Yoohani 7

Abhadoodo bha Yeesu bhakhaana humʼmwɨtɨshe

Lwa gaashila ɨgo, ʉYeesu ahanda azyʉngʉʉle mu mabooma agɨ mu mukowa ʉgwɨ Galilaaya. Ahali saga ahwanza azyʉngʉʉle mu mukowa ʉgwɨ Yudeeya, pɨpo abhalongozi abha Bhayahuudi bhahanzaga hunʼgoje. 2 Ahabhaazyo ahɨ shikulukulu ɨshɨ masebhele aga Bhayahuudi hahali hapalamiiye. 3 Ɨpo abhadoodo bha Yeesu bhahamʼmʉʉzya bhahaga, “Sogola ɨpa, ʉbhale hu mukowa ʉgwɨ Yudeeya huje abhasundwe bhaaho bhagalole amayele ɨgo ʉbhomba. 4 Ʉmuntu nkashele ahwanza amanyishe hwa bhantu, saga abhomba ɨmbombo zyakwe hu mfiso. Nkashele aawe lyoli ʉbhajiiye abhombe gonti ɨga, ɨshi ʉhwilolesye hwa bhantu bhonti huje bhaʼmanye.” 5 Abhadoodo bhaakwe bhahayanjile ɨsho, pɨpo bhope saga bhahamʼmwɨtɨɨshe ʉYeesu huje yʉ Mʼfyʉli. 6 Ɨpo ʉYeesu ahabhaamula ahaga, “Ahabhaazyo haanɨ aha‑abhale hasɨɨle afishe, leelo amwɨ mubhajiiye abhale ahabhaazyo hohonti. 7 Abhantu abha mu nsi ʉmu saga bhabhajiiye hubhaviitilwe amwɨ, leelo bhahumviitilwa anɨ, pɨpo ɨsimishizya huje ɨgo bhabhomba mabhiibhi. 8 Zʉbhaji mubheene abhale hwi‑ibooma ɨlyɨ Yelusaleemu ahwanje ɨshikulukulu. Anɨ saga ɨmbala, pɨpo ahabhaazyo haanɨ hasɨɨle afishe.” 9 ɄYeesu lwa wayanga ɨzyo, ahasagala hu mukowa ʉgwɨ Galilaaya.

10 Leelo hu habhaazyo abhadoodo bhaakwe bhabhalile hwi‑ibooma ɨlyɨ Yelusaleemu ahwanje ɨshikulukulu, ʉYeesu wope ahabhala, leelo sinta ahwilolesye pa pazelu. 11 Ɨpo abhalongozi bha Bhayahuudi, lwa bhali pa shikulukulu, bhahabha bhahumʼmwanza ʉYeesu. Bhahabha bhahubhabhʉzɨɨlɨzya abhantu aje, “Wɨlɨ, ali hwoshi ʉmuntu ʉyo bhahunʼkwizya Yeesu?” 12 Abhantu abhinji afume mu mpʉga ɨla bhahali bhadaliihana hu nongwa ya Yeesu. Bhamo bhahagaga ʉYeesu muntu mwinza, leelo abhanjɨ bhahagaga ʉYeesu muntu ʉyo ahubhagobela abhantu. 13 Leelo nʉʉmo ʉmuntu wa‑ahali ahunʼnyanga ʉYeesu pa pazelu hu nongwa ɨya hubhoogope abhalongozi bha Bhayahuudi.

