Ɨmbombo ya Tiimoti mu shibhanza
5
Ʉgandi hunʼkhajile ʉnʼnume wa‑ali nʼgogolo,
leelo ʉnʼsundaje nanshi ʉyise waaho.
Abhalume abhasahaala bhope,
ʉbhasundaje nanshi abhaholo abhɨ shilume.
2 Abhashɨ abhagogolo ʉyangaje nabho nanshi abhaanyina bhaaho.
Abhalɨndu bhope,
ʉbhasundaje hu mwoyo ʉnʼsangalusu nanshi abhayɨlʉmbʉ bhaaho.
Abhafwɨle bha bhakhondɨɨye hubhaavwe
3 Abhafwɨle bha saga bhali na bha hubhaavwe,
ɨbho bha mubhavwaje.
4 Leelo,
nkashele mʼfwɨle wa‑ali na bhaana awe abhazʉkʉlʉ,
ɨbho bhamanyilaje hubhaavwe abhafwɨle abha mu nyumba yaabho nasʉʉti.
Ɨsho sha bhahabhanje nanshi bhagalusya ziila abhapaafi bhaabho bhahabhabhombɨɨye.
Ɨsho sha shiila ʉNgʉlʉbhɨ agɨɨne.
5 Leelo,
ʉmʼfwɨle wowonti wa saga ali na bha humʼmwavwe,
ʉmwene asʉbhɨɨye hwa Ngʉlʉbhɨ mwene,
ahunʼnaabha pasanya na nʉsiku huje,
amʼmwavwaje.
6 Leelo,
ʉmʼfwɨle wa‑asʉngwa ɨzya mu nsi,
ʉmwene abha afwiye ʉmwoyo,
sha‑ali mwʉmi shimʼbɨlɨ.
7 Ɨnsundo ɨzyo,
ʉbhabhʉzyaje bha bhɨtɨɨshe huje bhagandi abhe bhantu bha‑ayangwe shibhiibhi.
8 Nkashele huli nʉ muntu wa saga ahubhaavwa abhaholo bhaakwe shɨ‑ɨhwanziwa,
haani abha pa khaaya yaakwe,
ʉyo abha alukhɨɨne ʉlwɨtɨho lwakwe,
nantele abha mʼmiibhi ashile ʉmuntu ʉyo saga mwoziwa.
9 Ʉnʼshɨ ʉmʼfwɨle wa‑akhondɨɨye asimbwe mu shitaabu ɨsha bhafwɨle bha bhahwanziwa hubhaavwe,
abhe afisiizye amaaha amashʉmi nʼtanda,
nantele ahegwilwe na‑akhale nʉ nʼnume waakwe ɨnsiku zyonti.
10 Abhanje amanyiishe huje,
ahabhombaga ɨmbombo ɨnyinza,
nanshi asʉnje abhaana bhaakwe shinza,
ahwejeelele abhajenu na hubhaavwe abhooziwa hu woloolo.
a Nantele,
abhanje amanyiishe huje,
ahabhavwaga bha bhali mu mayɨmba na hwifumye hu mbombo ɨzyɨnjɨ zyonti ɨnyinza.
11 Leelo,
abhafwɨle bha bhali bhalɨndu,
ɨbho ʉgandi hubhasimbe mu shitaabu ɨsho,
pɨpo huli na habhaazyo ha bhagaakhatwa nɨ nsʉngwo ɨzyɨ mabɨlɨ gaabho.
Ɨpo bhahayanda asʉngwe haani ahwegwe nantele,
ashile ahwifumye hwa Kilisiti.
12 Nkashele bhahuzileha zya bhahalapile huje bhanza hwifumye na humʼmombele ʉKilisiti sinta ahwegwe nantele,
bhanza hwiyeejele ʉlongwe.
13 Peeka nɨ‑ɨgo,
bhahayizobheelela abhale azyʉngʉʉle mu nyumba zya bhantu hu nongwa yɨ woolo.
Saga sha shɨɨsho sheene lwonti,
leelo bhahayiyangana shibhiibhi,
humo bhatʉʉha mu zya saga zikhondɨɨye,
na‑ayanje zya saga nyinza.
