ɄKilisiti ahutipuutila hwa Ngʉlʉbhɨ
2
Bhaana bhaanɨ,
ɨhubhasimbila ɨnongwa ɨzi,
huje mugandi abhombe ɨmbiibhi.
Leelo hwope nkashele ʉmuntu abhombile ɨmbiibhi,
tili nʉ wa hutipuutile hwa Daada ʉNgʉlʉbhɨ,
ʉyo yʉ Yeesu ʉKilisiti,
wa‑ali nʼgolosu.
2 ɄKilisiti ʉyo ya yʉʉyo ahahwifumiizye ahabha nsangua ɨya‑abhoolwe.
Hwi‑idala ɨlyo,
ahatefweziizye ɨmbiibhi zyetu na hutipatiihanye nʉ Ngʉlʉbhɨ.
Nantele,
saga huje ahatefweziizye zyɨ mbiibhi zyetu tibheene,
leelo nɨ mbiibhi zya bhantu bhonti.
3 Nkashele tihuzitiniha ɨndajizyo zya Ngʉlʉbhɨ,
ɨpo lyoli tɨnza‑abhe tihumʼmanya ʉmwene.
4 Ʉmuntu wa‑ayanga aje amʼmɨɨnye ʉNgʉlʉbhɨ leelo saga ahuzitiniha ɨndajizyo zyakwe,
ʉyo nʼgobezi,
yope ɨlyoli saga ɨlɨɨho mwa mwene.
5 Leelo ʉmuntu wowonti wa‑ahulitiniha izwi lyakwe,
ʉyo ya‑anʼgɨɨne ʉNgʉlʉbhɨ hu lyoli.
Ɨshi hwi‑idala ɨlyo,
timanya huje tili palishimo nʉ Ngʉlʉbhɨ.
6 Ʉmuntu wa‑ayanga huje,
ali palishimo nʉ Ngʉlʉbhɨ,
ahwanziwa aje,
alembaje nanshi ʉYeesu sha‑ahalembaga.
Ɨndajizyo ya Yeesu ɨya‑aganane
7 Bhakʉndwe bhaanɨ,
ɨndajizyo ɨnɨ yɨ‑ɨhubhasimbila saga njenu,
lyoli yɨ ndajizyo ɨla ɨyɨ mandɨ ya mwahali nayo afume hu wandilo lwa muhumʼmwɨtɨha ʉYeesu.
Ɨndajizyo ɨyo ɨyɨ mandɨ,
lizwi liila lya mwahalyʉmvwɨzye.b
8 Nantele,
hu madala aganjɨ,
ɨndajizyo ɨnɨ yɨ‑ɨhubhasimbila,
njenu.
Ɨlyoli hwɨ‑ɨgo gɨ‑ɨyanga ɨloleha mu lemvu wa Yeesu ʉKilisiti na mu lemvu weenyu,
pɨpo mulola ɨhiisi ɨhwepa,
ʉlukhozyo ʉlwɨ lyoli lukhozya.
9 Ʉmuntu ʉyo ayanga huje alemba mu lukhozyo,
leelo ahumʼviitilwa ʉmwoziwa ʉwamwabho,
ʉyo ali sha‑alemba mu hiisi.
10 Ʉmuntu ʉyo ahunʼgana ʉmwoziwa ʉwamwabho,
alemba mu lukhozyo.
Nantele,
mwa mwene nahamo hohonti ha hagamʼmɨɨha huje abhombe ɨmbiibhi.
11 Leelo ʉmuntu wa‑ahumʼviitilwa ʉmwoziwa ʉwamwabho,
ali mu hiisi.
Ajenda mu hiisi sinta amanye hwa‑abhala,
hu nongwa ya‑aje ɨhiisi ɨnʼkhomile hu maaso.
12 Ɨhubhasimbila amwɨ mubhaana mu lwɨtɨho,
hu nongwa ya‑aje mukhobhosheliilwe ɨmbiibhi zyenyu nʉ Yeesu ʉKilisiti.
13 Ɨhubhasimbila amwɨ mubhayise,
hu nongwa ya‑aje mumʼmɨɨnye ʉYeesu ʉKilisiti,
wa‑alɨɨho afume hu wandilo.
Ɨhubhasimbila amwɨ mubhasahaala,
hu nongwa ya‑aje mumʼmenile ʉMʼmiibhi ʉla ʉSeetano.
c
Ɨhubhasimbila amwɨ mubhaana mu lwɨtɨho,
hu nongwa ya‑aje mumʼmɨɨnye ʉDaada ʉNgʉlʉbhɨ.
14 Ɨhubhasimbila amwɨ mubhayise,
hu nongwa ya‑aje mumʼmɨɨnye ʉYeesu ʉKilisiti,
wa‑alɨɨho afume hu wandilo.
Ɨhubhasimbila amwɨ mubhasahaala,
hu nongwa ya‑aje muli ni‑ikhone,
mulikhɨɨte izwi lya Ngʉlʉbhɨ.
Nantele mumʼmenile ʉMʼmiibhi ʉla ʉSeetano.
15 Ɨshi leelo,
ɨhubhabhʉʉzya huje mugandi huvigane ɨvintu ɨvyavu ɨvya mu nsi,
awe hubhabhɨnjɨɨlɨle abhantu bha saga bhahunʼtiniha ʉNgʉlʉbhɨ.