ɄYeesu ahubhamanyizya abhantu mu lubhaga lwɨ nyumba ɨmfinjile ɨya Ngʉlʉbhɨ

14 Ɨnsiku ɨzyɨ shikulukulu lwa zyafiha paahati, ʉYeesu ahabhala, ahatʉʉha mu lubhaga lwɨ nyumba ɨmfinjile ɨya Ngʉlʉbhɨ, ahanda hubhamanyizye abhantu. 15 Ɨpo abhalongozi bha Bhayahuudi bhahaswiga na hwande abhʉzɨlɨzanye huje, “Wɨlɨ, ʉmuntu ʉnʉ abhajiiye wɨlɨ amanye gonti ɨga sinta abhaazye?” 16 Ɨpo ʉYeesu ahabhaamula ahaga, “Ɨmanyizyo ɨzyo ɨhubhamanyizya saga zyanɨ, leelo zifuma hwa Ngʉlʉbhɨ ʉyo ahansonteleziizye huliimwɨ. 17 Ʉmuntu wowonti ʉyo ahwanza abhombe ʉkʉndwe wa Ngʉlʉbhɨ, anza‑amanye huje ɨmanyizyo ɨzi zifumile hwa Ngʉlʉbhɨ, saga ɨyanga hwi‑ikhone lyanɨ. 18 Ʉmuntu wowonti ʉyo ayanga hwi‑ikhone lyakwe, ahwiyanzila ʉmwamu waakwe yʉʉyo. Leelo ʉyo ahwanza ʉmwamu wʉ‑ʉla wa‑anʼsonteleziizye, ayanga ɨlyoli, saga ilenga.”

19 ɄYeesu ahajendeelela ayanje ahaga, “Mumɨɨnye huje ʉMoose ahabhapiiye abhamaama bheenyu ɨndajizyo zya Ngʉlʉbhɨ. Leelo nʉʉmo ʉmuntu paahati yeenyu ʉyo ahuzilondolezya ɨndajizyo ɨzyo. Ɨshi yeenu muhwanza hungoje?” 20 Ɨmpʉga ɨya bhantu yahamʼmwamula yahaga, “Aawe ʉli ni‑ipepo! Wɨlɨ, yʉ naanu wa‑ahwanza hugoje?” 21 ɄYeesu ahabhaamula ahaga, “Nahabhombile iyele lyeka pi‑isiku ɨlyɨ Sabaato, mwenti amwɨ mwahaswiga. 22 Enya, ʉMoose ahabhalajiziizye amwɨ atende ɨngoola ɨya hwitagaalila ɨyɨ lume abhaana bheenyu. Ɨndajizyo ɨyo saga yahafumile hwa Moose leelo hwa bhamaama bheenyu. Ɨshi amwɨ muli na miiho aga‑abhombe ɨmbombo ɨya‑atende ɨngoola hwope pi‑isiku ɨlyɨ Sabaato. 23 Mudandamala alondolezye ɨndajizyo ya Moose ɨya‑atende ɨngoola abhaana bheenyu abhɨ shilume pi‑isiku ɨlyɨ Sabaato, ɨshi yeenu muhumviitilwa anɨ hu nongwa ɨya humʼponie ʉmuntu pi‑isiku ɨlyɨ Sabaato? 24 Mugandi hunʼnonje ʉmuntu hwɨ‑ɨgo galoleha hwʉnzɨ, leelo mubhanje muhunʼnonga ʉmuntu alɨngaane nɨ lyoli pitagaalila lya Ngʉlʉbhɨ.”

Abhantu bhabhʉzɨlɨzanya nkashele ʉYeesu yʉ Mʼfyʉli

25 Ɨpo abhantu bhamo abha mwi‑ibooma ɨlyɨ Yelusaleemu bhahanda abhʉzɨlɨzanye bhahaga, “Wɨlɨ, ʉmuntu ʉnʉ saga ya yʉʉyo abhalongozi bhahwanza hunʼgoje? 26 Enya, ɨshi ayanga pa pazelu, leelo abheene saga bhayanga lyolyonti! Wɨlɨ, ɨbhajiiye huje abhalongozi ɨbho bhamɨɨnye huje lyoli ʉnʉ yʉ Kilisiti, ʉMʼfyʉli? 27 Leelo atɨ timɨɨnye ʉmuntu ʉnʉ ʉhwo afuma. Lyoli ʉMʼfyʉli wa‑ahwɨnza, nʉʉmo ʉmuntu ʉyo ahayimanya ʉhwo afumila.”

