Yoohani 19

ɄPilaato ahunʼnonga ʉYeesu huje, bhanʼgoje

(Mataayo 27:15-31; Maalʉko 15:6-20; Luuka 23:13-25)

Ɨpo ʉPilaato ahabhalajizya abhalwi bhaakwe huje bhamʼmweje ʉYeesu na hunʼshete nʉ chapo. 2 Abhalwi bhahatabha ɨnsushe ɨyɨ mimvwa, bhahanʼkwatizya ʉYeesu hwi‑itwe. Nantele bhahanʼkwatizya igolole ivuutu ɨlya mwɨnɨ. 3 Bhahabha bhabhala pitagaalila lyakwe na hunʼnamushe bhahagaga, “Mwagona, wee Mwɨnɨ wa Bhayahuudi!” Bhahabha bhahunʼkhoma na makofi.

4 ɄPilaato ahafuma hwʉnzɨ nantele, ahayibhʉʉzya ɨmpʉga ɨya bhantu bhaala ahaga, “Tejeelezyi, ɨnza humʼfumye hwʉnzɨ huliimwɨ ʉmuntu ʉnʉ, mumanye huje saga ɨndolile ʉbhiibhi wowonti hwa mwene.” 5 Ɨpo ʉYeesu ahafuma hwʉnzɨ lwa‑ali akwɨte ɨnsushe ɨyɨ mimvwa ni‑igolole ivuutu. ɄPilaato ahayanga pa pazelu ahaga, “Enyi, ʉmuntu ʉyo ya yʉʉnʉ ɨpa.” 6 Abhalongozi bha bhasayi bha Ngʉlʉbhɨ na bhalɨndɨɨlɨli abhɨ nyumba ɨmfinjile ɨya Ngʉlʉbhɨ lwa bhanʼnola ʉYeesu, bhahabwaga ibwago bhahaga, “Nʼkhomeele pa shikhobheehanyo, nʼkhomeele pa shikhobheehanyo!” Ɨpo ʉPilaato ahabhabhʉʉzya ahaga, “Mumʼmweje amwɨ mwɨmwɨ, mubhale munʼkhomeele pa shikhobheehanyo, pɨpo anɨ saga ɨndolile ʉbhiibhi wowonti hwa mwene.” 7 ABhayahuudi bhahamʼmwamula bhahaga, “Atɨ tili nɨ ndajizyo. Alɨngaane nɨ ndajizyo ɨyo, ʉmwene akhondɨɨye agogwe, pɨpo ahwiyanga huje ʉmwene yʉ Mwana wa Ngʉlʉbhɨ.”

8 ɄPilaato lwa wʉmvwa amazwi ɨgo, ahonjela hwogope tee. 9 Ɨpo ahatʉʉha nantele pa shinamwɨnɨ shaakwe, ahamʼmʉzɨɨlɨzya ʉYeesu ahaga, “Aawe ʉfumile hwoshi?” Leelo ʉYeesu saga ahamʼmwamula lyolyonti. 10 Ɨpo ʉPilaato ahamʼmʉzɨɨlɨzya ahaga, “Yeenu saga ʉhunaamula? Wɨlɨ, saga ʉmɨɨnye huje ɨndi ni‑ikhone ɨlya huhwigulile nantele ɨlya hukhomeele pa shikhobheehanyo?” 11 ɄYeesu ahamʼmwamula ʉPilaato ahaga, “Saga wabhanga ni‑ikhone lyolyonti hwaliinɨ nkashele ʉNgʉlʉbhɨ saga waʼpanga. Leelo ʉmuntu ʉla ambɨɨshɨle mu makhono gaaho, ali nʉ bhiibhi ʉgoosi tee ashile ʉbhiibhi waaho.” 12 ɄPilaato lwa wʉmvwa ɨgo, ahalɨnga ahwanze idala ɨlya humʼmwigulile ʉYeesu, leelo aBhayahuudi bhahonjela abwaje ibwago bhahaga, “Nkashele ʉhumʼmwigulila ʉmuntu ʉyo, ɨshi aawe saga ʉli mʼmanyani wa mwɨnɨ ʉnʼgoosi ʉKayisali. Ʉmuntu wowonti ʉyo ahwibhɨɨha huje mwɨnɨ, ahunʼkhaana yʉ Kayisali.” 13 ɄPilaato lwa wʉmvwa amazwi ɨgo, ahafuma nawo ʉYeesu hwʉnzɨ, ahabhala akhale pi‑itengo ɨlya‑alonjele. Apantu ɨpo bhahagaga ʉLwalo ʉlwɨ Mawe, itaawa ɨli mu njango ɨyɨ Shiebulaniya hwa huje Gabaata.

