Mugandi hubhalonje abhooziwa abhamwenyu
14
Mumʼmwambɨɨlɨle ʉmwoziwa ʉwamwenyu ʉyo saga ajinile mu lwɨtɨho.
Mugandi adaliihane nawo hu nongwa ɨya‑alegane ɨnsɨɨbho nʉ mwene.
2 Ʉmuntu ʉyo ajinile mu lwɨtɨho alola huje abhajiiye alye hohonti haala,
leelo ʉwɨnjɨ ʉyo saga ajinile mu lwɨtɨho asɨɨbha huje ʉlwɨtɨho luhumʼmwɨtɨshɨla alye ɨnyenyi ɨzyɨ vilemba lwene.
3 Ʉmuntu ʉyo alya hohonti haala,
agandi hunʼsyonshele ʉyo alya ɨnyenyi ɨzyɨ vilemba lwene.
Ʉmuntu ʉyo alya ɨnyenyi ɨzyɨ vilemba lwene,
wope agandi hunʼnonje ʉwɨnjɨ ʉyo alya hohonti haala,
pɨpo ʉNgʉlʉbhɨ amʼmwɨtɨshɨɨye nanshi sha‑ali.
4 Aawe saga ʉli ni‑ikhone lyolyonti ɨlya‑alonje ʉmʼmomvi ʉwa muntu ʉwɨnjɨ.
Ʉmwɨnɨ waakwe ya yʉʉyo amanya nkashele ʉmʼmomvi waakwe ananjile awe saga ananjile.
Wope ʉmʼmomvi waakwe ahayibha abhomba nanshi shɨ‑ɨhwanziwa,
pɨpo ʉMwɨnɨ ʉYeesu ali ni‑ikhone ɨlya humʼmɨɨshe huje abhe abhomba ɨsho.
5 Ʉmuntu ʉwɨnjɨ alola isiku lyeka lili linza ashile ɨnsiku ɨzyɨnjɨ,
leelo ʉmuntu ʉwɨnjɨ alola ɨnsiku zyonti zilɨngaana.
Shila muntu abhe abhomba nanshi ɨsho alola yʉʉyo.
6 Ʉmuntu ʉyo alola isiku lyeka huje linza,
abhomba ɨsho hu nongwa ɨya hunʼkhondeezye ʉMwɨnɨ ʉYeesu.
Wope ʉyo alya hohonti,
abhomba ɨsho hu nongwa ɨya hunʼkhondeezye ʉMwɨnɨ ʉYeesu.
Saga abhajiiye alye hohonti sinta hunʼsalifye ʉNgʉlʉbhɨ.
Wope ʉyo alya ɨnyenyi ɨzyɨ vilemba lwene,
abhomba ɨsho hu nongwa ɨya hunʼkhondeezye ʉMwɨnɨ ʉYeesu,
wope ahayibha ahunʼsalifya ʉNgʉlʉbhɨ ɨsho.
7 Ɨnjanjile ɨsho,
pɨpo nʉʉmo ʉmwoziwa ʉyo akhala hu nongwa yaakwe yʉʉyo,
awe ʉmwoziwa ʉyo afwa hu nongwa yaakwe yʉʉyo.
8 Nkashele tibha bhʉʉmi,
tilemba hu nongwa ya humʼmombele ʉMwɨnɨ ʉYeesu.
Nantele nkashele tifwa,
tifwa hu mwamu ʉwa Mwɨnɨ ʉYeesu.
Ɨshi,
nkashele tibha bhʉʉmi awe tifwa,
atɨ tibha bhantu bhaakwe.
9 ɄKilisiti ahafwiye na‑azyʉshe,
ɨshi ali mwʉmi,
huje ʉmwene abhe Mwɨnɨ wa bhantu bhonti,
abhafwe na bha bhali bhʉʉmi.
10 Ɨshi,
aawe we naanu wʉ‑ʉhunʼnonga ʉmwoziwa ʉwamwenyu?
Nantele,
yeenu ʉhunʼsyonshela?
Atɨ tenti tahayɨmɨɨlɨla pitagaalila lya Ngʉlʉbhɨ huje tilongwe.
