Alongozewe nʉ Mʼpepo ʉMʼfinjile
8
Ɨshi,
nalumo ʉlongwe ʉlwɨ lufundo hwa bhaala bha bhapatihɨɨnywe nʉ Yeesu ʉKilisiti.
2 Enya,
hwi‑idala ɨlya‑apatiihanywe nʉ Yeesu ʉKilisiti,
ikhone lya Mʼpepo ʉMʼfinjile ʉyo afumya ʉwʉʉmi ʉwa wiila,
libhabhɨɨshɨle mubhe bhaawusu afume mwi‑ikhone lyɨ mbiibhi nʉ fwe.
3 Ɨndajizyo zya Moose zyahali saga zili ni‑ikhone ɨlya hutibhɨɨshe bhaawusu,
hu nongwa yɨ wuntu weetu ʉwɨ mbiibhi.
Leelo ɨgo ɨndajizyo zyahapotiilwe abhombe,
ʉNgʉlʉbhɨ ahabhombile.
Ahanʼsonteleziizye ʉMwana waakwe ʉnʼkʉndwe abhe nʉ mʼbɨlɨ ʉgwa muntu huje abhe nsangu.
a Hwi‑idala ɨlyo ʉNgʉlʉbhɨ ahalonjile ɨmbiibhi mu mʼbɨlɨ ʉgwo.
4 ɄNgʉlʉbhɨ ahabhombile ɨsho huje gonti ga gali gɨ golosu ɨgo gahwanziwa mu ndajizyo,
gabhombwe muuhati yeetu,
atɨ ta saga tilongozewa nʉ wuntu ʉwɨ mbiibhi,
lyoli ta tilongozewa nʉ Mʼpepo ʉMʼfinjile.
5 Enya,
bha bhalongozewa nʉ wuntu waabho ʉwɨ mbiibhi,
ɨnsɨɨbho zyabho zisʉngwa abhombe ɨmbiibhi.
Leelo,
bha bhalongozewa nʉ Mʼpepo ʉMʼfinjile,
ɨnsɨɨbho zyabho zisʉngwa abhombe ɨmbombo ɨzyo zihunʼkhondeezya ʉMʼpepo ʉMʼfinjile ʉyo.
6 Ʉmuntu ʉyo alongozewa nʉ wuntu waakwe ʉwɨ mbiibhi,
ahuwaaga ʉfwe ʉwa wiila.
Lyoli,
ʉmuntu ʉyo alongozewa nʉ Mʼpepo ʉMʼfinjile,
ali nʉ wʉʉmi ʉwa wiila nantele ali nʉ tengaanu.
7 Abhantu bha bhalongozewa nʉ wuntu ʉwɨ mbiibhi,
ɨbho bhahwibhɨɨha abhe bhalʉgʉ bha Ngʉlʉbhɨ,
saga bhahwɨtɨha alondolezye ɨndajizyo zyakwe,
nantele saga bhabhajiiye huzilondolezye.
8 Abhantu ɨbho bhalongozewa nʉ wuntu ʉwɨ mbiibhi,
saga bhabhajiiye ahunʼkhondeezye ʉNgʉlʉbhɨ.
9 Leelo amwɨ nkashele ʉMʼpepo ʉwa Ngʉlʉbhɨ akhala muuhati yeenyu,
amwɨ saga mulongozewa nʉ wuntu ʉwɨ mbiibhi,
lyoli mulongozewa nʉ Mʼpepo ʉyo.
Ʉmuntu wowonti ʉyo saga ali nʉ Mʼpepo ʉwa Kilisitib mu mwoyo gwakwe,
ʉyo saga muntu wa Kilisiti.
10 Leelo nkashele ʉKilisiti akhala muuhati yeenyu,
ʉMʼpepo ʉMʼfinjile ahubhapeela ʉwʉʉmi,
pɨpo ʉNgʉlʉbhɨ abhabhaziziizye amwɨ ʉgolosu,
hwope nkashele amabɨlɨ geenyu gafwe hu nongwa yɨ mbiibhi.
11 Nkashele ʉMʼpepo ʉwa Ngʉlʉbhɨ ʉyo ahanʼzyʉsyɨzye ʉYeesu ʉKilisiti afume hwa bhafwe akhala muuhati yeenyu,
lyoli wope ahayihugazyʉsya amabɨlɨ geenyu ɨgo gafwa pɨpo akhala muuhati yeenyu.
12 Ɨshi bhooziwa bhamwetu,
atɨ saga tihwanziwa alembe hwa‑alongozewe nʉ wuntu weetu ʉwɨ mbiibhi.
13 Enya,
nkashele muli nʉ lemvu ʉwo wulongozewa nʉ wuntu ʉwɨ mbiibhi,
mwahayiyaziwa.
Lyoli,
hwi‑ikhone lya Mʼpepo ʉMʼfinjile,
nkashele muleshe abhombe ɨnjendo ɨzyo ʉwuntu ʉwɨ mbiibhi wusʉngwa,
mwahayikhala nʉ Ngʉlʉbhɨ wiila.
