ABhaluumi 9

Ʉbhaavi wa Paulo hu nongwa ya Bhaizilaeeli

Ɨyanga ɨlyoli nyeene, anɨ wɨ‑ɨmpatihɨɨnywe nʉ Kilisiti. Hwope ɨnsɨɨbho zyanɨ ɨzyo zilongozewa nʉ Mʼpepo ʉMʼfinjile, zyope zihunsimishizya huje saga ɨyanga ilenga. 2 Lyoli, anɨ ɨndi nʉ zugumizu tee na mavune ɨgo saga gamaliha mu mwoyo gwanɨ, 3 hu nongwa ya bhantu abhɨ nsi yaanɨ. Enya, nkashele wabhanga kʉndwe waanɨ, anɨ nɨtɨhaga agunwe na‑asambushilwe nʉ Kilisiti, nkashele abhombe ɨsho hwɨnzaga hubhaavwe aBhayahuudi abhamwetu bhamʼmwɨtɨshe ʉKilisiti. 4 Ɨbho bha Bhaizilaeeli, abhantu ɨbho ʉNgʉlʉbhɨ ahabhasaluuye bhabhe bhaana bhaakwe, ahabhalolesiizye ʉmwamu waakwe na‑abhɨɨshe amalagano nabho. Nantele ahabhapeela ɨndajizyo zyakwe, ɨndapo zyakwe, nɨ‑ɨsho ɨhwanziwa humʼpuute. 5 ABhaizilaeeli ɨbho bha bhɨɨbho bhamaama bha Abulahaamu, ʉIsaaka nʉ Yaakobo. Shimʼbɨlɨ, wope ʉMʼfyʉli ahafumile mu shikholo ɨsho. ɄKilisiti ʉyo yʉ Ngʉlʉbhɨ, Nʼgoosi wa vyonti, asayiwaaje wiila! Aameni.

6 Hwope ɨsho, saga ɨyanga huje ʉNgʉlʉbhɨ ahameniilwe abhombe ʉlufingo lwakwe hwa Bhaizilaeeli. Ndaali, pɨpo saga Bhaizilaeeli bhonti ɨbho bhasalulwe bha Ngʉlʉbhɨ. 7 Awe saga huje ɨmpaapo yonti ɨya Abulahaamu bha bhaana bhɨ lyoli. Ndaadi! Lyoli, ʉNgʉlʉbhɨ ahanʼnapiiye ʉAbulahaamu huje, “Ɨmpaapo yaaho yahayifuma hwa Isaaka.” 8 Ɨnjango yaakwe ɨyo hwa huje, abhaana bha Ngʉlʉbhɨ bha bhɨɨbho bhaana bha Abulahaamu, bha bhɨɨbho bhahapapwilwe alɨngaane nʉ lufingo lwa Ngʉlʉbhɨ. Leelo, abhaana bha bhahapapwilwe alɨngaane nɨ‑ɨsho ahanzaga Abulahaamu shimʼbɨlɨ, saga bhabhaaziwa huje bhaana bha Ngʉlʉbhɨ. 9 Ʉlufingo ʉlwo luyiga ɨshi, “Nahayiweela ʉmwaha ʉgwo guhwɨnza hu habhaazyo nanshi ɨha, wope ʉSaala ahayibha nʉ mwana ʉwɨ shilume.”

10 Leelo saga ɨlyo lwene, lyoli wope ʉLebeka ahapɨɨpe nʉ maama weetu ʉIsaaka abhaana bhabhɨɨlɨ amapasa. 11-12 Leelo abhaana ɨbho lwa bhasɨɨle abhombe hohonti, habhe hinza awe habhiibhi, hwope hu habhaazyo lwa bhasɨɨle apaapwe, ʉNgʉlʉbhɨ ahamʼmʉʉzya ʉLebeka ahaga, “Ʉnʼgoosi ahayihumʼmombela ʉnʼdoodo.” Ɨnongwa ɨyo ɨlolesya huje ʉNgʉlʉbhɨ asalula ʉmuntu alɨngaane nɨ nsɨɨbho zyakwe, saga alɨngaane nɨ njendo zya muntu ʉla. 13 Ɨnɨ ɨli nanshi shɨ‑ɨsimbwilwe mu Nsimbo ɨMfinjile huje, “ɄYaakobo nahanʼgɨɨne, leelo ʉEsawu nahanʼkhaanile.”