Nkashele ʉmuntu ahuvigana ɨvintu ɨvya mu nsi,
saga abhajiiye hunʼgane ʉDaada ʉNgʉlʉbhɨ.
16 Ɨnjanjile ɨsho,
pɨpo ʉbhiibhi ʉwa mu nsi wa wʉʉwu,
ɨnsʉngwo ɨmbiibhi ɨzyɨ mʼbɨlɨ,
ɨjɨɨla ɨya‑abhe na shoshonti ʉmuntu sha‑ahushilola,
na mashento ga gafumilana nʉ tabhazi.
Ɨvyo vyonti saga vifuma hwa Daada ʉNgʉlʉbhɨ,
leelo vifuma mu nsi ʉmu.
17 Ɨnsi peeka nɨ nsʉngwo zyakwe ɨmbiibhi,
vishila.
Leelo ʉmuntu wa‑abhomba ga gahunʼkhondeezya ʉNgʉlʉbhɨ,
abha nʉ wʉʉmi ʉwa wiila.
Abhe maaso na bhalʉgʉ bha Kilisiti
18 Bhaana bhaanɨ,
ɨnsiku ɨzya hu malishilo zifishile!
Mwʉmvwɨzye huje ʉnʼnʉgʉ wa Kilisitid ahwɨnza,
hwope ɨshi abhalʉgʉ bha Kilisiti abhinji bhɨnzɨle.
Ɨlyo lya lihutilolesya aje,
tili mu nsiku ɨzya hu malishilo.
19 Abhabhiibhi ɨbho bhafumile muuhati yeetu,
leelo lyoli saga bhahali palishimo naatɨ.
Ɨshi nkashele lyoli bhahabhanga palishimo naatɨ,
handɨ bhahasyalile huliitɨ.
Leelo bhasogʉʉye huje,
ɨloleshe pa pazelu aje saga bhahali palishimo naatɨ.
20 Leelo amwɨ,
ʉNgʉlʉbhɨ abhapiiye ʉMʼpepo ʉMʼfinjile,
e sha shɨɨsho amwɨ mwenti mumɨɨnye ɨlyoli.
21 Ɨhubhasimbila ɨkalaata ɨnɨ,
saga huje saga mumɨɨnye ɨlyoli,
leelo hu nongwa ya‑aje,
mumɨɨnye ɨlyoli.
Nantele mumɨɨnye huje ilenga lyolyonti saga lifuma mu lyoli.
22 Ʉmuntu ʉwi‑ilenga yʉ naanu?
Ʉmuntu ʉwi‑ilenga ya yʉʉla wa‑akhaana huje ʉYeesu yʉ Mʼfyʉli.
f Ʉmuntu nanshi ʉyo,
nʼnʉgʉ wa Kilisiti,
ahunʼkhaana ʉDaada ʉNgʉlʉbhɨ nʉ Mwana waakwe.
23 Ʉmuntu wowonti wa‑ahunʼkhaana ʉMwana,
saga ali palishimo nʉ Daada ʉNgʉlʉbhɨ.
Leelo,
ʉmuntu wowonti wa‑ahumʼmwɨtɨha ʉMwana,
ʉyo ali palishimo nʉ Daada ʉNgʉlʉbhɨ.
24 Ɨshi,
amazwi ɨgo mwʉmvwɨzye afume hu wandilo wɨ lwɨtɨho lwenyu,
mujendelelaje hugakhate mu mooyo geenyu.
Nkashele mujendeelela hugakhate amazwi ɨgo mu mooyo geenyu,
ɨpo namwɨ munza‑ajendeelele abhe palishimo nʉ Mwana nʉ Daada ʉNgʉlʉbhɨ.
25 Nantele ɨndapo ya‑ahatilapiiye atɨ ʉKilisiti ya yɨɨnɨ,
abhe nʉ wʉʉmi ʉwa wiila.
26 Ɨmbasimbiiye ɨnongwa ɨzi hubhasunde amwɨ hu nongwa ya bhaala bha bhahwanza hubhateezye.
27 Leelo amwɨ,
ʉNgʉlʉbhɨ abhapiiye ʉMʼpepo ʉMʼfinjile wa‑akhala muuhati yeenyu.
Ʉyo ya yʉʉyo ahubhamanyizya zyonti,
ɨmanyizyo zyakwe zyɨ lyoli,
saga zi‑ilenga.
Ɨshi saga ɨhwanziwa huje ʉmuntu abhamanyizye.
g Nanshi ɨsho ʉMʼpepo ʉMʼfinjile abhamanyiziizye,
ɨshi jendelelaji abhe palishimo nʉ Kilisiti.
Akhale nanshi abhaana bha Ngʉlʉbhɨ
28 Bhaana bhaanɨ,
ɨshi khalaji palishimo nʉ Kilisiti,
huje isiku ɨlya hwɨnze hwakwe,
tahabhanje nʉ dandamazu sinta abhe nɨ nsoni.
29 Nkashele mumɨɨnye shinza aje ʉKilisiti nʼgolosu tee,
ɨshi manyaji nantele huje wowonti wa‑abhomba ɨzyɨ golosu,
ʉyo mwana wa Ngʉlʉbhɨ.