14 Isiku ɨlyo lyahali lisiku ɨlya hwilɨngaanye ɨshikulukulu ɨshɨ Paasaka. Lwa yaafiha ɨsaala nʼtanda ɨshi pasanya, ʉPilaato ahabhabhʉʉzya aBhayahuudi ahaga, “Enyaaji ʉMwɨnɨ weenyu ʉnʉ ɨpa!” 15 Abheene bhahabwaga ibwago bhahaga, “Nʼgoje, nʼgoje! Nʼkhomeele pa shikhobheehanyo!” ɄPilaato ahabhabhʉzɨɨlɨzya ahaga, “Wɨlɨ, muhwanza ɨnʼkhomeele pa shikhobheehanyo ʉMwɨnɨ weenyu?” Abhalongozi bha bhasayi bhahamʼmwamula bhahaga, “Atɨ saga tili nʉ mwɨnɨ ʉwɨnjɨ, lyoli yʉ Kayisali mwene!” 16 Ɨpo hu malishilo ʉPilaato ahamʼmɨɨha ʉYeesu mu makhono gaabho huje bhanʼkhomeele pa shikhobheehanyo.

Bhahunʼkhomeela ʉYeesu pa shikhobheehanyo

(Mataayo 27:32-44; Maalʉko 15:21-32; Luuka 23:26-43)

Ɨpo abhalwi bhahamʼmwega ʉYeesu na‑abhale nawo. 17 Wope ahanyeemula ɨshikhobheehanyo shaakwe, ahasogola mwi‑ibooma, ahabhala paala ɨpo mu njango ɨyɨ Shiebulaniya bhahagaga Goligoota, hwa huje Pi‑Ifupa li‑Itwe. 18 Lwa bhaafiha paala, bhahanʼkhomeela ʉYeesu pa shikhobheehanyo. Papaala, bhahalɨɨho abhantu bhamo bhabhɨɨlɨ ɨbho bhahakhomeliilwe pa vikhobheehanyo vyabho peeka nʉ Yeesu, weeka ɨmbali ɨyɨ lɨɨlo nʉ wamwabho ɨmbali ɨyɨ mongo.

19 ɄPilaato ahalajizya huje gasimbwe amazwi na hugabhɨɨshe pa mwanya pa shikhobheehanyo sha Yeesu. Amazwi ɨgo gahasimbwilwe huje,

Ʉnʉ yʉ Yeesu ʉwa hu Nazaleeti, Mwɨnɨ wa Bhayahuudi

20 Ɨnsimbo ɨzyo zyahasimbwilwe mu njango ɨzyɨ Shiebulaniya, ɨShiluumi nɨ Shiyunaani. ABhayahuudi abhinji bhahali bhabhaazya amazwi ɨgo, pɨpo apantu ɨpo bhahanʼkhomelɨɨye ʉYeesu pa shikhobheehanyo pahali pa pɨɨpɨ ni‑ibooma ɨlyɨ Yelusaleemu. 21 Ɨpo abhalongozi bha bhasayi bhahamʼmʉʉzya ʉPilaato bhahaga, “Ʉgandi asimbe, ‘Ʉnʉ yʉ Mwɨnɨ wa Bhayahuudi,’ lyoli simba, ‘Ʉmuntu ʉnʉ ahayanjile huje ʉmwene yʉ Mwɨnɨ wa Bhayahuudi.’ ” 22 ɄPilaato ahabhaamula ahaga, “Ɨnsimbo zisyale shɨɨsho nanshi ɨsho nahalajiziizye.”

