Zya zikhondɨɨye hwa bhakalwe bha bhali bhooziwa
6
Abhakalwe bhonti bhakhondɨɨye huje,
bhabhatinihaje abhagoosi bhaabho hu nshɨnshɨ yonti huje,
ʉNgʉlʉbhɨ peeka nɨ manyizyo zya timanyizya,
zigandi aligwe.
2 Nkashele abhagoosi bhaabho bhooziwa,
abhakalwe bhagandi hubhasyonshele,
pɨpo bhasi bhaholo bhaabho mwa Kilisiti.
Leelo,
bhakhondɨɨye huje,
bhonjezyaje hubhabhombele shinza,
pɨpo ɨbho bha bhabha nɨ zya pa mwanya mu mbombo yaabho,
bhabha bhooziwa bhamwabho,
nantele bhakʉndwe bhaabho.
Amazwi ɨgo,
ʉbhamanyizyaje abhantu bhonti mu shibhanza,
na hubhakhajiilizye gɨnɨɨgo.
Abhamanyizyi abhi‑ilenga
3 Huli abhantu bha bhamanyizya amazwi agi‑ilenga,
ɨgo saga gahwɨtɨɨhana na mazwi agɨ lyoli aga Mwɨnɨ weetu ʉYeesu ʉKilisiti,
awe ɨmanyizyo ɨzyɨ shiwooziwa.
4 Ɨbho bhahwibaada lwene,
saga bhazimɨɨnye nazimo,
bhahwanza adaliihane hu mazwi ga saga gali na hantu.
Ʉwo wʉ wandilo wa bhantu abhe nɨ jɨɨla,
ibho nɨ ndigo,
hubhasɨbhɨɨlɨle shibhiibhi abhamwabho,
5 na‑adaliihane na bhamwabho habhɨlɨ habhɨlɨ.
Abhantu bha bhali nanshi ɨbho,
zya bhasɨɨbha mbiibhi,
saga bhali nɨ lyoli.
Bhasɨɨbha aje,
ahwilɨngaanisye na bhooziwa,
bhagazyaga ɨzya pa mwanya.
6 Leelo,
lyoli huje,
abhooziwa bhonti bhahuzyaga ɨzya pa mwanya ɨngoosi,
nkashele bhahobhoha mu mooyo gaabho hwa vya bhali navyo.
7 Lwa tahapapwaga mu nsi ʉmu,
saga tahɨnzɨle na hantu hohonti.
Shɨnɨɨsho,
nahamo ahantu ha tahayeega lwa tisogola mu nsi ʉmu.
8 Ɨshi,
nkashele tabha nɨ vyalye na menda,
tihobhohaje nɨ‑ɨvyo mu mooyo geetu.
9 Abhantu bha bhahwanza ɨshʉʉma huje,
bhabhe bhatabhazi,
bhahwitʉʉsya mu njelo na‑akhatwe mu lwonzo nɨ nsʉngwo ɨnyinji ɨzyɨ lema.
Ɨnsʉngwo ɨzyo zihubhakwesanjila mu nanjisu,
bhamalishila ʉmwo.
10 Ɨyanga ɨsho,
pɨpo huzigane ɨmpɨɨya,
wʉ wandilo wɨ mbiibhi zyonti.
Bhalɨɨho bhamo bha bhazigɨɨne haani ɨmpɨɨya,
zibhabhɨɨshɨle huje,
bhaluleshe ʉlwɨtɨho lwabho,
bhavwalaziizye amooyo gaabho hu zugumizu haani.
ɄPaulo ahunʼsunda ʉTiimoti
11 Leelo,
aawe wʉmuntu wa Ngʉlʉbhɨ,
ʉzishɨmbɨlaje ɨzyo zyonti.
Ʉhwifumyaje abhombe zyonti ɨzi ɨpa,
ʉgolosu,
ɨnjendo ɨnyinza pa maaso ga Ngʉlʉbhɨ,
ʉlwɨtɨho,
ʉkʉndwa,
ʉjimbiilizu na hwiyiisye.
