Afwe na‑azyʉshe peeka nʉ Kilisiti
6
Ɨshi tiyanje yeenu?
Wɨlɨ,
tijendelelaje abhombe ɨmbiibhi huje ʉNgʉlʉbhɨ ajendelelaje hutilolele ɨnkʉmbʉ hwa hutikhobhoshele?
2 Ndaali!
Ɨshi atɨ tabha nanshi amavimba hu mbiibhi.
Ɨshi saga tibhajiiye nantele ajendeelele abhombe ɨmbiibhi.
3-4 Mumanye huje,
lwa tahoziiwe tahapatihɨɨnywe nʉ Yeesu ʉKilisiti,
hwa huje tahali nkati tifwiye na‑asyɨlwe peeka nawo.
Pamandɨ ʉKilisiti ahazyʉha hwi‑ikhone igoosi ɨlya Ngʉlʉbhɨ,
na‑alɨngaane nɨ‑ɨlyo,
natɨ tibhe nɨ njendo ɨnjenu mu lemvu weetu.
5 Ɨshi,
nanshi ɨsho tahapatihɨɨnywe nʉ Kilisiti mu fwe waakwe lwa tahoziiwe,
shɨɨsho tahayipatiihanywa nʉ mwene mu zyʉsi nanshi ɨsho ahazyʉsɨɨwe.
6 Timɨɨnye huje ɨnjendo zyetu ɨzyɨ mandɨ zyahakhomeliilwe peeka nʉ Kilisiti pa shikhobheehanyo,
huje ikhone lyɨ mbiibhi lya lili muuhati yeetu ligandi hutilongozye nantele,
tigandi abhe bhakalwe bhɨ mbiibhi nantele.
7 Enya,
ʉmuntu nkashele afwiye peeka nʉ Kilisiti,
abha nʼsatulwe afume mwi‑ikhone lyɨ mbiibhi.
8 Ɨshi,
pɨpo tahafwiye peeka nʉ Kilisiti,
tihwɨtɨha huje tahayibha tikhala peeka nawo.
9 Timɨɨnye huje ʉKilisiti ahazyʉshɨle,
saga ahayifwa nantele.
Ʉfwe saga wuli ni‑ikhone hwa mwene nantele.
10 Lwa waafwa,
ahafwiye heeka lwene,
a ahamena ɨmbiibhi zyonti.
Hu habhaazyo ɨha ali mwʉmi,
mu wʉʉmi waakwe ahunʼkhondeezya ʉNgʉlʉbhɨ.
11 Shɨɨsho namwɨ mubhe muhwilola huje mwahafwiye peeka nʉ Kilisiti,
ɨmbiibhi saga zili ni‑ikhone huliimwɨ nantele.
Nantele mubhe muhwilola huje,
muli bhʉʉmi na mu lemvu weenyu muhunʼkhondeezya ʉNgʉlʉbhɨ hwi‑idala ɨlya‑apatiihanywe nʉ Yeesu ʉKilisiti.
12 Musahasheele ahwɨtɨshe huje ɨmbiibhi zilongozyaje amabɨlɨ geenyu ɨgo gafwa.
Nkashele muzileshe ɨmbiibhi zibhalongozye,
zinza hubhakwesanje huje mulondolezye ɨnsʉngwo ɨmbiibhi ɨzyɨ mabɨlɨ geenyu.
13 Mugandi huvifumye ɨvipelwa ɨvyɨ mabɨlɨ geenyu abhe vya‑abhombele ɨmbiibhi.
Lyoli muvifumyaje hwa Ngʉlʉbhɨ,
pɨpo muli nanshi abhantu ɨbho bhazyʉsɨɨwe nʉ Ngʉlʉbhɨ,
na‑atʉʉsɨwe nawo mu wʉʉmi ʉpya.
Nantele muvifumyaje hwa Ngʉlʉbhɨ ɨvipelwa ɨvyo vibhanje vibhomba ɨmbombo ɨngolosu.
