Ɨkalaata ɨya nʼsontwa ʉPaulo hwa
Filimooni
ɄPaulo ahunʼnamuha ʉFilimooni
1
Ɨkalaata ɨnɨ ɨfumile huliinɨ anɨ nɨPaulo.
Anɨ ɨnkʉngwɨlwe hu nongwa ya‑alʉmbɨɨlɨle ɨnongwa ɨzya Yeesu ʉKilisiti.
a Peeka nʉ holo weetu ʉTiimoti,
atɨ tihusimbila aawe Filimooni,
aawe wʉ‑ʉli mʼmomvi wamwetu ʉnʼkʉndwe.
2 Nantele,
tihubhasimbila abhantu abha hu shibhanza bha bhabhʉngaana pa nyumba yaaho,
haani ʉyɨlʉmbʉ weetu ʉAfiya,
nʉ Alikiipo ʉnʼnwi ʉwamwetu mu mbombo ya Ngʉlʉbhɨ.
3 Ɨmpyana nʉ tengaanu afume hwa Ngʉlʉbhɨ,
ʉDaada weetu,
na hwa Mwɨnɨ ʉYeesu ʉKilisiti,
vibhanje peeka naamwɨ.
ɄPaulo ahumʼpuutila ʉFilimooni
4 Wiila lwene lwɨ‑ɨhumʼpuuta ʉNgʉlʉbhɨ,
ɨhuhwizuha aawe na hunʼsalifye hu nongwa yaaho,
5 pɨpo ɨnʉmvwɨzye shiila shʉ‑ʉmʼmwɨtɨɨshe ʉMwɨnɨ ʉYeesu,
na shiila shʉ‑ʉnʼgɨɨne ʉYeesu peeka na bhooziwa bhonti.
6 Ɨhunʼnaabha ʉNgʉlʉbhɨ huje,
ʉlwʉmvwano ʉlwo lwʉ‑ʉli nalwo naatɨ luʼbhɨɨshe huje,
ʉfishile huhaaganye shila hantu ahinza ha tihuhaaga lwa tipatihɨɨnywe nʉ Yeesu ʉKilisiti.
7 Holo weetu,
hu kʉndwa waaho ʉwo ʉnsansamusiizye,
nantele ʉngwɨzyɨzye ʉmwoyo gwanɨ,
pɨpo ʉsansamusiizye amooyo ga bhooziwa.
ɄPaulo ahunʼnaabhila ɨnkʉmbʉ ʉOneesimo
8 Poshe nɨnzaga‑abhe nʼdandamazu tee mwa Kilisiti ahulajizye aawe abhombe ga gakhondɨɨye abhombeshe,
9 hwashi ɨʼlambe hu kʉndwa.
Anɨ nɨPaulo,
nɨnʼgogolo,
nantele ɨnkʉngwɨlwe mu hoobhe hu nongwa ya Yeesu ʉKilisiti,
10 ɨhulamba hu nongwa ya mwana waanɨ ʉOneesimo.
b Mu habhaazyo ɨho ɨnkʉngwɨlwe ɨpa na manyololo,
nahanʼnʉmbɨɨlɨla,
ahabha mwana waanɨ mu lwɨtɨho.
11 Pa nsiku zya‑ahaselenjile saga ahali muntu wa‑akhondɨɨye hwaliiwe,
leelo ɨshi wabha muntu wa‑akhondɨɨye hwaliiwe,
nantele akhondɨɨye hwaliinɨ.
12 Ɨshi ɨhunʼgalusya hwaliiwe,
ʉyo yɨ‑ɨnʼkʉndɨle hu mwoyo gwanɨ gwonti.
13 Nahasʉngwɨlwe huje,
asyale ɨpa naanɨ huje anavwaje,
apyanile ɨpo wahanavwaga aawe,
mu habhaazyo hɨ‑ɨnkʉngwɨlwe hu nongwa ya‑alʉmbɨɨlɨle ɨNongwa ɨNyinza ɨzya Yeesu ʉKilisiti.
14 Leelo,
saga lilɨɨho nka limo lyɨ‑ɨngabhomba sinta aawe ahwɨtɨshe.
Nkashele ʉhunaavwa,
hunaavwe hwaho hubhanje hwa‑asʉngwe weewe,
leelo husahabhe hwi‑idala ɨlya‑abijiilizye.
15 Lumo ʉOneesimo ahasogʉʉye hwaliiwe ʉhwo,
hu habhaazyo hashe huje,
ʉkhale peeka nawo mwa Yeesu ʉKilisiti wiila.
16 Saga nʼkalwe lwene,
leelo holo nʼkʉndwe hwaliinɨ tee,
na hwaliiwe haani ashile anɨ,
holo shimʼbɨlɨ nɨ shiwooziwa.
17 Ɨshi,
nkashele ʉhwilola huje,
ʉli nʉ lwʉmvwano naanɨ nɨwamwenyu,
ʉmʼmwejelelaje shinza nanshi sha wɨnzaga hunejeelele anɨ nɨɨnɨ.
18 Nkashele zilɨɨho zimo zya‑atulile hwaliiwe,
awe ɨzyo ahwanziwa asombe hwaliiwe,
anɨ nahayihusomba.
19 Anɨ nɨPaulo nɨ‑ɨsimba ɨga hu nʼkhono gwanɨ nɨɨnɨ huje,
anɨ nahayihusomba.
Peeka nɨ‑ɨsho,
saga ɨhondɨɨye ahuhwizusye,
aawe ʉmɨɨnye huje,
nɨɨnɨ nahaʼlʉmbɨlɨɨye,
leelo ɨhwanziwa ʉhwifumyaje weewe hwaliinɨ.
20 Ɨshi holo waanɨ,
ʉnaavwe hu nongwa ya Mwɨnɨ weetu ʉYeesu ʉKilisiti,
nantele ʉnsansamusyaje ʉmwoyo gwanɨ nanshi shɨ‑ɨhwanziwa hwa mwoziwa ʉwamwetu.
21 Ɨhusimbila ɨkalaata ɨnɨ,
pɨpo ɨmɨɨnye huje,
wahayɨtɨɨhana naanɨ abhombe gaala ga nalaabha,
poshe ashile ɨgo.
22 Peeka nɨ‑ɨzyo,
ɨhulaabha ʉnanzile apa‑akhale,
pɨpo ɨsʉʉbhɨla huje,
alɨngaane nɨ mpuuto zyenyu,
ʉNgʉlʉbhɨ ahayihuneefwa mu hoobhe aje,
ɨnɨnze huliimwɨ hubhayaatile.
Amazwi aga hu malishilo
23 Ʉholo waanɨ ʉEpaafula ahulamuha,
ʉmwene naanɨ tenti tikʉngwɨlwe peeka mu hoobhe,
hu nongwa ya‑alʉmbɨɨlɨle ɨNongwa ɨNyinza ɨzya Yeesu ʉKilisiti.
24 Bhope abhabhomvi abhamwetu abhɨ‑ɨpa,
ʉMaalʉko,
ʉAlisitaalʉko,
ʉDeema nʉ Luuka,
bhahulamuha.
25 Ɨmpyana ya Mwɨnɨ ʉYeesu ʉKilisiti ɨbhanje peeka naamwɨ.