Zya zikhondɨɨye hwa bhantu abha hu shibhanza
2
Leelo aawe Tiito,
ʉmanyizyaje abhantu alɨngaane nɨ manyizyo ɨzyɨ lyoli.
2 Ʉbhamanyizyaje abhagoosi abhɨ shilume huje,
bhabhanje bhantu bha bhahwijela na‑abhe nɨ nshɨnshɨ nʉ tengamazu mu lwɨtɨho.
Bhabhanje bhagolosu mu lwɨtɨho,
mu kʉndwa na mu jimbiilizu.
3 Bhope abhagoosi abhɨ shishɨ,
ʉbhamanyizyaje huje,
bhabhanje nɨ njendo ɨnsangalusu,
bhagandi ahwandile abhantu ilenga,
bhagandi abhe bhamwezi.
Lyoli bhakhondɨɨye amanyizye ɨnyinza,
4 nka bhabhasundaje abhashɨ abhalɨndu huje,
bhabhaganaje abhalume bhaabho na bhaana bhaabho.
5 Nantele,
bhabhanje bhatengamazu,
bhasangalusu,
bhabhombaje ɨmbombo ɨzya mu nyumba zyabho,
bhabhombelanaje ɨnyinza,
na hubhʉmvwe abhalume bhaabho.
Bhabhombaje shɨɨsho huje,
izwi lya Ngʉlʉbhɨ lisahayangwe shibhiibhi hu njendo zyabho.
6 Abhasahaala bhope,
ʉbhamanyizyaje huje,
bhahwijelaje.
7 Aawe weewe ʉbhombaje shinza huli zyonti,
ʉfishile abhe shifwani shinza hwa bheene.
Lwʉ‑ʉhubhamanyizya abhantu,
ʉbhamanyizyaje hu lyoli,
sinta waana.
8 Amazwi gaaho gabhanje gɨ lyoli huje,
abhalʉgʉ bhaaho nka bhasʉʉhaje,
pɨpo saga bhahuhaaga nahamo aha‑ayanje hu nongwa yeetu.
9 Abhakalwe,
ʉbhamanyizyaje huje,
bhabhʉmvwaje abhagoosi bhaabho hu zyonti na hubhakhondeezye.
Nkashele abhagoosi bhaabho bhahubhabhʉʉzya zimo,
bhasahadalihanaje nabho.
10 Bhasahiibhaje ahantu hohonti hwa bhagoosi bhaabho.
Lyoli bhalolesyaje ɨnjendo ɨnyinza,
nantele ɨzyɨ lʉnjɨsu hu zyonti huje,
zya bhabhomba zikhondeezye abhantu,
nka bhaganaje atejeelezye ɨmanyizyo ɨzya Ngʉlʉbhɨ,
ʉMʼfyʉli weetu.
11 Ʉbhamanyizyaje ɨgo,
pɨpo ʉNgʉlʉbhɨ alolesiizye ɨmpyana ɨyɨ fyʉli waakwe hwa bhantu bhonti.
12 Ɨmpyana ɨyo ɨhutimanyizya aleshe ʉbhiibhi nɨ nsʉngwo ɨzya mu nsi.
Lwa tikhala mu nsi ʉmu tihwijelaje,
tibhanje bhagolosu na‑akhale mwi‑idala lya likhondɨɨye pa maaso ga Ngʉlʉbhɨ.
13 Tikhalaje shɨɨshi lwa tigʉʉlɨla ahwɨnze hwa Yeesu ʉKilisiti mu mwamu ʉgoosi,
wa‑ali Mʼfyʉli weetu nʉ Ngʉlʉbhɨ weetu ʉnʼgoosi.
Ʉlusʉʉbhɨlo lwetu ʉlwu lwa luhutipeela ɨnsayo.
14 Ʉmwene yʉʉyo ahahwifumiizye hu nongwa yeetu huje,
atigombole mu mbiibhi zyonti,
na hutisangalusye tibhe bhantu bhaakwe bha bhahwifumya hu dandamazu abhombe ɨnyinza.
15 Amazwi ɨgo ʉbhamanyizyaje abhantu.
Ʉbhajinjizyaje amooyo na hubhasunde hwi‑ikhone.
Ʉsahɨɨtɨshe huje,
abhe ʉmuntu ʉwa husʉfwanye.