ɄKilisiti ahutikʉndanya nʉ Ngʉlʉbhɨ
5
Ɨshi,
pɨpo ʉNgʉlʉbhɨ atibhaziziizye abhe bhagolosu afumilane na humʼmwɨtɨshe ʉmwene,
tili nʉ tengaanu nʉ mwene hwi‑idala ɨlya Mwɨnɨ weetu ʉYeesu ʉKilisiti.
2 Hwi‑idala ɨlya humʼmwɨtɨshe ʉYeesu,
ʉNgʉlʉbhɨ atipiiye ɨmpyana,
nantele hwope ɨshi ajendeelela hutipeele ɨmpyana.
Ɨpo tiseshela tee,
pɨpo tisʉʉbhɨla huje tɨnza‑abhe peeka nʉ Ngʉlʉbhɨ mu khalo waakwe ʉmwamu.
3 Saga ɨsho lwene,
lyoli tiseshela hwope na mu mayɨmba,
pɨpo timanya huje amayɨmba gahutileetela ʉjimbiilizu mu lwɨtɨho.
4 Ʉjimbiilizu ʉwo wuhutileetela ʉdandamazu,
wope ʉdandamazu wuhutileetela ʉlusʉʉbhɨlo.
5 Ʉlusʉʉbhɨlo ʉlwo saga lubhajiiye hutisʉʉsye,
pɨpo timanya huje ʉNgʉlʉbhɨ amemiizye ʉkʉndwa waakwe mu mooyo geetu hwi‑idala ɨlya Mʼpepo ʉMʼfinjile ʉyo atipiiye.
6 Enya,
lwa tili bhadedebhazu hwa huje bhɨ mbiibhi,
ʉYeesu ʉKilisiti ahɨnzɨle hu habhaazyo ɨho ahasɨbhɨlɨɨye ʉNgʉlʉbhɨ,
ahafwa hu nongwa yeetu.
7 Lyoli,
hukhome ʉmuntu ahwɨtɨshe abudwe hu nongwa ya muntu ʉmwinza.
Hwope ɨsho,
nkashele alɨɨho ʉmuntu wa‑ahwifumya,
agɨɨtɨha abudwe hu nongwa ya muntu ʉmwinza tee.
8 Leelo ʉNgʉlʉbhɨ ahatilolesiizye huje,
atigɨɨne tee hwi‑idala ɨlya humʼfumye ʉKilisiti atifwɨle hu habhaazyo ɨho atɨ tisɨɨle tili bhabhomba mbiibhi.
9 Ɨshi,
nkashele tibhaziiwe abhe bhagolosu hwi‑idala ɨlya hwitishe idanda lya Yeesu lwa‑ahafwiye pa shikhobheehanyo,
lyoli tahayifyʉlwa afume mwi‑ilyoyo ikhali ɨlya Ngʉlʉbhɨ.
10 Ɨnjanjile ɨsho,
pɨpo atɨ tahali bhalʉgʉ bha Ngʉlʉbhɨ,
leelo ahatikʉndɨɨnye hwi‑idala ɨlyɨ fwe wa Mwana waakwe.
Lyoli,
ɨshi lyahayibha lizwi lidoodo hwa mwene hutifyʉle afume mu lufundo lwa Ngʉlʉbhɨ ashilile hu wʉʉmi wa Mwana waakwe!
11 Saga huje ɨsho lwene,
leelo nantele ʉNgʉlʉbhɨ atibhombile huje tiseshele tee hu gaala ɨgo atibhombɨɨye,
pɨpo hwi‑idala ɨlya Mwɨnɨ weetu ʉYeesu ʉKilisiti atilɨngɨɨnye nʉ Ngʉlʉbhɨ.
ɄAadamu ahatiletɨɨye ʉfwe leelo ʉYeesu atipiiye ʉwʉʉmi
12 Bhooziwa bhamwetu,
ɨyanga huje,
ɨmbiibhi zyahatʉʉshɨle mu nsi hwi‑idala ɨlya muntu weeka,
ɨpo zyahatileetela ʉfwe.
Afumilane nɨ‑ɨlyo abhantu bhonti bhafwa,
pɨpo bhonti bhabhomba mbiibhi.
13-14 Afume ʉAadamu lwa‑ahabhombile ɨmbiibhi pitagaalila lya Ngʉlʉbhɨ afishe ɨpo ʉMoose ahapewiilwe ɨndajizyo,
ɨmbiibhi zyahali zilɨɨho mu nsi.