11 Nanshi ɨsho ɨsimbwilwe mu Nsimbo ɨMfinjile huje,
“Lyoli,
ʉMwɨnɨ ʉNgʉlʉbhɨ ayanga huje,
‘Shila muntu ahayisugamila pitagaalila lyanɨ,
na‑ayanje pa pazelu huje anɨ nɨ Ngʉlʉbhɨ.’ ”a
12 Ɨshi,
shila muntu muuhati yeetu,
ahayiyanga yʉʉyo ɨnongwa zyakwe pitagaalila lya Ngʉlʉbhɨ.
Ʉgandi hunʼsonzye ʉmwoziwa ʉwamwenyu huje abhombe ɨmbiibhi
13 Ɨshi,
ɨhwanziwa tileshe alonje abhooziwa abhamwetu,
nantele taamule aleshe abhombe hohonti ha hahunʼsonzya ʉmwoziwa ʉwamwetu abʉmɨle awe abhombe ɨmbiibhi.
14 Afumilane nɨ manyizyo zya Mwɨnɨ ʉYeesu ɨmɨɨnye hu lyoli huje nashimo ɨshalye shoshonti ɨshaavu.
Leelo,
ʉmuntu nkashele alola ɨshalye shimo huje shaavu,
ɨpo ɨshalye ɨsho shibha shaavu hwa mwene.
15 Ɨshi,
nkashele aawe ʉhunʼzugumizya ʉmwoziwa ʉwamwenyu lwʉ‑ʉlya ɨshalye shimo,
lyoli ɨpo aawe ʉbha saga ʉli nʉ kʉndwa hwa wamwenyu ʉyo.
Ɨshi,
ʉgandi ahwɨtɨshe nka hashe huje hwi‑idala ɨlyɨ shalye shaaho ʉteezye ʉmuntu ʉyo ʉKilisiti ahamʼfwɨlɨɨye!
16 Ɨshi,
aawe ʉgandi abhombe ahantu ɨho ʉhuhalola hinza,
habhe hayangwa na bhanjɨ huje hali hantu habhiibhi.
17 Ɨnongwa ɨzyɨ wumwɨnɨ ʉwa Ngʉlʉbhɨb saga nongwa zya‑alye awe amwele,
lyoli nongwa zya‑abhombe ʉgolosu,
abhe nʉ tengaanu na‑alembe hu luseshelo.
Ɨgo gonti gabhombeha hu nyaavwo ɨya Mʼpepo ʉMʼfinjile.
18 Ʉmuntu wowonti ʉyo ahumʼmombela ʉKilisiti ɨsho,
ahunʼkhondeezya ʉNgʉlʉbhɨ,
nantele ahwɨtɨshɨlwa na bhantu.
19 Ɨshi,
tidandamalaje hu habhaazyo honti abhombe ɨvintu ɨvyo vihutisonzya ʉtengaanu nɨ‑ɨvyo vihutaavwa ajinjizanye atɨ tenti mu lwɨtɨho lwetu.
20 Ʉgandi anangaanye ɨmbombo ɨya Ngʉlʉbhɨ hu nongwa yɨ shalye.
Ɨvyalye vyonti vinza alye,
leelo shibhiibhi hwa muntu alye ɨshalye shoshonti ɨsho shibhajiiye humʼmwazye ʉmwoziwa ʉwamwetu huje abhombe ɨmbiibhi.
21 Shinza aleshe alye ɨnyama,
awe amwele ɨdivaayi,
c awe abhombe hohonti ha hahunʼsonzya abʉmɨle ʉmwoziwa ʉwamwenyu.
22 Ɨnsɨɨbho ɨzyo ʉli nazyo hu nongwa yɨ vyalye ɨbhe nongwa yaaho nʉ Ngʉlʉbhɨ waaho.
Ali hwashi ʉmuntu ʉyo saga ahwilola huje mʼmomba mbiibhi,
hu habhaazyo abhomba ɨgo ahugalola huje minza.
23 Leelo,
ʉyo ahwiyoogofya mu mwoyo hu nongwa yɨ shalye ɨsho alya,
ahayilongwa nʉ Ngʉlʉbhɨ,
pɨpo amanya huje liila ɨlyo abhomba libhiibhi pitagaalila lya Ngʉlʉbhɨ.
Ʉmuntu nkashele abhomba ahantu hohonti ɨho saga ahwɨtɨha huje hali hɨ lyoli,
amanye huje ʉhwo hubhombe mbiibhi.