Ɨmanyizyo ɨzi‑ilenga mu nsiku ɨzi
4
ɄMʼpepo ʉMʼfinjile ahutibhʉʉzya pa pazelu huje,
pa nsiku ɨzya hu malishilo,
abhantu bhamo bhahayihululeha ʉlwɨtɨho.
Bhahayitejelezyaga amapepo ga gagobela na‑alondolezye ɨmanyizyo zyɨ mapepo ɨgo.
2 Ɨmanyizyo ɨzyo zimanyiziwa na bhantu bha bhayanga ɨzyɨ malenga hu gulugulu.
Ɨbho saga bhasaaga lwonti,
nantele saga bhali nʉ wuntu.
3 Bhahubhakhaana abhalume huje bhagandi ahweje,
na bhashɨ huje bhagandi ahwegwe.
Bhahubhalajizya abhantu huje,
bhasahaalye ɨvyalye vimo.
Leelo,
ʉNgʉlʉbhɨ yʉʉyo ahavipelile huje,
abhantu bha bhahumʼmwɨtɨha bhavyejelelaje hu nsalifyo,
pɨpo bhayimɨɨnye ɨlyoli.
4 Vyonti vya‑apelile ʉNgʉlʉbhɨ vinza,
navimo ɨvya‑akhaane.
Abhantu bhakhondɨɨye huvyejeelele na‑aje,
“Wasalipa Ngʉlʉbhɨ!”,
5 pɨpo visangalusiiwe ni‑izwi lyakwe na mu mpuuto.
Ʉmʼmomvi ʉmwinza ʉwa Yeesu ʉKilisiti
6 Ɨgo,
nkashele wabhabhʉʉzya abhaholo bheetu,
ɨpo ʉnza‑abhe mʼmomvi mwinza ʉwa Yeesu ʉKilisiti ʉyo ʉleliilwe shinza mu mazwi agɨ lwɨtɨho nɨ manyizyo ɨnyinza zyʉ‑ʉhuzyɨtɨha na‑alondolezye.
7 Leelo,
ɨvilaale vya saga vifuma hwa Ngʉlʉbhɨ na vya saga vikhondɨɨye huvyɨtɨshe,
ʉvikhaanaje vyonti.
Ʉhwilʉbhɨzyaje weewe abhe shiwooziwa,
8 pɨpo ʉmuntu nkashele ahugulʉbhɨzya ʉmʼbɨlɨ gwakwe haani huje,
gubhe ni‑ikhone,
abha nɨ ya pa mwanya hashe lwene.
Leelo,
nkashele ahwilʉbhɨzya abhe shiwooziwa,
ahuyaaga ɨya pa mwanya hu zyonti,
hu wʉʉmi ʉwa pa nsi ɨpa nʉ wɨ habhaazyo ɨho hahwɨnza.
9 Izwi ɨlyo lyɨ lyoli,
likhondɨɨye hulyɨtɨshe hu mwoyo gwonti.
10 Hu nongwa ɨyo,
tihwifumya abhombe ɨmbombo yaakwe,
pɨpo tihunʼsʉʉbhɨla yʉ Ngʉlʉbhɨ wa‑ali mwʉmi,
nantele wa‑ali Mʼfyʉli wa bhantu bhonti bha bhamʼmwɨtɨɨshe.a
11 Ɨgo ga naʼbhʉʉzya,
ʉbhamanyizyaje abhantu,
nantele ʉbhalajizyaje aje,
bhagabhombaje.
12 Ʉgandi ahwɨtɨshe huje,
pabhe nʉ muntu wa‑ahusyonshela pɨpo ʉli nʼsahaala.
Leelo,
ʉkhalaje shinza,
ʉfishile huje,
abhooziwa abhamwenyu bhamanyilaje hwaliiwe ɨshifwani,
hwɨ‑ɨzyo ʉyanga,
hu njendo zyaho,
hu kʉndwa waaho,
hu lwɨtɨho lwaho na hu sangalusu waaho.
13 Ʉhwifumyaje hubhabhaazizye abhantu ɨNsimbo ɨMfinjile,
nantele ʉbhajinjizyaje amooyo na hubhamanyizye.
Ʉjendeelele huzibhombe ɨzyo,
afishe mu habhaazyo ɨho nahayɨnza ʉhwo.
14 Ʉgandi aleshe hushibhombele ɨshikʉnjɨlwa ɨsho ʉNgʉlʉbhɨ sha‑ahaʼpiiye,
ahabhaazyo ɨho abhagoosi bhahaʼbhɨshɨɨye ɨnyoobhe zyabho na‑akuwe hu nongwa yaaho.