14 Bhonti bha bhalongozewa nʉ Mʼpepo ʉwa Ngʉlʉbhɨ ɨbho bhaana bha Ngʉlʉbhɨ.
15 Enya,
ʉNgʉlʉbhɨ saga ahabhapiiye ʉMʼpepo waakwe huje abhabhɨɨshe mubhe bhakalwe ɨbho bhahumʼmwogopa ʉNgʉlʉbhɨ.
Lyoli ahabhapiiye ʉMʼpepo waakwe huje abhabhɨɨshe mubhe bhaana bhaakwe.
ɄMʼpepo ʉyo ya yʉʉyo ahutaavwa atɨ tibhe tihunʼkwizya ʉNgʉlʉbhɨ huje,
“Daada weetu.”
16 ɄMʼpepo ʉMʼfinjile yʉʉyo akhajiilizya peeka na mooyo geetu huje,
atɨ tili bhaana bha Ngʉlʉbhɨ.
17 Ɨshi,
pɨpo atɨ tili bhaana bha Ngʉlʉbhɨ,
tahayambɨɨlɨla ɨnsayo zyonti ɨzyo ʉNgʉlʉbhɨ abhabhɨshɨɨye abhantu bhaakwe,
tahayambɨɨlɨla ɨnsayo ɨzyo peeka nʉ Kilisiti.
Ɨshi nkashele tijimbiilila mu mayɨmba nanshi ɨsho ahajimbiliiye ʉYeesu,
shɨɨsho tahayimwamihwa nanshi ɨsho ahamwamiihwe ʉmwene.
ɄNgʉlʉbhɨ ahayihubhapeela ʉmwamu abhaana bhaakwe
18 Amayɨmba geetu agɨ habhaazyo ɨho saga ɨlola hantu,
nkashele ɨhugalɨngaanisya nʉ mwamu ʉwo ʉNgʉlʉbhɨ ahayihutipeela hu habhaazyo ɨho hahwɨnza.
19 Enya,
ɨvipelwa vyonti vigʉʉlɨla hu nsyʉkwo hu habhaazyo ɨho ʉNgʉlʉbhɨ ahayihubhiilula abhaana bhaakwe.
20 Ɨyanga ɨsho,
pɨpo ɨvipelwa vyonti vyahabhɨhwɨlwe abhe vyɨ shaaha,
saga huje vyahabhɨhwɨlwe ɨsho vihwanza ɨvyene,
ndaali,
lyoli nanshi ɨsho ahanzaga ʉNgʉlʉbhɨ yʉʉyo.
Peeka nɨ‑ɨsho visʉʉbhɨla hu nsyʉkwo,
21 pɨpo ɨvipelwa ɨvyo vyahayifyʉlwa afume mu kalwe ʉwɨ nanjisu huje,
vyambɨɨlɨle ʉwaawusu ʉwɨ mwamu ʉwo ʉNgʉlʉbhɨ ahayihubhapeela abhaana bhaakwe.
22 Timanya huje afishe ɨshi,
ɨvipelwa vyonti vilila hu bhaavi nanshi ʉbhaavi ʉwa nʼshɨ lwa‑apaapa ʉmwana.
23 Nantele,
saga huje vipelwa lwene ɨvyo vilila,
lyoli hwope atɨ ta tipewiilwe ʉMʼpepo ʉMʼfinjile huje tilɨnje ʉwinza ʉwo tahayambɨɨlɨla.
Hwope natɨ tilila mu mooyo geetu,
pɨpo tigʉʉlɨla ʉNgʉlʉbhɨ atipeele ikhone lyonti ɨlya‑abhe bhaana bhaakwe,
hwa huje agombole na hugagalulanye amabɨlɨ geetu gabhe mapya.
24 Ʉlusʉʉbhɨlo ʉlwo tili nalwo luhwanda afume hu habhaazyo ɨho ʉNgʉlʉbhɨ ahatifyʉlɨle.
Leelo ʉlusʉʉbhɨlo saga luli na hantu hohonti nkashele tihuhalola ɨho tihuhasʉʉbhɨla.
Wɨlɨ,
weenu abhajiiye asʉʉbhɨle ahantu ɨho ali naho?
25 Leelo nkashele tisʉʉbhɨla ahwambɨɨlɨle ahantu ɨho saga tihuhalola,
ɨpo tisʉʉbhɨla sinta alite.
26 Peeka nɨ‑ɨgo,
ʉMʼpepo ʉMʼfinjile ya yʉʉyo ahutaavwa mu dedebhazu weetu,
pɨpo saga timɨɨnye apuute shiila sha shihwanziwa huje atɨ timʼpuutaje ʉNgʉlʉbhɨ.
Lyoli ʉMʼpepo ʉMʼfinjile yʉʉyo ʉyo ahutipuutila hwa Ngʉlʉbhɨ hu ndiilo ɨyɨ nkʉmbʉ ɨyɨ bhaavi ɨyo saga ɨyangwa.
