ƗMbombo ɨzya Bhasontwa 4

ɄPeeteli nʉ Yoohani bhatwalwa mwi‑ikoloti lya Bhayahuudi

ɄPeeteli nʉ Yoohani lwa bhabhalʉmbɨɨlɨla abhantu bhaala, bhahɨnza abhasayi bha Ngʉlʉbhɨ, ʉnʼnongozi ʉnʼgoosi ʉwa bhakolokolooni abhɨ nyumba ɨmfinjile ɨya Ngʉlʉbhɨ na Bhasadukaayo, 2 sha bhavitiilwe tee. Ɨbho bhahavitiilwe, pɨpo ʉPeeteli nʉ Yoohani bhahabhamanyizyaga abhantu na hubhalʉmbɨɨlɨle huje, azyʉshe hwa Yeesu hulolesya aje, abhafwe bhahayizyʉha. 3 Ɨpo bhahanʼkhata ʉPeeteli nʉ Yoohani, bhahabhabhɨɨha mu hoobhe. Bhahagʉʉlɨla huje hushe, pɨpo hwahali lyabheela. 4 Leelo, ɨzyo ʉPeeteli nʉ Yoohani bhahabhabhʉzɨɨzye abhantu, abhinji mwɨ‑ɨbho bhahazyɨtɨha. Abhalume bheene bha bhahamʼmwɨtɨɨshe ʉYeesu bhahafishile abhantu ɨelufu zisaanu ɨshi.

5 Lwa hwasha, abhalongozi bha bhasayi bha Ngʉlʉbhɨ, abhagoosi na bhamanyizyi abhɨ ndajizyo zya Moose bhahabhʉngaana pa Yelusaleemu. 6 Mwa bhalongozi ɨbho, ahalɨɨho ʉnʼsayi ʉnʼgoosi ʉwa Ngʉlʉbhɨ ʉAanasi, peeka nʉ Kayaafa, ʉYoohani ʉwɨnjɨ, ʉAlekizanda na bhaholo abhanjɨ abha Aanasi. 7 Abhalongozi bhonti ɨbho bhahanʼneeta ʉPeeteli nʉ Yoohani, bhahabhɨmɨɨlɨsya pitagaalila lyabho, bhahanda hubhabhʉzɨɨlɨzye huje, “Ɨzyo, amwɨ mubhombile hwi‑ikhone lya naanu, awe hwi‑itaawa lya naanu?”

8 Ɨpo ʉPeeteli sha‑alongolwa nʉ Mʼpepo ʉMʼfinjile, ahabhaamula ahaga, “Mubhalongozi na mubhagoosi amwɨ! 9 Asanyʉʉnʉ muhutibhʉzɨɨlɨzya ɨpa hu nongwa ya‑aje, timʼmombɨɨye aminza ʉmuntu ʉnʉ wa‑ahalemɨɨye huje, aponile bhʉlɨ bhʉlɨ. 10 Ɨshi, amwɨ mwenti, peeka na Bhaizilaeeli abhanjɨ bhonti, mumanye shinza huje, ʉmuntu ʉnʉ wa‑ayɨmɨlɨɨye pitagaalila lyenyu aponile, wabha mwinza hwi‑ikhone lya Yeesu ʉKilisiti ʉwa hu Nazaleeti. Ya yʉʉla amwɨ mwahanʼkhomelɨɨye pa shikhobheehanyo, leelo ʉNgʉlʉbhɨ ahanʼzyʉsya afume hwa bhafwe. 11 ɄYeesu ali nanshi iwe ɨlinza ɨlya pa mpɨnga ɨlyɨ lwalo ʉlwɨ nyumba, ʉyo asimbwilwe mu Nsimbo ɨMfinjile huje,

‘Iwe lya bhahalikhɨɨne abhazenji abhɨ nyumba,

lyɨlyo lya lyabha liwe linza ɨlya pa mpɨnga

lya linyʉmʉʉye ɨnyumba yonti.’

12 Hu nongwa ɨyo, saga alɨɨho ʉwɨnjɨ nkʉ‑ʉmo wa tigawaaga ʉfyʉli, hwope pa nsi ponti saga alɨɨho ʉwɨnjɨ ʉyo asonteleziiwe nʉ Ngʉlʉbhɨ, lyoli yʉ Yeesu mwene, wa‑abhajiiye hutifyʉle mu mbiibhi.”

