Huzimene ɨmbiibhi ɨzya mu nsi
5
Ʉmuntu wowonti wa‑ahwɨtɨha huje ʉYeesu Mʼfyʉli,
ʉmuntu ʉyo mwana wa Ngʉlʉbhɨ.
Wowonti wa‑ahunʼgana ʉmʼpaafi,
ahunʼgana nʉ mwana wa mʼpaafi ʉyo.
2 Idala ɨlya‑amanye huje lyoli tihubhagana abhaana bha Ngʉlʉbhɨ lya lyɨli,
hunʼgane ʉNgʉlʉbhɨ na huzitinishe ɨndajizyo zyakwe.
3 Hunʼgane ʉNgʉlʉbhɨ hwa huje huzitinishe ɨndajizyo zyakwe,
nantele ɨndajizyo zyakwe saga mwamu.
4 Ɨnjanjile ɨsho,
hu nongwa ya‑aje wowonti wa‑ali mwana wa Ngʉlʉbhɨ,
ahugamena aga mu nsi.
Ɨsho sha shɨɨsho tihugamena aga mu nsi,
hwi‑idala ɨlyɨ lwɨtɨho lwetu hwa Kilisiti.
5 Wɨlɨ,
yʉ naanu wa‑abhajiiye hugamene aga mu nsi?
Ya yʉʉla wa‑ahwɨtɨha huje ʉYeesu Mwana wa Ngʉlʉbhɨ.
Ʉsimishizi hu nongwa ya Yeesu ʉKilisiti
6 ɄMwana ʉyo yʉ Yeesu ʉKilisiti,
ʉyo ahasimishiziiwe hu mɨnzɨ agɨ lwozyo lwakwe na hwi‑idanda ɨlya‑afwe hwakwe.
Saga ahasimishiziiwe hu mɨnzɨ geene,
leelo na hwi‑idanda.
7 ɄMʼpepo ʉMʼfinjile wope asimishizya huje ɨgo gɨ lyoli hu nongwa ya‑aje,
ʉMʼpepo ʉMʼfinjile wɨ lyoli.
8 Ɨshi huli na bhasimishizi bhataatu ʉhwo hu mwanya bha bhasimishizya hu nongwa ya Yeesu,
huli ʉDaada,
Izwi nʉ Mʼpepo ʉMʼfinjile,
ɨbha bhataatu bhali peeka.
9 Nantele huli ɨvintu vitaatu ɨvyo visimishizya mu nsi,
# ʉMʼpepo ʉMʼfinjile,
amɨnzɨ ni‑idanda ɨlya‑afwe hwakwe.
Ɨvyo vyonti vitaatu vili nʉ simishizi weeka wa wuhwɨtɨɨhana.
Nkashele tihwɨtɨha ʉsimishizi wa bhantu,
tihwanziwa ahwɨtɨshe ʉsimishizi wa Ngʉlʉbhɨ wa wuli wi‑ikhone tee.
Ʉwu wʉ simishizi ʉwo ʉNgʉlʉbhɨ wa‑ahafumiizye hu nongwa ya Mwana waakwe.
10 Ʉmuntu wa‑ahumʼmwɨtɨha ʉMwana wa Ngʉlʉbhɨ,
ayɨtɨɨshe huje ʉsimishizi ʉwo wɨ lyoli.
Leelo wa saga ahumʼmwɨtɨha ʉNgʉlʉbhɨ,
ahumʼmɨɨha ʉNgʉlʉbhɨ nʼgobezi,
pɨpo saga awɨtɨɨshe ʉsimishizi wa Ngʉlʉbhɨ wa‑awufumiizye hu nongwa ya Mwana waakwe.
11 Ʉsimishizi ʉwo wa wʉʉwu,
ʉNgʉlʉbhɨ atipiiye ʉwʉʉmi ʉwa wiila.
Ʉwʉʉmi ʉwo tihuwaaga hwa Mwana waakwe.