28 ɄYeesu lwa‑ali amanyizya mu lubhaga lwɨ nyumba ɨmfinjile ɨya Ngʉlʉbhɨ, ahayanga hwi‑izwi igoosi ahaga, “Lyoli mumɨɨnye anɨ, nantele mumɨɨnye ʉhwo ɨmfumile. Anɨ saga ɨnɨnzɨle hwi‑ikhone lyanɨ, leelo ʉNgʉlʉbhɨ wa‑ahansonteleziizye yʉ wɨ lyoli, amwɨ saga mumʼmɨɨnye. 29 Anɨ ɨmʼmɨɨnye, pɨpo ɨmfumile hwa mwene, nantele ya yʉʉyo ahansonteleziizye huliimwɨ.” 30 Ɨpo abhalongozi bhaala bhahanza idala ɨlya hunʼkhate, leelo saga ahalɨɨho ʉmuntu ʉyo ahalɨnjɨle hunʼkhate, pɨpo ahabhaazyo haakwe hahali hasɨɨle afishe. 31 Leelo abhantu abhinji ɨbho bhahali mu mpʉga ɨla bhahamʼmwɨtɨha ʉYeesu bhahaga, “Wɨlɨ, ʉMʼfyʉli lwa wɨnza, ahayibhomba amayele gaminji ashile ɨgo abhombile ʉmuntu ʉnʉ?”

Abhalɨndɨɨlɨli bhasontelezewa hunʼkhate ʉYeesu

32 ABhafalisaayo na bhalongozi bha bhasayi bha Ngʉlʉbhɨ bhahʉmvwa ɨmpʉga ɨya bhantu bhakwepelana ɨnongwa ɨzya Yeesu, bhahabhasonteelezya abhalɨndɨɨlɨli abhɨ nyumba ɨmfinjile ɨya Ngʉlʉbhɨ huje bhanʼkhate ʉYeesu. 33 Ɨpo ʉYeesu ahabhabhʉʉzya abhantu bhaala ahaga, “Ɨmbala‑abhe peeka naamwɨ hu habhaazyo hashe lwene, leelo pamandɨ nahayiweela hwa mwene ʉyo ahansonteleziizye. 34 Mwahayihunanza, leelo saga mwahayihundola, nantele saga mubhajiiye ahwɨnze ʉhwo nahayibha.”

35 Ɨpo abhalongozi bha Bhayahuudi bhahajeehana bhahaga, “Wɨlɨ, ʉmuntu ʉnʉ ahwanza abhale hwoshi ʉhwo atɨ saga tibhajiiye humʼmwaje? Wɨlɨ, ahwanza abhale hwa Bhayahuudi ɨbho bhanyampɨɨne mu mabooma ga saga ga Bhayahuudi na hubhamanyizye? 36 Wɨlɨ, ahwanza hutibhʉʉzye nongwa wɨlɨ hu mazwi gaakwe ɨga lwa‑ayanga, ‘Mwahayihunanza, leelo saga mwahayihundola, nantele saga mubhajiiye ahwɨnze ʉhwo nahayibha’?”

ɄYeesu ayanga ɨnongwa ɨzya Mʼpepo ʉMʼfinjile

37 Isiku ɨlya hu malishilo wɨ shikulukulu ɨshɨ masebhele, lyahali lisiku ligoosi, ʉYeesu ahɨmɨɨlɨla mu lubhaga lwɨ nyumba ɨmfinjile ɨya Ngʉlʉbhɨ, ahayanga pa pazelu ahaga, “Ʉmuntu wowonti ʉyo ahwiyʉmvwa ɨnyoota, ayɨnze hwaliinɨ amwele. 38 Ʉmuntu wa‑ahunɨɨtɨha anɨ, ahayibha nanshi ɨsho ɨsimbwilwe mu Nsimbo ɨMfinjile huje, ‘Ahayibha nɨ mbwiwi ɨyɨ mɨnzɨ aminji tee muuhati yaakwe.’ ” 39 ɄYeesu ahali ayanga ɨnongwa ɨzya Mʼpepo ʉMʼfinjile ʉyo bhonti ɨbho bhahumʼmwɨtɨha ʉYeesu bhahayihumʼmwambɨɨlɨla. Hu habhaazyo ɨho, ʉNgʉlʉbhɨ ahali asɨɨle hunʼsonteelezye ʉMʼpepo waakwe hwa bheene, pɨpo ʉNgʉlʉbhɨ ahali asɨɨle alolesye pa pazelu ʉmwamu wa Yeesu.

