Bhatinihaji abhalongozi abhɨ silikaali
13
Shila muntu ahwanziwa ahwiyisyaje hu bhalongozi abhɨ silikaali.
Mumanye huje,
ikhone lyabho lyonti ɨlya‑alongozye lifuma hwa Ngʉlʉbhɨ,
nantele bhonti bhabhɨhwɨlwe nʉ Ngʉlʉbhɨ.
2 Ɨshi,
ʉmuntu wowonti ʉyo akhaana ikhone lyabho,
ahunʼkhaana yʉ Ngʉlʉbhɨ ʉyo abhabhɨɨshɨle ɨbho.
Ʉmuntu ʉyo ahunʼkhaana ʉmwene,
ahwibhɨɨha mu longwe lwakwe.
3 Abhalongozi saga bhahumʼmwogofya ʉmuntu wa‑abhomba ɨnyinza,
lyoli ʉyo abhomba ɨmbiibhi.
Ɨshi,
nkashele ʉhwanza huje ʉgandi humʼmwogope ʉnʼnongozi,
ʉbhanje ʉbhomba ɨnyinza,
wope anza humwamishe.
4 Ʉnʼnongozi ʉwɨ silikaali mʼmomvi wa Ngʉlʉbhɨ hu nongwa ɨya hubhaavwe amwɨ.
Leelo,
nkashele ʉbhombe ɨmbiibhi,
ɨpo ʉkhondɨɨye ahwogope,
pɨpo ʉmwene ali ni‑ikhone ɨlya‑afunde.
Ʉmwene abhomba ɨmbombo ɨya Ngʉlʉbhɨ hubhafunde ɨbho bhabhomba ɨmbiibhi.
5 Ɨshi,
muhwanziwa ahwiyiisye hu bhalongozi.
Mugandi ahwiyiisye lwene hwa hwogope afundwe nabho,
leelo muhwiyisyaje pɨpo mumɨɨnye mu mooyo geenyu huje shinza abhombe ɨsho.
6 Nantele,
hulimanye ɨlyo,
sha shɨɨsho musomba ɨsonko.
Abhalongozi abhɨ silikaali ɨbho bhahwidandamiha abhombe ɨmbombo yaabho,
bhahumʼmombela yʉ Ngʉlʉbhɨ yʉʉyo.
7 Ɨshi,
mubhabhombelaje abhalongozi ɨgo bhakhondɨɨye abhombelwe.
Nkashele muhwɨsɨwa ɨsonko,
ɨshi sombaji.
Nantele nkashele mukhondɨɨye ahunʼtinishe ʉmuntu,
wope nʼtinihaji.
Ɨmanyizyo hu nongwa ya bhantu aganane bhɨɨbho hu bhɨɨbho
8 Mugandi ahwɨsɨwe hohonti nʉ muntu wowonti,
lyoli muhwanziwa aganane mwɨmwɨ hu mwɨmwɨ.
Ʉyo ahunʼgana ʉwamwabho ahayibha abhomba nanshi ɨndajizyo zya Ngʉlʉbhɨ sha zilajizya.
9 Enya,
ɨndajizyo ziyiga,
ʉgandi abhembushe,
ʉgandi agoje,
ʉgandi ahwibhe,
nantele ʉgandi anyonywe ahantu aha mʼpalamani waaho.
a Leelo,
ɨndajizyo ɨzi nɨ zyɨnjɨ zyonti zili muuhati yɨ ndajizyo yeeka ɨyo ɨyiga,
“Ʉnʼganaje ʉmʼpalamani waaho nanshi shʉ‑ʉhwigana aawe.”b
10 Ʉmuntu wa‑ahunʼgana ʉmʼpalamani waakwe,
saga ahumʼmombela shibhiibhi.
Ɨshi,
ʉmuntu wa‑ahubhagana abhantu abhanjɨ,
ahayibha abhomba nanshi ɨndajizyo zya Ngʉlʉbhɨ sha zilajizya.
11 Muhwanziwa abhombe ɨgo gonti pɨpo mumɨɨnye huje,
ɨsaala ɨya‑adaamushe ɨfishile.
Enya,
ahabhaazyo ahɨ fyʉli weetu hali mu pɨɨpɨ tee,
ashile hu wandilo ɨpo tahandile humʼmwɨtɨshe ʉMwɨnɨ ʉYeesu.
12 Ɨshi huli nanshi ʉsiku wumaliishe,
nantele nanshi isiku ijenu lipalamiiye ahwande.
Ɨshi,
tileshe ɨnjendo ɨmbiibhi ɨzyo abhantu bhabhomba mu hiisi,
na hweje ɨvilwɨlo ɨvyɨ lukhozyo.
13 Tibhe nɨ njendo ɨnyinza nanshi abhantu bha bhalemba mu lukhozyo ʉlwi‑isiku ipya.
Tigandi abhe bhantu abha‑abhombe ɨshikulukulu ɨsha‑amwele ɨhombwa na‑akholwe.
Tigandi abhombe ʉweegu wowonti awe abhombe ɨmbombo ɨzyɨ nsoni,
awe abhe bhi‑ibho awe abhe bhɨ jɨɨla.
14 Lyoli ɨshi,
mu lemvu weenyu wonti,
mulongozewaaje nʉ Mwɨnɨ ʉYeesu ʉKilisiti.
Mugandi ahwɨtɨshe nka hashe alongozewe nɨ nsʉngwo zyenyu ɨmbiibhi.