Abhantu bhonti abha hu habhaazyo ɨho bhahali bhafwa,
poshe ʉNgʉlʉbhɨ saga ahabhalonjile huje bhananzi bhɨ ndajizyo,
pɨpo saga hwahali nɨ ndajizyo.
Ʉfwe wahalongozyaga,
hwope ɨsho abhantu bhahali saga bhabhombile ɨmbiibhi nanshi ʉAadamu ɨzya‑anangaanye ɨndajizyo zya Ngʉlʉbhɨ.
ɄAadamu ahali shifwani sha Yeesu ʉyo ahɨnzɨle pamandɨ.
15 Leelo,
ɨmbiibhi ɨzyo zyahɨnzɨle hwi‑idala ɨlya Aadamu,
hantu hadoodo tee alɨngaanisye nɨ mpyana ya Ngʉlʉbhɨ ɨyo yahɨnzɨle hwi‑idala ɨlya Yeesu ʉKilisiti.
Enya,
ʉmuntu weeka,
hwa huje ʉAadamu,
ahabhaletɨɨye abhantu abhinji ʉfwe afumilane nɨ mbiibhi zyakwe.
Leelo ʉmuntu weeka,
hwa huje ʉYeesu,
ʉyo ahubhapeela abhantu abhinji ɨmpyana ɨya‑akhobhoshelwe ɨmbiibhi zyabho na hwambɨɨlɨle ʉwʉʉmi.
16 Nantele nanshi ɨsho ʉNgʉlʉbhɨ ahubhakhobhoshela abhantu hu mpyana yaakwe,
saga ɨlɨngaana na gaala ɨgo gafumilana nɨ mbiibhi zya Aadamu.
Enya lwa yahabhombwilwe ɨmbiibhi yeeka nʉ Aadamu,
ʉNgʉlʉbhɨ ahabhalonjile abhantu na hubhapeele ʉlufundo.
Leelo lwa zyahabhombwilwe ɨmbiibhi ɨnyinji na bhantu,
ʉNgʉlʉbhɨ ahabhakhobhoshela hu mpyana yaakwe,
na hubhabhaazizye huje bhagolosu.
17 Ɨmbiibhi ɨya muntu weeka ʉAadamu yahaleeta ʉfwe ʉwo wulongozya abhantu bhonti.
Leelo lyoli bhaala bha bhahwambɨɨlɨla ɨmpyana ɨyo saga ɨli nɨ shipimilo afume hwa Ngʉlʉbhɨ na‑abhaaziwe ʉgolosu,
bhahayilongozya pɨpo bhahayibha nʉ wʉʉmi ʉwa wiila hwi‑idala ɨlya gaala ɨgo gahabhombwilwe nʉ muntu weeka ʉwɨnjɨ,
hwa huje ʉYeesu ʉKilisiti.
18 Ɨshi,
nanshi ɨsho abhantu bhonti bhahalongwilwe hwi‑idala ɨlyɨ mbiibhi ya muntu weeka,
shɨɨsho abhantu bhonti bhabhaaziwa ʉgolosu na hwambɨɨlɨle ʉwʉʉmi hwi‑idala ɨlyɨ mbombo yeeka ɨyɨ golosu ɨya muntu weeka.
19 Enya,
nanshi ɨsho ʉmuntu weeka ahakhaanile hunʼtinishe ʉNgʉlʉbhɨ,
ahabhabhomba abhantu abhinji huje bhabhe bhabhomba ɨmbiibhi,
shɨɨsho ʉmuntu weeka ʉyo ahunʼtiniha ʉNgʉlʉbhɨ,
ahayihubhabhomba abhantu abhinji bhabhe bhagolosu.
20 Ɨndajizyo zya Moose zyahɨnzɨle,
zyahasonzya huje ɨmbiibhi zyonjeelele.
Leelo ɨmbiibhi lwa zyahonjeelela,
yope ɨmpyana ya Ngʉlʉbhɨ yahonjeelela tee.
21 Ɨshi,
nanshi ɨsho ɨmbiibhi zyahali ni‑ikhone ɨlya hubhalongozye abhantu na hubhaleetele ʉfwe,
shɨɨsho hwi‑idala ɨlya hubhabhaazizye ʉgolosu,
ɨmpyana ya Ngʉlʉbhɨ ɨhubhalongozya abhantu afishe hu wʉʉmi ʉwa wiila hwi‑idala ɨlya Mwɨnɨ weetu ʉYeesu ʉKilisiti.