Ɨkalaata ɨya nʼsontwa ʉPaulo hwa
Tiito
ɄPaulo ahunʼnamuha ʉTiito
1
Anɨ nɨPaulo,
nɨmʼmomvi wa Ngʉlʉbhɨ,
nɨnʼsontwa wa Yeesu ʉKilisiti,
a nɨɨnɨ ɨhusimbila aawe Tiito.
Ɨnsonteleziiwe hwa bhantu ɨbho,
ʉNgʉlʉbhɨ yʉʉyo abhasaluuye huje,
bhabhe nʉ lwɨtɨho,
bhazimanye ɨzya nalyoli zyonti zya zileeta ɨnjendo ɨnyinza pa maaso ga Ngʉlʉbhɨ.
2 Ʉlwɨtɨho na‑amanye ɨlyoli ɨyo visimishizya ʉlusʉʉbhɨlo huje,
bhahawaaje ʉwʉʉmi ʉwa wiila.
Mu habhaazyo ɨho ɨnsi shɨ‑ɨsɨɨle apelwe,
ʉNgʉlʉbhɨ ya saga ayanga ilenga ahabhɨshɨɨye ʉlufingo hu wʉʉmi wʉʉwo.
3 Ahabhaazyo ha hakhondɨɨye lwa haafiha,
ahabhabhʉʉzya abhantu ɨNongwa ɨNyinza ɨzya Yeesu hwi‑idala ɨlya‑alʉmbɨɨlɨle hwanɨ.
ɄNgʉlʉbhɨ ʉMʼfyʉli weetu yʉʉyo ahalajiziizye huje,
ɨndʉmbɨlɨlaje.
4 Anɨ ɨhusimbila aawe Tiito,
we mwana waanɨ ʉwɨ lyoli mu lwɨtɨho lwa tili nalwo.
Ɨmpyana nʉ tengaanu afume hwa Ngʉlʉbhɨ ʉDaada na hwa Mʼfyʉli weetu ʉYeesu ʉKilisiti,
vibhanje peeka naawe.
Ɨmbombo ɨya Tiito mu Kileete
5 Nahaʼleshile hu Kileete huje,
ʉmalɨɨzye alɨngaanye zyonti zya zyahasyalile,
na hubhabhɨɨshe abhagoosi mu vibhanza ɨvya mu mabooma gonti,
nanshi nahaʼlajiziizye.
6 Wowonti ʉyo abhanje nʼgoosi wɨ shibhanza,
akhondɨɨye huje,
bhagandi ahunʼnyanje ɨmbiibhi nazimo.
Abhanje nʉ nʼshɨ weeka,
agandi asʉngwe abhashɨ abhanjɨ.
Abhaana bhaakwe bhakhondɨɨye huje,
bhabhanje nʉ lwɨtɨho,
bhagandi abhe na mashento na mampʉlɨ.
7 Ʉmwenyeelezi ʉnʉ akhondɨɨye huje,
bhagandi ahunʼnyanje ɨmbiibhi nazimo,
pɨpo abha asaluliilwe nʉ Ngʉlʉbhɨ abhombe ɨmbombo yaakwe.
Nantele,
asahabhanje muntu wa‑ali na mashento,
awe ya‑aviitwa nalinaali.
Nantele,
asahabhanje mʼmwezi,
awe ya‑ali mwandiilizi,
awe ya‑ali nʼkʉnda mpɨɨya.
8 Lyoli akhondɨɨye huje,
abhanje muntu ʉyo aposheela abhajenu.
Aziganaje ɨnyinza,
abhanje nʼtengamazu,
abhombaje zya zihwanziwa.
Abhanje muntu nʼsangalusu ʉyo ahwijela.
9 Akhataje amazwi agɨ lyoli,
nanshi sha‑ahamanyiziiwe huje,
abhajinjizyaje abhanjɨ hu manyizyo ɨngolosu,
abhatolaje bha bhahuzikhaana.
10 Bhalɨɨho abhantu abhinji mu Kileete bha bhadindizya ɨmanyizyo ɨzyɨ lyoli,
haani abhooziwa bha bhafumile mwa Bhayahuudi bha bhamanyizya amiiho gaabho.
Amazwi gaabho huyanje ɨzyɨ shaana lwene na‑agobelane.
Ɨbho bhakhondɨɨye huje,
bhapʉmɨzɨwe amalomu gaabho
11 pɨpo bhateezya abhantu mu nyumba ɨnyinji,
lwa bhamanyizya ɨzyo saga zikhondɨɨye.
Bhabhomba ɨsho huje bhazyaje ɨmpɨɨya.
12 ABhakileete ɨbho,
weeka mu bhakuwi bhɨɨbho ahayanjile ahajile,
“ABhakileete bhayanga ɨzi‑ilenga ɨnsiku zyonti,
bhali nanshi ɨhanu ɨhali ɨmbiibhi,
bhoolo,
nantele bhapafu.”
13 Amazwi gɨɨgo ga gayangwilwe hwɨ‑ɨbho gɨ lyoli.
Leelo shɨɨsho ʉbhadaamile haani huje,
bhajinaje mu lwɨtɨho.
14 Nantele,
bhakhondɨɨye huje,
bhaleshe atejeelezye ɨvilaale ɨvya Bhayahuudi,
nɨ ndajizyo zya zibhɨhwɨlwe na bhantu bha bhakhaana ɨzyɨ lyoli.
15 Hwa bhantu abhagolosu pa maaso ga Ngʉlʉbhɨ,
saga halɨɨho ahantu nahamo ha hagabhabhɨɨha abhe bhaavu.
Leelo,
hwa bhantu bha bhali bhaavu na bha saga bhahunʼsʉʉbhɨla ʉYeesu ʉKilisiti,
ɨvintu vyonti hwa bheene vibha vyavu.
Ɨnjeele zyabho nɨ nsɨɨbho zyabho zyonti zibha nyaavu.b
16 Bhahwiyanga huje,
bhamʼmɨɨnye ʉNgʉlʉbhɨ,
leelo hu njendo zyabho bhahunʼkhaana.
Bhahumʼviisya haani,
nantele saga bhahumʼmwɨtɨha,
saga bhali nɨ njendo ɨnyinza nazimo zya zikhondɨɨye.c