ƗMbombo ɨzya Bhasontwa 2

Abhantu bhahumʼmwambɨɨlɨla ʉMʼpepo ʉMʼfinjile

Isiku ɨlyɨ Pentekoositi lwa lyafiha, abhooziwa bhonti bhahabhʉngɨɨne mu nyumba ɨmo. 2 Lwa bhakhɨɨye ʉmwo, nalinaali lwene lyahafuma izwi afume hu mwanya lya lyahali nanshi ɨhaala ɨngoosi yɨ‑ɨvugula. Izwi liila lyahanyampaana mu nyumba yonti. 3 Bhahalola ɨvintu vya vili nanshi ʉmwoto gwa guhwaha, vyahabaguuhana, vyahabhala, vyahagwa hwa shila muntu. 4 Abhantu bhonti bhahamʼmwambɨɨlɨla ʉMʼpepo ʉMʼfinjile, bhahanda ayanje hu njango ɨnjenu, nanshi ʉMʼpepo ʉMʼfinjile sha‑ahabhapiiye.

5 Pa Yelusaleemu paala pahali na Bhayahuudi bha bhahanʼtinihaga ʉNgʉlʉbhɨ bha bhahafumile hu nsi zyonti. 6 Abhantu ɨbho lwa bhʉmvwa izwi ɨlyo, bhahɨnza bhabhinji paala. Bhahagunduha, pɨpo shila muntu ahʉmvwaga huje, ɨnjango yaakwe yʉʉyo ɨyangwa na bhooziwa. 7 Ɨpo bhahakhasamala na‑aswije haani. Bhahanda abhʉzɨlɨzanye bhahagaga, “Ʉmvwi! Abhantu ɨbha bha bhayanga ɨshi, saga bhapapwilwe hu Galilaaya? 8 Ɨshi! Bhʉlɨ bhʉlɨ atɨ shila muntu ahwʉmvwa bhayanga hu njango yaakwe ɨyɨ shikhaaya? 9 Mwʉmwo mwaliitɨ bhamo Bhapaliiti, Bhameedi na Bhaelaami. Bhamo bhakhaaya bha hu nsi ɨyɨ Mesopotaamiya. Bhamo bhahafumile hu mukowa ʉgwɨ Yudeeya, ʉgwɨ Kapadokiya, ʉgwɨ Ponto, ʉgwɨ Aasiya, 10 ʉgwɨ Filigiya, ʉgwɨ Pamfiliya, na hu nsi ɨyɨ Miisili. Bhamo Bhaliibiya bha bhafuma mu mbali mwi‑ibooma ɨlyɨ Kileene. Abhanjɨ bhahɨnzɨle afume mwi‑ibooma ɨlyɨ Luumi, mwɨ‑ɨbho bhalɨɨho aBhayahuudi na bhaala bha saga Bhayahuudi leelo bha bhahasamiiye mu mpuuto ɨzyɨ Shiyahuudi. 11 Bhalɨɨho aBhakileete na Bhaalabu. Atɨ tenti tihubhʉmvwa bhayanga hu njango zyetu, bhahunʼnʉmbʉla ʉNgʉlʉbhɨ hu mbombo zyakwe ɨngoosi!”

12 Abhantu ɨbho bhonti bhahaswigaga haani, nantele bhahakhasamalaga tee, bhahabhʉzɨlɨzanyaaga bhahagaga, “Ɨshi hwa huje yeenu?” 13 Leelo bhamo bhahanda hubhashente abhasontwa bha Yeesu, bhahabhayangaga huje, “Ɨbha bhakholiilwe hombwa.”

ɄPeeteli ahuyilʉmbɨɨlɨla ɨmpʉga

14 Ɨpo ʉPeeteli ahɨmɨɨlɨla peeka na bhasontwa abhamwabho bhaala ishʉmi na weeka, ahanda hubhabhʉʉzye abhantu bhaala hwi‑izwi igoosi ahaga, “MuBhayahuudi amwɨ, peeka na mwenti mwa mukhala pa Yelusaleemu ɨpa, mutejeelezye shinza zyɨ‑ɨyanga ɨshi. 15 Abhantu ɨbha saga bhakholiilwe hombwa, nanshi sha musɨɨbha huje, bhakholiilwe. Enyi! Ɨshi huli shandaabhɨ, ɨsaala ɨya taatu! 16 Ɨzi zya ziila ʉNgʉlʉbhɨ ahayanjile ashilile hwa nʼkuwi waakwe ʉYooweli huje,

17 ‘Mu nsiku ɨzya hu malishilo

nahayihubhapeela abhantu bhonti ʉMʼpepo waanɨ hu winji.