Abhantu bhatapuuhana hu nongwa ya Yeesu

40 Abhantu bhamo ɨbho bhahali mu mpʉga ɨla lwa bhʉmvwa amazwi ɨgo, bhahaga, “Lyoli ʉmuntu ʉnʉ nʼkuwi ʉyo tihunʼgʉʉlɨla afume hwa Ngʉlʉbhɨ.” 41 Abhantu abhanjɨ bhahaga, “Ʉmuntu ʉnʉ yʉ Mʼfyʉli.” Leelo abhanjɨ bhahaga, “Ndaadi, ʉmuntu ʉnʉ saga yʉ Mʼfyʉli, pɨpo ʉMʼfyʉli saga abhajiiye afume hu mukowa ʉgwɨ Galilaaya. 42 Wɨlɨ, mu Nsimbo ɨMfinjile saga zisimbwilwe huje ʉMʼfyʉli ahayifuma mu shikholo ɨsha mwɨnɨ ʉDaudi, nantele huje, anza‑apaapwe mwi‑ibooma ɨlyɨ Beseleheemu, ibooma ɨlyo ʉmwɨnɨ ʉDaudi ahali akhala?” 43 Ɨpo abhantu bhahatapuuhana hu nongwa ya Yeesu. 44 Bhamo bhahanzaga hunʼkhate, leelo nʉʉmo ʉmuntu ʉyo ahalɨnjɨle humʼpalamansye.

Abhalongozi bha Bhayahuudi saga bhahumʼmwɨtɨha ʉYeesu

45 Hu malishilo, abhalɨndɨɨlɨli abhɨ nyumba ɨmfinjile ɨya Ngʉlʉbhɨ bhahaweela nantele hwa bhalongozi bha bhasayi na Bhafalisaayo sinta hunʼkhate ʉYeesu. Ɨshi bhahabhabhʉzɨɨlɨzya bhahaga, “Yeenu saga munʼkhɨɨte ʉYeesu na hwɨnze nawo?” 46 Abhalɨndɨɨlɨli bhaala bhahabhaamula bhahaga, “Nʉʉmo ʉmuntu ʉwɨnjɨ ʉyo abhajiiye ayanje hwi‑ikhone nanshi ɨsho ayanga ʉmuntu ʉla.” 47 ABhafalisaayo bhahabhabhʉzɨɨlɨzya bhahaga, “Wɨlɨ, ʉYeesu abhagobɨɨye namwɨ? 48 Wɨlɨ, alɨɨho ʉnʼnongozi wowonti awe ʉMʼfalisaayo ʉmo ʉyo amʼmwɨtɨɨshe ʉYeesu? 49 Leelo ɨmpʉga ɨya bhantu ɨbho bhahumʼmwɨtɨha saga bhazimɨɨnye ɨndajizyo zya Moose. Bhali nʉ gunwe.”

50 Ɨpo ʉNikodeemu, ʉyo ahali ʉmo mwa bhalongozi bha Bhafalisaayo, ʉyo isiku limo ahabhalile nʉsiku hwa Yeesu, ahabhabhʉzɨɨlɨzya abhamwabho ahaga, 51 “Wɨlɨ, ɨndajizyo zya Moose zihwɨtɨshɨla hunʼnonje ʉmuntu nkashele saga titejeleziizye nasʉʉti na‑amanye ɨgo abhomba?” 52 Abheene bhahamʼmwamula ʉNikodeemu bhahaga, “Wɨlɨ, naawe ʉfumile hu Galilaaya? Bhalaga, ʉbhaazye nantele shinza ɨNsimbo ɨMfinjile, ɨpo ʉbhala‑amanye huje nʉʉmo ʉnʼkuwi ʉyo abhajiiye afume hu mukowa ʉgwɨ Galilaaya.” 53 Ɨpo abhantu bhonti bhahaweela mu mabooma gaabho.