13 Abhalongozi bhaala bhahasɨɨbhɨle huje, ʉPeeteli nʉ Yoohani bhahali bhantu bha saga bhamanyiiye ɨnsukuulu, nantele saga bhahali bhamanyiihanyi bhɨ Nsimbo ɨMfinjile ɨzyɨ mandɨ nanshi bheene. Lwa bhaalola huje, bhaamula hu dandamazu, ɨpo bhahaswiga haani. Bhahanda amanye huje, lyoli ʉPeeteli nʉ Yoohani bhahabhanga peeka nʉ Yeesu. 14 Lwa bhanʼnola ʉnʼnume ʉla wa‑aponile, ayɨmɨlɨɨye pɨɨpo peeka nʉ Peeteli nʉ Yoohani, bhahapootwa amazwi aga‑ayanje. 15 Ɨpo bhahabhalajizya huje, bhafume mwi‑ikoloti lyabho liila. Abheene abhitongwa bhahasyala, bhahayangana bhahaga, 16 “Tibhala‑abhombe bhʉlɨ bhʉlɨ na bhantu ɨbha? Enya, abhantu bhonti bha bhakhala ɨpa pa Yelusaleemu bhamɨɨnye huje, bhabhombile iyele igoosi hwa muntu ʉnʉ. Saga tibhajiiye akhaane huje libhombɨɨshe. 17 Ɨshi tibhakhaane hwi‑idala ɨlya hubhoogofye, bhagandi ayanje ɨnongwa ɨzya Yeesu hwa bhantu huje, ɨzi zya bhabhombile zisahajendeelele anyampaane haani hu bhantu.”

18 Ɨpo abhalongozi bhaala bhahanʼkwizya ʉPeeteli nʉ Yoohani, bhahabhakhajila bhahaga, “Musahasheele ayanje ɨnongwa ɨzya Yeesu awe amanyizye hwi‑ikhone lyakwe!” 19 ɄPeeteli nʉ Yoohani bhahaga, “Amuli amwɨ mwɨmwɨ, nkashele hukhondɨɨye pa maaso ga Ngʉlʉbhɨ huje, amwɨ mwɨ tibhʉmvwe ashile humʼmwʉmvwe ʉNgʉlʉbhɨ yʉʉyo. 20 Atɨ saga tibhajiiye aleshe huziyanje zyonti zya tahazilolile tɨɨtɨ na huzyʉmvwe afume hwa mwene, ʉYeesu lwa‑ahali naatɨ.”

21-22 Abhalongozi bhaala bhahapootwa hubhalonje aje, bhabhafunde hu nongwa ya‑aje, abhantu bhonti bhahamʼmwamihaga haani ʉNgʉlʉbhɨ hu shimanyishizyo ɨsho ʉPeeteli nʉ Yoohani bhahabhombile hwa muntu ʉla. Ʉmuntu ʉyo bhahamʼponiizye, ahali nʉ lemazu afume apaapwe hwakwe, ahali na maaha ashile amashʉmi ganɨ. Ɨpo bhahabhoogofya nantele, bhahabhɨtɨshɨla huje, bhasogolaje.

Abhooziwa bhahunʼnaabha ʉNgʉlʉbhɨ huje, abhajinjizye

23 ɄPeeteli nʉ Yoohani lwa bhigulilwa, bhahaweela hwa bhooziwa abhamwabho. Bhahabhabhʉʉzya amazwi gonti ɨgo abhalongozi bha bhasayi bha Ngʉlʉbhɨ peeka na bhagoosi bhaabho bha Bhayahuudi ga bhahabhabhʉzɨɨzye. 24 Abhamwabho bhaala lwa bhʉmvwa amazwi ɨgo, bhonti peeka bhahanʼnaabha ʉNgʉlʉbhɨ bhahaga, “Aawe Mwɨnɨ Ngʉlʉbhɨ, wʉ‑ʉli nʼgoosi wɨ vyonti. Weewe wahapelile ɨmwanya, ɨnsi, ɨnsʉmbi nɨ‑ɨvyo vyonti vya vili mu nsi ʉmu. 25 Weewe wahayanjile hwi‑ilomu lya maama weetu ʉDaudi, ʉmʼmomvi waaho, ashilile hu Mʼpepo ʉMʼfinjile huje,

‘Yeenu abhantu abhɨ nsi ɨzyɨnjɨ bhaviitwa,

nantele ɨvikholo ɨvya bhantu visɨɨbha ɨzyɨ lema lwene?

