉbhɨ,
saga ajendeelela abhombe ɨmbiibhi,
pɨpo ʉwʉʉmi wa Ngʉlʉbhɨ wuli muuhati yaakwe.
Saga agajendeelela abhombe ɨmbiibhi,
hu nongwa ya‑aje ʉmwene mwana wa Ngʉlʉbhɨ.
10 Ɨshi leelo,
ʉmuntu wa saga abhomba ɨnyinza,
awe wa saga anʼgɨɨne ʉmwoziwa ʉwamwabho,
ʉyo saga mwana wa Ngʉlʉbhɨ.
Ɨsho sha timanya ʉlegano ʉwa bhaana bha Ngʉlʉbhɨ na bha Seetano.
Aganane
11 Ɨnongwa zya mwʉmvwɨzye afume hu wandilo lwa mwahamʼmwɨtɨhaga ʉYeesu,
zya zyɨzi,
tihwanziwa aje tigananaje.
12 Tigandi abhe nanshi ʉmuntu ʉla wa bhahagaga Kayini,
wa‑ahali wa Seetano.
ɄKayini ahamʼbudile ʉnʼdoodo waakwe.
a Yeenu ahamʼbudile?
Ahamʼbudile pɨpo ɨmbombo zyakwe zyahali mbiibhi,
leelo ɨmbombo zya nʼdoodo waakwe zyahali ngolosu.
13 Ɨshi bhooziwa bhamwetu,
mugandi aswije nkashele abhantu bha saga bhahumʼmwɨtɨha ʉNgʉlʉbhɨ bhahubhaviitilwa amwɨ.
14 Atɨ timɨɨnye huje tifyʉlɨɨlwe afume mwi‑ikhone lyɨ fwe,
na hwinjile mu wʉʉmi ʉwa wiila na wiila.
Timɨɨnye ɨsho,
pɨpo tihubhagana abhooziwa abhamwetu mu lwɨtɨho.
Ʉmuntu wa saga ahubhagana abhooziwa abhamwabho,
asɨɨle ali pa nsi yi‑ikhone lyɨ fwe.b
15 Wowonti wa‑ahumʼviitilwa ʉmwoziwa ʉwamwabho,
nʼgoji.
Namwɨ mumɨɨnye huje ʉmuntu ʉnʼgoji,
muuhati yaakwe saga wuhwɨli ʉwʉʉmi ʉwa wiila.
16 Atɨ tilumɨɨnye ʉlugano,
pɨpo ʉKilisiti ahafumiizye ʉwʉʉmi waakwe hu nongwa yeetu.
Natɨ shɨɨsho,
tihwanziwa hwope nka hufumye ʉwʉʉmi weetu hu nongwa ya bhooziwa abhamwetu.
17 Ʉmuntu wowonti wa‑ali nʼtabhazi wɨ vintu,
nkashele ahunʼnola ʉmwoziwa ʉwamwabho wa‑abhuliliilwe,
leelo saga abha nʉ mwoyo ʉgwɨ nkʉmbʉ,
agayanga wɨlɨ huje ahunʼgana ʉNgʉlʉbhɨ?
18 Bhaana bhaanɨ,
tigandi ayanje hwi‑ilomu lwene huje tibhagɨɨne abhamwetu,
leelo tibhaganaje hu lyoli hwi‑idala ɨlya hubhabhombele ɨnyinza.
19 Nkashele lyoli tihubhagana abhamwetu ɨsho,
ɨpo pa tisimishizya huje tibhɨnjɨɨlɨla ɨlyoli,
nantele natɨ tibha nʉ tengaanu pa maaso ga Ngʉlʉbhɨ.
20 Hwope nkashele tilongwa mu mooyo geetu,
tibha nʉ tengaanu,
pɨpo timɨɨnye huje ʉNgʉlʉbhɨ nʼgoosi ashile ɨnsɨɨbho zyɨ mooyo geetu,
nantele ʉmwene azimɨɨnye zyonti.
21 Bhakʉndwe bhaanɨ,
nkashele saga tilongwa mu mooyo geetu,
ɨpo pa tibha nʉ dandamazu ʉwa‑azʉmbɨɨle pitagaalila lya Ngʉlʉbhɨ.
22 Nantele tihwambɨɨlɨla lyolyonti lya tihunʼnaabha afume hwa mwene,
hu nongwa ya‑aje tihuzitiniha ɨndajizyo zyakwe na‑abhombe zya zihunʼkhondeezya.
23 Ɨndajizyo zyakwe zya zyɨzi,
timʼmwɨtɨhaje ʉMwana waakwe ʉYeesu ʉKilisiti na‑aganane nanshi sha‑ahatilajiziizye.
24 Ʉmuntu wa‑ahuzitiniha ɨndajizyo zya Ngʉlʉbhɨ,
akhala palishimo nawo.
Timanya huje ʉNgʉlʉbhɨ akhala palishimo naatɨ hwi‑idala ɨlya Mʼpepo ʉMʼfinjile wa‑ahatipiiye.