Abhaana bheenyu abhasahaala na bhalɨndu bhahayifumyaga ʉkuwi,

abhasahaala bheenyu bhahayilolaga ɨndoleshelo,

bhope abhagogolo bheenyu bhahayimanyaga ɨlyoli ya Ngʉlʉbhɨ ashilile hu nzozi.

18 Mu nsiku ɨzyo bhope abhabhomvi bhaanɨ, abhalume na bhashɨ,

nahayihubhapeela ʉMʼpepo waanɨ hu winji

huje bhope bhafumyaje ʉkuwi.

19 Nahayibhombaga amayele hu mwanya,

nɨ vimanyishizyo mu nsi.

Ʉmu mwahayibha idanda, ʉmwoto ni‑ilyosi idinde.

20 Isanya lyahayigaluuhana abhe hiisi,

gwope ʉmwezi gwahayibha nʼshamamu nanshi idanda.

Ɨzyo zyonti zyahayibhombeha,

ʉmwamu wa Mwɨnɨ ʉNgʉlʉbhɨ sha wusɨɨle aloleshe pi‑isiku liila igoosi.

21 Ʉmuntu wowonti wa‑ahayihunʼnaabha na hunʼsʉʉbhɨle ʉMwɨnɨ, ahayifyʉlwa.’ ”

22 ɄPeeteli ahonjela ayanje huje, “Mubhalume amwɨ mubha mu Izilaeeli, mutejeelezye amazwi ɨga shinza! ɄNgʉlʉbhɨ abhalolesiizye amwɨ huje, abhomba ɨmbombo ashilile hwa Yeesu ʉwa hu Nazaleeti. Amwɨ mwɨmwɨ mumɨɨnye shinza huje, ʉNgʉlʉbhɨ ahalolesyaga amayele nɨ vimanyishizyo ɨvyɨ waaji nʉ waaji huliimwɨ ashilile hwa mwene. 23 Ɨpo pamandɨ, ʉNgʉlʉbhɨ ahamʼfumya ʉYeesu huliimwɨ, nanshi sha‑ahamuuye abhombe afume halɨ. Namwɨ mwahanʼgoga hwi‑idala ɨlya hunʼtwale hwa bhantu bha saga Bhayahuudi huje, bhanʼkhomeele pa shikhobheehanyo. 24 Leelo, ʉNgʉlʉbhɨ ahamʼfyʉlɨle ʉYeesu mu bhaavi ʉwa‑afwe. Ahanʼzyʉsya hwa bhafwe, pɨpo yahapoteehana huje, ʉfwe wujendeelele hunʼkhatiilile ʉYeesu huzimu. 25 Ʉmwɨnɨ ʉDaudi wope ahayanjile ɨnongwa ɨzya Yeesu aje,

‘Anɨ nahanʼnolile ʉMwɨnɨ ʉNgʉlʉbhɨ

sha‑ajendeelela abhe peeka naanɨ ɨnsiku zyonti.

Saga ɨngayinganiha nalumo,

pɨpo ali naanɨ hunaavwe.

26 Ɨpo shɨɨsho, ʉmwoyo gwanɨ gwahasansamuha,

nahaluluutila hu nseho.

Mu mʼbɨlɨ gwanɨ nahayibha nʉ lusʉʉbhɨlo,

27 pɨpo aawe saga wahayihundeha huzimu.

Nantele, saga wahayikʉnda huje, ʉmʼbɨlɨ gwanɨ gubhole ʉhwo,

anɨ nɨNʼsangalusu waaho.

28 Ʉndanjile idala ɨlya huwaaje ʉwʉʉmi.

Wahayimemezya anɨ ɨnseho haani lwɨ‑ɨndi peeka naawe.’ ”

29 ɄPeeteli ahajendeelela ayanje ahaga, “Bhaholo bhaanɨ muBhayahuudi, ɨhwanza ɨmbabhʉʉzye dumu huje, ʉmaama weetu ʉDaudi ahafwiye, bhahanʼsyɨlɨle, ɨnkʉngwa yaakwe nʉ sanyʉʉnʉ ɨli pɨɨpa. 30 ɄDaudi ahali nʼkuwi wa Ngʉlʉbhɨ. Hu nongwa ɨyo ahamɨɨnye huje, ʉNgʉlʉbhɨ ahanʼnapiiye hu ndapo huje, ahayihumʼpyanizya ʉmuntu ʉmo ʉwɨ shikholo shaakwe mu wumwɨnɨ waakwe. 31 Nantele ahalolaga zya zyahayifumila. Nka‑ahayanga hu nongwa ɨzya‑azyʉshe hwa Mʼfyʉli huje, ʉNgʉlʉbhɨ saga ahanʼneshile huzimu, ʉmʼbɨlɨ gwakwe saga gwahabhola.