27 ɄNgʉlʉbhɨ wa‑amɨɨnye zya zili mu mooyo ga bhantu,
azimɨɨnye zyope ɨnsɨɨbho zya Mʼpepo ʉMʼfinjile.
Enya,
ʉMʼpepo ʉyo ahubhapuutila abhooziwa nanshi ʉNgʉlʉbhɨ yʉʉyo sha‑agɨɨne.
28 Timanya huje,
mu gonti ʉNgʉlʉbhɨ ahubhabhombela aminza abhantu ɨbho bha bhahunʼgana,
hwa huje ɨbho abhakwiziizye alɨngaane nɨ nsɨɨbho zyakwe.
29 Enya,
ʉNgʉlʉbhɨ ahabhamɨɨnye abhantu bhaakwe ɨbho ahabhasaluuye lwa‑ali asɨɨle hubhapele.
Ahabhasaluuye afume halɨ huje bhabhe shifwani sha mwana waakwe ʉYeesu ʉKilisiti.
Ahabhombile ɨsho huje,
ʉmwana ʉyo abhe nʼgoosi mu bhaana bhonti abha Ngʉlʉbhɨ.
30 Ɨshi,
ɨbho ahabhasaluuye bha bhɨɨbho ahabhakwiziizye,
bha bhɨɨbho ahabhabhaziziizye abhe bhagolosu,
nantele bha bhɨɨbho ahabhalapiiye hubhapeele ʉmwamu.
Nʉʉmo ʉwa hutibhɨɨshe paayo nʉ kʉndwa wa Ngʉlʉbhɨ
31 Ɨshi,
tiyanje yeenu hu nongwa yɨ nongwa ɨzyo?
Nkashele ʉNgʉlʉbhɨ ali naatɨ,
weenu ʉyo abhajiiye hutimene?
32 ɄNgʉlʉbhɨ saga ahanʼnolɨɨye ɨnkʉmbʉ ʉmwana waakwe yʉʉyo,
lyoli ahamʼfumiizye huje afwe hu nongwa yeetu tenti.
Ɨshi,
nkashele ahamʼfumiizye ʉmwana waakwe yʉʉyo,
wɨlɨ saga anza hutipeele ɨvintu vyonti ɨvinza?
33 Lyoli nʉʉmo ʉmuntu ʉyo ahayɨɨsya huje bhalongwe abhasalulwe bha Ngʉlʉbhɨ,
pɨpo ʉNgʉlʉbhɨ yʉʉyo ahubhabhaazizya abhe bhagolosu.
34 Nantele nʉʉmo ʉmuntu wowonti ʉyo ahayihutilonga,
pɨpo ʉYeesu yʉ Mʼfyʉli weetu,
ʉyo ahafwiye na‑azyʉsyɨwe.
Ʉmwene ya yʉʉyo akhala hu nʼkhono ʉgwa hu lɨɨlo ʉgwa Ngʉlʉbhɨ,
apantu apɨ nshɨnshɨ tee,
nʉ‑ʉhwo ahutipuutila atɨ.
35 Nahamo ahantu hohonti ha habhajiiye hunʼzijile ʉKilisiti huje agandi hutigane atɨ!
ɄKilisiti ajendeelela hutigane hwope nkashele tili mu mayɨmba amagoosi,
awe mu zugumizu,
awe mu bhaavi,
awe tili nɨ nzala,
awe tibhuliliilwe amenda,
awe tipalamila ateezye ʉwʉʉmi,
awe abudwe.
36 Nanshi ɨsho ɨsimbwilwe mu Nsimbo ɨMfinjile huje,
“Ɨnsiku zyonti tivwɨmwa,
pɨpo tihubhombela aawe.
Abhantu bhahutibhomba atɨ nanshi ɨngoole ɨzya‑abhoolwe.”c
37 Leelo hwope nkashele ɨga gonti gahutɨnzɨla,
atɨ tijendeelela amene,
pɨpo ahutaavwa ʉKilisiti ʉyo atigɨɨne.
38-39 Ɨnsimishiziizye huje nahamo ahantu ha habhajiiye hunʼzijile ʉNgʉlʉbhɨ hutigane atɨ.
ɄNgʉlʉbhɨ ajendeelela hutigane hwope nkashele tili bhʉʉmi awe tifwiye.
Nantele nabhamo abhantumi,
d awe abhi‑ikhone,
awe ɨvipelwa vyonti ɨvyɨ maha,
awe ɨvintu ɨvyo vibhombeha ɨshi awe ɨvyo vyahayɨnza hwitagaalila,
awe ɨvintu ɨvya hu mwanya,
awe ɨvintu ɨvya huzimu,
e awe ɨvipelwa ɨvyɨnjɨ vyovyonti ɨvyo vibhajiiye hunʼzijile ʉNgʉlʉbhɨ hutigane atɨ.
Ʉkʉndwa ʉwo awiluuye huliitɨ hwi‑idala ɨlya Yeesu ʉKilisiti,
ʉMwɨnɨ weetu.