14 Enya,
ɨmbiibhi saga zyahayihubhamena nantele,
pɨpo ɨshi saga mulongozewa ni‑ikhone ɨlyɨ ndajizyo,
lyoli mulongozewa nɨ mpyana ya Ngʉlʉbhɨ.
Abhasunde bha Yeesu bhakalwe bha‑alondolezye ʉgolosu
15 Ɨshi tiyanje yeenu?
Wɨlɨ,
tijendeelele abhombe ɨmbiibhi,
pɨpo ʉNgʉlʉbhɨ atipiiye ɨmpyana na pɨpo saga tilongozewa ni‑ikhone ɨlyɨ ndajizyo nantele?
Ndaali!
Tigandi abhombe ɨsho.
16 Mumanye huje nkashele muhwifumye abhe bhakalwe bha muntu ʉmo na hunʼtinishe,
lyoli mubha bhakalwe hwa muntu ʉyo.
Hwa huje nkashele mulondolezya ʉbhiibhi,
mubha bhakalwe bhɨ mbiibhi,
b ʉhwo husonzya ʉfwe.
Nkashele muhunʼnondolezya ʉNgʉlʉbhɨ mubha bhakalwe bhaakwe,
ʉhwo husonzya ʉgolosu.
17 Ɨmandɨ mwahali bhakalwe bhɨ mbiibhi.
Leelo ɨhunʼsalifya ʉNgʉlʉbhɨ,
pɨpo amwɨ muli bhatinisu afume mu mwoyo hu nongwa yɨ manyizyo ɨzyo mwambɨlɨɨye.
18 Nantele ɨhunʼsalifya ʉNgʉlʉbhɨ,
pɨpo abhabhɨɨshɨle bhaawusu huje musahabhe bhakalwe bhɨ mbiibhi,
abhabhɨɨshɨle bhakalwe bhaakwe huje mulondolezye ʉgolosu.
19 Ɨnjanjile naamwɨ hu shifwani ɨshɨ kalwe huje mubhe muhuzyaganya ɨzyo ɨyanga,
pɨpo amwɨ saga muli bhangu amanye ɨlyoli.
Ɨmandɨ mwahali mufumya ɨvipelwa ɨvyɨ mabɨlɨ geenyu abhombe ɨnjendo ɨmbiibhi,
mwahali bhakalwe bhɨ mbiibhi,
nɨ mbiibhi zyenyu zyahonjelɨɨye tee.
Leelo ɨshi,
mubhanje muhwifumya hwa Ngʉlʉbhɨ hu vipelwa vyonti ɨvyɨ mabɨlɨ geenyu,
mubhanje bhakalwe bhɨ njendo ɨzyɨ golosu,
huje ʉNgʉlʉbhɨ abhasangalusye.
20 Ɨmandɨ mwahali bhakalwe bhɨ mbiibhi,
nantele saga mwahasɨbhɨlɨɨye hu nongwa ɨya‑abhombe ʉgolosu.
21 Wɨlɨ,
hu habhaazyo ɨho mwahali mubhomba ɨmbombo ɨzyo,
ɨzyo ɨshi mulola nsoni,
mwahali muhwambɨɨlɨla ɨzya pa mwanya wɨlɨ?
Nazimo ɨzya pa mwanya lyonti!
Ɨmbombo ɨzyo zileeta ʉfwe.
22 Leelo ɨshi mubhɨhwɨlwe bhaawusu,
saga muli bhakalwe bhɨ mbiibhi nantele,
muli bhakalwe bha Ngʉlʉbhɨ,
nɨ zya pa mwanya ɨzyo muhwambɨɨlɨla nsangalusu na hu malishilo waakwe wʉʉmi ʉwa wiila.
23 Enya,
ʉmuntu wowonti wa‑ali nʼkalwe wɨ mbiibhi,
ʉmʼposheelo gwakwe fwe wa wiila.
Leelo ʉNgʉlʉbhɨ ahutipeela ʉwʉʉmi ʉwa wiila,
nantele ʉwʉʉmi ʉwo saga wubha mʼposheelo,
lyoli wubha mpeesya hwi‑idala ɨlya Mwɨnɨ weetu ʉYeesu ʉKilisiti.