32 ɄYeesu ya yʉʉyo ʉNgʉlʉbhɨ ahanʼzyʉsyɨzye hu bhafwe, tenti tili bhasimishizi bhi‑izwi ɨli. 33 ɄNgʉlʉbhɨ lwa wanʼzyʉsya, ahamʼmwamisya na humʼmɨɨshe hu nʼkhono gwakwe ʉgwa hu lɨɨlo. ɄNgʉlʉbhɨ ahamʼpeela ʉYeesu ʉMʼpepo ʉMʼfinjile huje, atiitile atɨ. ɄMʼpepo ʉyo ya yʉʉyo ʉDaada ahalapile, nɨ‑ɨzyo zya zyɨzyo muhuzilola na hwʉmvwe. 34 ɄDaudi yʉʉyo saga ahazʉbhɨle hu mwanya. Leelo, ʉmwene ayiga,

‘ɄMwɨnɨ ʉNgʉlʉbhɨ ahamʼmʉzɨɨzye ʉMwɨnɨ waanɨ, ahaga,

“Khala peeka naanɨ,

35 afishe ɨhwavwe hubhatole abhalʉgʉ bhaaho na hubhatabhaale.” ’ ” 

36 ɄPeeteli ahajendeelela ayanje huje, “Ɨshi, aBhaizilaeeli bhonti bhahwanziwa amanye shinza ɨli huje, ʉNgʉlʉbhɨ amʼmɨɨshɨle ʉYeesu, ʉyo amwɨ mwahanʼkhomelɨɨye pa shikhobheehanyo abhe yʉ Mwɨnɨ nantele Mʼfyʉli.”

37 ABhayahuudi bhaala lwa bhʉmvwa amazwi ɨgo, bhahavwalala haani mu mooyo gaabho. Bhahamʼmʉzɨɨlɨzya ʉPeeteli peeka na bhasontwa abhamwabho bhahaga, “Bhaholo bheetu, ɨshi tibhombe wɨlɨ?” 38 ɄPeeteli ahabhaamula ahaga, “Laataji na huzileshe ɨmbiibhi, shila muntu. Mwozewe hwi‑itaawa lya Yeesu ʉKilisiti huje, mukhobhoshelwe ɨmbiibhi zyenyu. Namwɨ mwahayambɨɨlɨla ɨmpeesya, hwa huje ʉMʼpepo ʉMʼfinjile. 39 Ʉlufingo ʉlwo, ʉNgʉlʉbhɨ ahalapile hu nongwa yeenyu, na hwa bhaana bheenyu, na hwa bhonti bha bhakhala hutali, hwa huje bhaala bhonti bha bhahayikwiziwa nʉ Mwɨnɨ ʉNgʉlʉbhɨ weetu huje, bhamʼmwɨnzɨle.”

40 Hu mazwi aganjɨ aminji ʉPeeteli ahabhasunda na hubhalambe huje, “Nʼnaabhaji ʉNgʉlʉbhɨ aje, abhafyʉle huje, musahaayaje lwa‑ahubhayazya abhantu abhɨ mbiibhi abhɨ habhaazyo ɨha!” 41 Abhantu abhinji bhahɨɨtɨha amazwi gaakwe, bhahoozewa. Isiku liila abhooziwa bhahonjeelela na‑afishile ɨelufu zitaatu ɨshi.

Ʉlwavwano mu bhooziwa

42 Bhonti ɨbha bhahajendelelaga amanyile afume hwa bhasontwa, bhahali nʉ mwoyo ʉgwa hwavwane, bhahalyanga peeka ɨShalye ɨShifinjile, nantele bhahanʼnaabhaga peeka ʉNgʉlʉbhɨ. 43 Abhasontwa bhahabhombaga amayele aminji nɨ vimanyishizyo ɨvinji. Abhantu bhonti bhahogopaga haani, na hunʼsalifye ʉNgʉlʉbhɨ. 44 Abhooziwa ɨbha bhonti bhahali nʉ lwavwano, ɨvintu vyabho vyope vyahali mu lwavwano. 45 Bhahakazyaga ɨvintu vyabho, nɨ mpɨɨya zya bhahazyagaga, bhahazigabhanyaaga hwa shila mwoziwa alɨngaane na shiila sha‑ahabhuliiye. 46 Bhahabhʉngaanaga apuute ɨnsiku zyonti mu lubhaga lwɨ nyumba ɨmfinjile ɨya Ngʉlʉbhɨ. Nantele, bhahabhʉngaanaga mu nyumba zyabho alye ɨshalye, na‑alye peeka ɨShalye ɨShifinjile hu mwoyo ʉnʼzelu na hu nseho. 47 Bhahamʼmwamihaga ʉNgʉlʉbhɨ na hubhakhondeezye abhantu bhonti. Ɨnsiku zyonti ʉMwɨnɨ ʉYeesu ahonjezyaga ʉwinji wa bhantu bha bhahafyʉlwaga.