ɄNgʉlʉbhɨ abhomba nanshi sha‑agɨɨne

14 Ɨshi tiyanje yeenu? Tije ʉNgʉlʉbhɨ saga nʼgolosu? Ndaali! 15 Enya ʉNgʉlʉbhɨ ahamʼmʉzɨɨzye ʉMoose ahajile,

“Anɨ ɨnza hunʼnolele ɨnkʉmbʉ ʉmuntu wowonti ʉyo ɨhwanza hunʼnolele ɨnkʉmbʉ,

nantele ɨnza hunʼsaajile ʉmuntu wowonti ʉyo ɨhwanza hunʼsaajile.”

16 Ɨshi, ʉNgʉlʉbhɨ ya yʉʉyo ahwamula hunʼnolele ɨnkʉmbʉ ʉmuntu, saga afumilane nʉ dandamazu awe hwa hwigane ʉmuntu yʉʉyo. 17 Ɨyanga ɨsho pɨpo, mu Nsimbo ɨMfinjile ʉNgʉlʉbhɨ ahamʼmʉzɨɨzye ʉFalaawo ahajile, “Nahaʼbhɨɨshɨle ʉbhe mwɨnɨ, huje hwi‑idala lyaho ɨmbalolesye abhantu ikhone lyanɨ na huje itaawa lyanɨ libhe lilʉmbɨɨlɨlwa ɨnsi zyonti.” 18 Ɨshi, ʉNgʉlʉbhɨ ahunʼnolela ɨnkʉmbʉ ʉmuntu wowonti nanshi ɨsho asʉngwa, na humʼmɨɨshe ʉmuntu abhe nʉ mwoyo ʉnʼkhome nanshi ɨsho asʉngwa.

19 Lumo ʉnza humbʉzɨɨlɨzye huje, “Nkashele sha shɨɨsho zili, yeenu ʉNgʉlʉbhɨ ahutilonga? Weenu abhajiiye azijile ʉkʉndwe wa Ngʉlʉbhɨ?” 20 Ndaali! Aawe wʉmuntu, we naanu wʉ‑ʉdaliihana nʉ Ngʉlʉbhɨ? Wɨlɨ, ahantu ha hapeliilwe habhajiiye wɨlɨ alwe nʉ‑ʉyo ahapelile na‑abhʉzɨɨlɨzye huje, “Yeenu ʉmpelile anɨ ɨshi?” 21 Ʉmʼmʉmba nsonta ali ni‑ikhone ɨlya‑abhombele ʉlongo sha‑agɨɨne. Abhajiiye abhʉmbe ɨnsonta zibhɨɨlɨ afume mu longo gwʉgwo gweka, ɨnsonta yeeka ɨbhe yɨ mbombo ɨyɨ mwamu, nɨ yamwabho ɨbhe yɨ mbombo ɨya pa nsi.