14 Ɨzyo zya zihumbɨɨha ayanje huje,
abhafwɨle bha bhali bhalɨndu bhegwaje.
Bhapaapaje abhaana sha bhasʉnga ɨnyumba zyabho huje,
bhasahɨnze humʼpeele ʉMʼmiibhi weetub idala ɨlya hutiyanje shibhiibhi.
15 Ɨyanga ɨsho,
pɨpo huli na bhafwɨle bhamo bha bhatejɨɨye mu zya Seetano.
16 Ʉnʼshɨ wowonti wa‑ayɨtɨɨshe,
nkashele ali na bhafwɨle mu nyumba yaakwe,
akhondɨɨye hubhaavwe huje,
ɨshibhanza shigandi abidiilwe.
Nkashele akhonzya ɨsho,
ɨpo ɨshibhanza shibha nzɨɨla hubhaavwe abhafwɨle bha saga bhali na bha hubhaavwe.
Zya zikhondɨɨye hwa bhagoosi abhɨ shibhanza
17 Abhagoosi bha bhalongozya shinza ɨshibhanza,
abha mu shibhanza bhakhondɨɨye huje,
bhabhanje nɨ nshɨnshɨ hwa bheene na hubhapeele ʉmʼposheelo habhɨɨlɨ hu mbombo yaabho.
Bhabhombaje ɨsho,
hahinji hwa bhaala bha bhahwifumya hubhalʉmbɨɨlɨle abhantu izwi lya Ngʉlʉbhɨ na hubhamanyizye,
18 pɨpo ɨsimbwilwe mu Nsimbo ɨMfinjile huje,
“Ʉgandi huyipinye ɨngʼombe ilomu hu habhaazyo ɨho ɨkhanyanga ɨngano asonzoole ɨnsanga pa lubhʉngʉlʉ.”
c Nantele,
ɨsimbwilwe huje,
“Ʉmʼmomba mbombo akhondɨɨye huje,
aposheelaje.”d
19 Nkashele ʉnʼgoosi ʉwɨ shibhanza ayangwa shibhiibhi hu nongwa zimo,
ʉsahɨtɨhaje sha bhasɨɨle asimishizye abhantu bhabhɨɨlɨ awe bhataatu.
20 Abhagoosi bha bhabhomba ɨmbiibhi,
ʉbhakhajilaje pa maaso ga bhantu bhonti aje,
bha bhasagala bhogopaje huzibhombe.
21 Ɨnsundo ɨzyo,
ɨhusunda pa maaso ga Ngʉlʉbhɨ,
pa maaso ga Yeesu ʉKilisiti na pa maaso ga bhantumi bhaakwe abhasalulwe huje,
ʉgabhombele sinta humʼmwɨmɨle weeka,
nantele sinta abagulanye abhantu.
22 Ʉgandi adigane humʼmɨɨshɨle ʉmuntu ɨnyoobhe huje,
abhe nʼgoosi.
Nkashele ʉmuntu ʉyo ali nɨ njendo ɨmbiibhi,
nawe ʉbhala‑abhe ʉli peeka mu mbiibhi zyakwe.
Ʉgandi ahwitʉʉsye mu mbiibhi,
leelo ʉbhanje nʼsangalusu.
23 Ahwande ɨshi,
ʉgandi amwele ga mɨnzɨ geene,
leelo ʉmwelaje nɨ divaayie hashe aje,
ɨtilizyaje pa vyanda,
pɨpo ʉbhinu wuhuweelela habhɨlɨ habhɨlɨ.
24 Ɨmbiibhi zya bhantu bhamo zili pa pazelu,
nantele zibhoneha pa pazelu sha bhasɨɨle alongwe nɨ ndajizyo.
Leelo,
ɨmbiibhi zya bhantu bhamo zyʉbhɨle,
pa zivunduha pamandɨ.
25 Ɨsho sha zili na hu mbombo ɨnyinza.
Ɨnyinji zili pa pazelu,
zimo zyʉbhɨle,
leelo zyahayibhɨɨhwa pa pazelu.