12 Ʉhwifumyaje haani mu lʉgʉ ʉwinza ʉwa‑alwɨle ʉlwɨtɨho huje,
ʉhawaaje ʉwʉʉmi ʉwa wiila.
Ʉwʉʉmi ʉwo wa wuula wa wahakwiziiwe nʉ Ngʉlʉbhɨ,
ʉhɨtɨɨshe ʉlwɨtɨho lwaho hwa Yeesu pa maaso ga bhasimishizi abhinji.
13 Ɨhulajizya pa maaso ga Ngʉlʉbhɨ wa‑ahuvipeela vyonti ʉwʉʉmi,
na pa maaso ga Yeesu ʉKilisiti wa‑ahafumiizye ʉsimishizi ʉwinza pa maaso ga Pontiyo Pilaato,a
14 ʉzitinihaje ɨndajizyo ɨzyo sinta ananje,
na‑afishe pi‑isiku liila ʉMwɨnɨ weetu ʉYeesu ʉKilisiti lwa‑ahayɨnza nantele.
15 Ahwɨnze hwakwe ʉhwo hwahayibha mu habhaazyo ɨho ʉNgʉlʉbhɨ yʉʉyo ahabhɨɨshɨle.
ɄNgʉlʉbhɨ wɨ nsayo,
nantele yʉʉyo alongozya!
Yʉ Nʼgoosi wa bhagoosi abhɨ nsi yonti,
nantele yʉ Mwɨnɨ wa bhamwɨnɨ.
16 Yʉʉyo mwene wa saga afwa,
akhala mu lukhozyo ʉlukhali ʉlwo nʉʉmo wa‑agaluzʉmbɨɨlɨla.
Saga alɨɨho ʉmuntu wa‑anʼnolile,
saga alɨɨho wa‑abhajiiye hunʼnole.
Ayambɨlɨlaje ɨnshɨnshɨ ni‑ikhone wiila!
Aameni!
Ɨnsundo zya Paulo hwa bhatabhazi
17 Ʉbhabhʉzyaje bha bhali bhatabhazi mu nsi ʉmu huje,
bhagandi hwibaade.
Nantele,
bhagandi asʉʉbhɨle ɨvintu vya bhali navyo,
vya vili vya mu nsi ʉmu,
vyabho hu habhaazyo hashe lwene.
Ʉbhabhʉzyaje huje,
bhanʼsʉbhɨlaje ʉNgʉlʉbhɨ wa‑ahutipeela ɨvintu vyonti hu winji huje,
tiviseshelaje.
18 Nantele,
ʉbhabhʉzyaje huje,
bhabhombaje ɨnyinza hahinji.
Bhabhavwaje abhantu abhanjɨ mu vintu vyabho hu mwoyo ʉgwɨ mpyana.
19 Ɨsho sha bhahayibha bhahwibhɨshɨɨye ɨzyɨ habhaazyo ɨho hahwɨnza,
zya zyahayibha lwalo ʉlwa hubhakhamantanye huje,
bhahawaaje ʉwʉʉmi ʉwa wiila na wiila.
Amazwi aga hu malishilo
20 Aawe wʉTiimoti,
ɨmbombo ɨya hubhamanyizye abhantu ɨlyoli ɨyo ʉNgʉlʉbhɨ ya‑aʼpiiye,
ʉdandamalaje huyibhombe shinza.
Ʉhwiyefwaje mu nongwa ɨmfwasu zya saga zifuma hwa Ngʉlʉbhɨ.
Hwope nkashele ziyangwa huje,
zyɨ manyiihanyi,
leelo saga zyɨ lyoli lwonti,
zya‑anangaanye ɨlyoli.
21 Bhalɨɨho abhantu bhamo bha bhahwibaada huje,
bhali nʉ manyi ʉwo,
leelo wubhateziizye huje,
bhaleshe ahwɨtɨshe ɨlyoli.
Ɨmpyana ɨya Ngʉlʉbhɨ ɨbhanje peeka naamwɨ mwenti.