Ɨnjendo ɨnyinza ɨzya bhooziwa
3
Ʉbhizusyaje abhantu huje,
bhahwiyisyaje hwa bhagoosi abhɨ nsi na hubhʉmvwe.
Bhahwilɨnganyaaje abhombe ɨmbombo zyonti ɨnyinza.
2 Pagandi abhe na bhantu abhɨ mashento awe bha bhali ni‑ibho,
lyoli bhabhanje bholoolo,
nantele bhajimbiilizu hwa bhantu bhonti.
3 Ɨmandɨ,
natɨ tahali bhapezu sinta hunʼtinishe ʉNgʉlʉbhɨ.
Tahagobeliilwe,
tahakhatwaga mu nsʉngwo ɨnyinji nyinji lwene,
nantele tahali nɨ njendo ɨmbiibhi.
Tahazilanaga na‑alolelane ɨjɨɨla.
4 Leelo,
huli na mazwi ga gayiga,
“ɄNgʉlʉbhɨ ʉMʼfyʉli weetu,
lwa walolesya ɨmpyana yaakwe nʉ kʉndwa waakwe hwa bhantu,
5 ahatifyʉla.
Saga huje,
tahabhombile aminza atɨ,
leelo hu nkʉmbʉ yaakwe lwene,
ahatisangalusiizye ɨmbiibhi zyetu hwi‑idala ɨlya‑apaapwe ʉlwa bhɨɨlɨ,
ʉMʼpepo ʉMʼfinjilea ahatipela shipya.
6 Ʉyo ya yʉʉla ʉNgʉlʉbhɨ ahatitiiye hu winji hwi‑idala ɨlya Yeesu ʉKilisiti,
ʉMʼfyʉli weetu.
7 Sha shɨɨsho,
hu mpyana yaakwe ʉNgʉlʉbhɨ atɨtɨɨshe huje tibhaaziwe abhe bhagolosu,
atibhɨshɨɨye huje tejeelele ʉwʉʉmi ʉwa wiila ʉwo tisʉʉbhɨla.”b
8 Izwi ɨlyo likhondɨɨye hulyɨtɨshe.
Ɨhwanza huje,
ʉlikhajilizyaje hwi‑ikhone huje,
bhaala bha bhamʼmwɨtɨɨshe na hunʼsʉʉbhɨle ʉNgʉlʉbhɨ,
bhizuhaje abhombe aminza.
Likhondɨɨye hulibhombe,
nantele lihwavwa abhantu.
9 Peeka nɨ‑ɨgo,
ʉseguhaje amadali agɨ shikwesu,
aga‑abhambishe amataawa ga bhamaama bha bhahafwiye,
awe adaliihane hu gaala ga gali mu ndajizyo.
Ɨgo gonti saga gatʉʉla nahamo,
lyoli gɨ shaana lwene!
10 Ʉmuntu wowonti ʉyo alumanya abhantu,
ʉnʼsundaje,
hwope habhɨɨlɨ honti.
Nkashele saga ahwʉmvwa,
ʉmʼmwefwaje mu shibhanza.
11 Halɨ ʉmɨɨnye huje,
ʉmuntu nanshi ʉyo ananjiishe,
nantele mʼmomvi wɨ mbiibhi,
ahwilonjile mwene.
Amazwi aga hu malishilo
12 Ahabhaazyo ɨho nahayihunʼsonteelezya ʉAliteema awe ʉTikiiko huliiwe,
ʉkhalaganyaaje ahwɨnze hwi‑ibooma ɨlyɨ Nikopooli ʉhwu huje,
tikhomaane hwʉnʉʉhwu.
Nahayibhala asyale hu Nikopooli mu habhaazyo ahi‑isasa.
13 Ʉbhombe hu dandamazu wonti humʼmwavwe ʉZeena,
ʉyo alambila abhantu,
nʉ Apoolo.
Bhasahabhuliililwe ahantu nahamo lwa bhashʉʉla.
14 Abhantu bheetu bhamanyilaje abhombe aminza huje,
bhabhapeelaje abhantu abhanjɨ ɨvintu vya bhabhuliliilwe ɨnsiku zyonti.
Ɨpo abhantu bheetu bhahayihubhakhondezyaga abhanjɨ mu lemvu waabho.
15 Abhantu bhonti bha tili peeka,
bhahulamuha.
Nawe,
ʉtilamushilaje abhooziwa abhamwetu bha bhatigɨɨne mu lwɨtɨho.
Ɨmpyana ya Ngʉlʉbhɨ ɨbhanje peeka naamwɨ mwenti.