23 Abhalwi lwa bhahanʼkhomeela ʉYeesu pa shikhobheehanyo, bhaheega amenda gaakwe na hugagabhanye mu vipʉga vinɨ. Shila nʼnwi aheega ɨshipʉga shaakwe. Nantele, bhaheega igolole lyakwe ɨlyo saga lyahasoniilwe, leelo lyahamamiilwe afume hu mwanya afishe pa nsi. 24 Ɨpo bhahajeehana bhahaga, “Tisahasheele hulizembule igolole ɨli, leelo tiliduunyile ɨnduunya huje libhe lya naanu.” Ɨgo gahabhombɨɨshe huje gasimishizye ɨgo gasimbwilwe mu Nsimbo ɨMfinjile huje, “Bhahagabhana amenda gaanɨ, na‑aduunyile ɨnduunya igolole lyanɨ.” Ɨsho sha bhahabhombile abhalwi.

25 Ɨshi bhahali abhashɨ bhamo bhanɨ ɨbho bhahɨmɨlɨɨye pa pɨɨpɨ nɨ shikhobheehanyo sha Yeesu. Abhashɨ ɨbho ahalɨɨho ʉnyina wa Yeesu nʉ nyina waakwe ʉnʼdoodo, ʉMaliya ʉnʼshɨ wa Keliyoopa nʉ Maliya ʉwa hu Magidaala. 26 ɄYeesu lwa wanʼnola ʉnyina waakwe nʉ nʼsundwe ʉyo ahanʼgɨɨne tee ayɨmɨlɨɨye pa pɨɨpɨ nʉ nyina waakwe ahaga, “Wee maayɨ waanɨ, enya ʉnʉ. Ʉmʼmɨɨshe abhe mwana waaho.” 27 Nantele ahamʼmʉʉzya ʉnʼsundwe ʉla ahaga, “Mʼmwenye ʉnʉ. Ʉmʼmɨɨshe abhe nyina waaho.” Ɨshi, ahwande hu habhaazyo hahaala ʉnyina waakwe ʉYeesu ahabhala akhale hwa nʼsundwe ʉyo hu khaaya yaakwe.

Afwe hwa Yeesu

(Mataayo 27:45-56; Maalʉko 15:33-41; Luuka 23:44-49)

28 Ɨpo ʉYeesu ahamanya huje ahali amalɨzɨɨzye abhombe ɨmbombo yaakwe yonti. Ɨshi ahayanga ahaga, “Ɨhwiyʉmvwa ɨnyoota.” Ɨshi gahalʉnjɨha ɨgo gasimbwilwe mu Nsimbo ɨMfinjile. 29 Apantu paala pahalɨɨho nɨ shɨlɨɨlo ɨsho bhahamemiizye ɨdivaayi ɨndozu. Ɨpo bhaheega ɨsabhula ɨnzelu na huyizubhishe mu divaayi ɨyo, bhahayibhɨɨha mwi‑ilanzi na humʼmɨɨshɨle ʉYeesu mwi‑ilomu. 30 ɄYeesu lwa walɨnga ɨdivaayi ɨyo, ahayanga ahaga, “Ɨmalile ɨmbombo yaanɨ!” Ɨpo ahasungamiha itwe lyakwe pa nsi, ahafwa pɨnɨɨpo.