26 Abhamwɨnɨ bhɨ nsi bhahwilɨngaanya,

nantele abhalongozi bhabhʉngaana peeka

huje bhanʼkhaane ʉMwɨnɨ ʉNgʉlʉbhɨ nʉ Mʼfyʉli ʉyo ahanʼsaluuye.’ ”

27 Abheene bhahajendeelela apuute bhahagaga, “Ɨbhoneha pa pazelu huje, ʉmwɨnɨ ʉHeloode ʉAntipa nʉ Pontiyo ʉPilaato bhope bhahabhʉngɨɨne mwi‑ibooma ɨli ɨlyɨ Yelusaleemu peeka na Bhaizilaeeli na bhantu bha saga Bhaizilaeeli huje, bhanʼkhaane ʉYeesu, ʉMʼmomvi waaho ʉmʼfinjile ʉyo wahanʼsaluuye huje, abhe yʉ Mʼfyʉli. 28 Ɨzyo zya bhahabhombile ɨbho, zya zyɨzyo aawe wahasɨbhɨlɨlaga afume ɨmandɨ huje, zibhombeshe hwi‑ikhone lyaho na hu kʉndwe waaho. 29 Ɨshi aawe Mwɨnɨ Ngʉlʉbhɨ, enya sha bhatoogofya! Ʉtaavwe, atɨ tibhabhomvi bhaaho, nka tilʉmbɨlɨlaje ɨNongwa ɨNyinza ɨzya Yeesu hu dandamazu haani. 30 Lwa tilʉmbɨɨlɨla, aawe ʉlolesyaje ikhone lyaho ɨlya hubhaponie abhantu. Ʉtaavwe huje, tibhombaje ɨvimanyishizyo na mayele agɨ waaji ʉwinji ashilile mwi‑ikhone lya Yeesu, ʉMʼmomvi waaho ʉmʼfinjile.”

31 Abhantu ɨbho lwa bhaamala hunʼnaabhe ʉNgʉlʉbhɨ, nalinaali paala pa bhahabhʉngɨɨne pahayingaana. ɄMʼpepo ʉMʼfinjile ahabhalongozya bhonti, bhahanda alʉmbɨɨlɨle ɨNongwa ɨNyinza ɨzya Yeesu hu dandamazu.

Ʉlwavwano mu bhooziwa

32 Abhooziwa bhonti bhahali nʉ mwoyo gweka, nɨ nsɨɨbho zyabho zyahali peeka. Saga ahali ʉmuntu ʉyo ahayangaga huje ɨvintu vya‑ali navyo vyakwe mwene, leelo ɨvintu vyabho vyonti bhahasanganilaga. 33 Abhasontwa bha Yeesu bhahafumyaga ʉsimishizi hwi‑ikhone haani huje, ʉMwɨnɨ ʉYeesu azyʉshɨle mu bhafwe. ɄNgʉlʉbhɨ ahabhasayaga tee bhonti. 34 Saga ahali ʉmuntu mu mpʉga yaabho wa‑ahabhulililwaga na hantu hu nongwa ya‑aje, bha bhahali na magʉnda awe ɨnyumba bhahakazyaga. 35 Ɨmpɨɨya zya bhahazyambɨlɨlaga, bhahabhapeelaga abhasontwa bha Yeesu. Ɨmpɨɨya ɨzyo bhahazigabhaga hwa shila mwoziwa alɨngaane na shiila sha‑ahabhuliiye.

36 Ɨshi, hwahali nʉ Nʼnaawi ʉmo ʉyo itaawa lyakwe ahali yʉ Yoosefu. Ʉmuntu ʉyo ahali nʼkhaaya wa mu nsi yɨ‑ɨli paahati yɨ nsʉmbi. Ɨnsi ɨyo bhayiga ɨKiipulo. Abhasontwa bha Yeesu bhahamʼpiiye itaawa lya Balinaaba, hwa huje wa‑ajinjizya ʉmwoyo. 37 Wope ahakazya ʉnʼgʉnda gwakwe, nantele ɨmpɨɨya zya‑ahambɨlɨɨye, ahazitwala hwa bhasontwa.