12 Ʉmuntu wa‑ali palishimo nʉ Mwana wa Ngʉlʉbhɨ,
ali nʉ wʉʉmi ʉwo.
Leelo wa saga ali palishimo nʉ Mwana wa Ngʉlʉbhɨ,
saga ali nʉ wʉʉmi ʉwo.
Amazwi aga hu malishilo
13 Ɨhubhasimbila amazwi ɨgo,
amwɨ mwa muhumʼmwɨtɨha ʉMwana wa Ngʉlʉbhɨ huje mumanye aje,
muli nʉ wʉʉmi ʉwa wiila.
14 Tili nʉ dandamazu pitagaalila lya Ngʉlʉbhɨ,
pɨpo timɨɨnye huje nkashele tihunʼnaabha lyolyonti mu kʉndwa waakwe,
ahutʉmvwa.
15 Ɨshi timɨɨnye huje atipiiye gonti ɨgo ga tihunʼnaabha,
pɨpo lyolyonti lya tihunʼnaabha,
ahutʉmvwa.
16 Huli nɨ mbiibhi zya saga zihumʼmɨɨha ʉmuntu hutali nʉ Ngʉlʉbhɨ wiila na wiila.
Nkashele ʉmuntu wowonti mwaliimwɨ ahunʼnola ʉmwoziwa ʉwamwabho abhomba ɨmbiibhi nanshi ɨsho,
amʼpuutile hwa Ngʉlʉbhɨ,
wope ʉNgʉlʉbhɨ anza humʼpeele ʉwʉʉmi.
Ɨbha ɨsho hwa bhaala bha bhabhomba ɨmbiibhi nanshi ɨzyo.
Leelo huli nɨ mbiibhi zya zihumʼmɨɨha ʉmuntu hutali nʉ Ngʉlʉbhɨ wiila na wiila.
Anɨ saga ɨnjiga ʉmʼpuutile hwa Ngʉlʉbhɨ hu mbiibhi ɨzyo.
17 Abhombe lyolyonti lya saga lyɨ golosu pa maaso ga Ngʉlʉbhɨ,
hubhombe ɨmbiibhi.
Leelo peeka nɨ‑ɨgo,
huli ɨmbiibhi zya saga zihumʼmɨɨha ʉmuntu hutali nʉ Ngʉlʉbhɨ wiila na wiila.
18 Timɨɨnye huje,
ʉmuntu wowonti wa‑ali mwana wa Ngʉlʉbhɨ saga alʉbhɨɨlɨla abhombe ɨmbiibhi,
pɨpo ʉMwana wa Ngʉlʉbhɨ ahunʼnɨndɨɨlɨla.
Hu nongwa ɨyo ʉSeetano saga agamʼmomba lyolyonti.
19 Timɨɨnye huje,
atɨ tili bhaana bha Ngʉlʉbhɨ.
Abhantu abhanjɨ bhonti bha saga bhahunʼtiniha ʉNgʉlʉbhɨ,
bhalongozewa nʉ Mʼmiibhi ʉla,
ʉSeetano.
20 Nantele timɨɨnye huje,
ʉMwana wa Ngʉlʉbhɨ ayɨnzɨle,
atipiiye ʉmanyi huje timʼmanye ʉNgʉlʉbhɨ ʉwɨ lyoli.
Ɨshi tilemba mu lubhʉngaano nʉ Ngʉlʉbhɨ ʉwɨ lyoli,
hwi‑idala ɨlya‑abhe nʉ lubhʉngaano nʉ Mwana waakwe ʉYeesu ʉKilisiti.
Ʉmwene yʉ Ngʉlʉbhɨ wɨ lyoli,
nantele yʉ wʉʉmi wa wiila.
21 Bhaana bhaanɨ,
mubhanje maaso!
Mugandi apuute hwa bhangʉlʉbhɨ.