22 Sha shɨɨsho zili hwa Ngʉlʉbhɨ. Ahanzaga hubhalolesye abhantu ilyoyo lyakwe ni‑ikhone lyakwe, leelo ahabhajimbiliiye tee bhaala ɨbho bhali nanshi ɨnsonta ɨbho ahabhasɨbhɨlɨɨye hubhafunde. 23-24 Nantele, pɨpo ʉNgʉlʉbhɨ ahanzaga hutilolesye ʉmwamu waakwe ʉgoosi, ahatisaluuye tenti, aBhayahuudi nɨ‑ɨbho saga Bhayahuudi, huje atilolele ɨnkʉmbʉ, pɨpo ahatilɨngɨɨnye huje tambɨɨlɨle ʉmwamu peeka nawo. 25 Ɨsho sha shɨɨsho ʉNgʉlʉbhɨ ayanga mu shitaabu ɨsha nʼkuwi ʉHoseya huje,

“Bhaala ɨbho saga bhantu bhaanɨ,

ɨnza hubhakwizye huje, ‘Bhantu bhaanɨ.’

Abhantu ɨbho saga nahabhagɨɨne,

ɨnza hubhakwizye huje, ‘Bhantu bhaanɨ ɨbho ɨmbagɨɨne.’ ”

26 Nantele,

“Apantu ɨpo abheene bhahali bhakwiziwa huje,

‘Amwɨ saga muli bhantu bhaanɨ,’

ɨpo pa pɨɨpo bhahayibha bhakwiziwa huje,

‘Bhaana bha Ngʉlʉbhɨ wa‑ali mwʉmi.’ ”

27 Wope ʉnʼkuwi ʉYesaaya ayanga ɨshi hu nongwa ya Bhaizilaeeli huje,

“Hwope nkashele aBhaizilaeeli bhinji nanshi ʉnʼsanga ʉgwa munshɨnjɨ yɨ nsʉmbi,

hwope ɨsho bhadoodo lwene ɨbho bhahayifyʉlwa.

28 ɄMwɨnɨ ʉNgʉlʉbhɨ ahayihubhayazya abhantu bhonti abha mu nsi ɨnɨ, sinta akhaabhe,

nanshi ɨsho ahayanjile.”

29 Ɨshi nanshi ɨsho ʉnʼkuwi ʉYesaaya ahayanjile apantu apanjɨ huje,

“Nkashele saga abhanga yʉ Mwɨnɨ ʉwi‑ikhone lyonti asagazye ɨmpaapo ɨya Bhaizilaeeli,

tabhanga tiyaziiwe nanshi abhantu abhɨ mabooma agɨ Sodoma nɨ Gomola.”

Ahantu ɨho habhabhombile aBhaizilaeeli huje bhagandi abhaaziwe ʉgolosu

30 Wɨlɨ, ɨgo gonti hwa huje wɨlɨ? Hwa huje, abhantu ɨbho saga Bhaizilaeeli saga bhahabajile huwaaje ʉgolosu, leelo ʉNgʉlʉbhɨ ahabhabhaziziizye ʉgolosu hwi‑idala ɨlya humʼmwɨtɨshe ʉKilisiti. 31 Nantele hwa huje, aBhaizilaeeli ɨbho bhahali bhabhomba ʉdandamazu alondolezye ɨndajizyo huje bhabhaaziwe ʉgolosu, leelo abheene saga bhahabhaziiwe ʉgolosu. 32 Yeenu saga bhahabhaziiwe ʉgolosu? Saga bhahabhaziiwe, pɨpo bhahasʉbhɨɨye ɨnjendo zyabho, bhahaleha humʼmwɨtɨshe ʉKilisiti. Hwi‑idala ɨlyo bhahabha bhabʉmɨla mwi‑iwe liila igoosi na‑agwe. 33 Nanshi ɨsho ɨsimbwilwe mu Nsimbo ɨMfinjile huje,

“Enya, ʉhwo hwi‑ibooma ɨlyɨ Sayuuni ɨmbɨɨshɨle iwe.

Iwe ɨlyo lya lyɨlyo abhantu bhahayibʉmɨla,

ɨlyo liwe lya lyahayihubhabhomba abhantu bhagwanje.

Leelo ʉmuntu wowonti ʉyo ahumʼmwɨtɨha ʉyo ya yʉʉyo liwe ɨlyo,

saga ahayikenyensewa lwonti!”