Abhalwi bhahunʼnasa ʉYeesu nɨ mpalala

31 Isiku ɨlyo lyahali Shihaanu, lyahali lisiku lya hwilɨngaanye hu nongwa yi‑isiku ɨlyɨ Sabaato. Abhalongozi bha Bhayahuudi saga bhahanzaga amavimba gasyale pa shikhobheehanyo pi‑isiku ɨlyɨ Sabaato, pɨpo lyahali lisiku ligoosi. Ɨpo bhahabhala hwa Pilaato, bhahanʼnaabha huje abhalwi bhabhale, bhabhabudule amanama abhantu ɨbho bhahabhakhomelɨɨye na hugeefwe amavimba gaabho pa vikhobheehanyo. 32 Ɨpo abhalwi bhahabhala, bhahamʼbudula amanama ʉmuntu ʉwa hwande nʉ wa bhɨɨlɨ ɨbho bhahabhakhomelɨɨye peeka nʉ Yeesu. 33 Leelo lwa bhaabhala hwa Yeesu, bhahamʼmwaga afwiye, ɨpo saga bhahamʼbudula amanama gaakwe. 34 Ʉnʼnwi ʉmo ahanʼnasa ʉYeesu hu lubhazu nɨ mpalala. Ɨshi, idanda na mɨnzɨ vyahafuma. 35 Ɨnongwa ɨzi zisimbwilwe nʉ muntu ʉyo ahalolile ɨgo gahabhombɨɨshe. Ɨgo ayanga gɨ lyoli, nantele wope amɨɨnye huje ɨgo ayanga gɨ lyoli, wope asimishizya huje namwɨ mwɨtɨshe. 36 Ɨgo gahabhombɨɨshe huje gasimishizye ɨgo gahasimbwilwe mu Nsimbo ɨMfinjile huje, “Nalimo ifupa lyakwe ɨlyo lyahayibudulwa.” 37 Nantele ɨNsimbo ɨMfinjile ziyiga, “Bhahayɨnza humʼmwenye ʉyo bhahanʼnasile nɨ mpalala.”

Asyɨlwe hwa Yeesu

(Mataayo 27:57-61; Maalʉko 15:42-47; Luuka 23:50-56)

38 Ɨgo lwa gaashila, ahɨnza ʉmuntu ʉmo ʉyo itaawa lyakwe yʉ Yoosefu, ʉyo ahafumile hwi‑ibooma ɨlyɨ Alimasaaya. Ʉmwene ahali nʼsundwe wa Yeesu hu mfiso hu nongwa ya huje ahali ahubhoogopa abhalongozi bha Bhayahuudi. Ahabhala hwa Pilaato, ahanʼnaabha huje amʼmwɨtɨshɨle hugweje ʉmʼvimba gwa Yeesu na hugusyɨle. Ɨpo ʉPilaato ahamʼmwɨtɨshɨla, wope ʉYoosefu ahabhala hugwefwe ʉmʼvimba guula. 39 Wope ʉNikodeemu ʉyo isiku limo ahabhalile hwa Yeesu nʉsiku, ahɨnza nɨ nyemba zya zinunshila shinza, ɨzyo zyahasangɨɨnywe nʉ nunsi ʉwinza nʉ nʼnembo ʉgwa‑azijile ʉmʼvimba huje gusahaabhole. Ɨnyemba ɨzyo zyahali nʉ mwamu ʉwɨ kiilo amashʉmi gataatu. 40 Ɨpo bhonti bhabhɨɨlɨ bhahagwega ʉmʼvimba gwa Yeesu, bhahaguniempeela ni‑ikɨbha izelu peeka nɨ nyemba ziila zya zinunshila shinza alɨngaane na miiho ga Bhayahuudi aga‑asyɨle abhantu. 41 Paala pa bhahanʼkhomelɨɨye ʉYeesu pa shikhobheehanyo pahali ni‑itotoobhe. Mwi‑itotoobhe muula mwahali nɨ nkʉngwa ɨmpya ɨyo saga bhalɨnjɨle asyɨle ʉmuntu wowonti. 42 Isiku ɨlyo lyahali lisiku lya Bhayahuudi ahwilɨngaanye hu nongwa yɨ Sabaato. Bhahagubhɨɨha ʉmʼvimba gwa Yeesu mu nkʉngwa ɨla, pɨpo yahali pa pɨɨpɨ.