Yoohani 8

Ʉnʼshɨ ʉyo akhɨɨtwe mu weegu

Leelo ʉYeesu ahasogola mu lubhaga lwɨ nyumba ɨmfinjile ɨya Ngʉlʉbhɨ, ahabhala hwi‑igamba ɨlyɨ Mizeyituuni. 2 Shampwi lwa hwasha, ʉYeesu ahaweela nantele mu lubhaga lwɨ nyumba ɨmfinjile. Abhantu bhonti bhahabhala hwa mwene, ɨshi ahakhala na hwande hubhamanyizye. 3 Ɨpo abhamanyizyi abhɨ ndajizyo zya Moose na Bhafalisaayo bhahanʼtwala hwa mwene ʉnʼshɨ ʉmo ʉyo ahakhɨɨtwe mu weegu, bhahamʼmɨɨha paahati yɨ mpʉga ya bhantu. 4 Ɨpo bhahamʼmʉʉzya ʉYeesu bhahaga, “Wee Mʼmanyizyi, ʉnʼshɨ ʉnʉ akhɨɨtwe hu habhaazyo ali abhembushe. 5 Alɨngaane nɨ ndajizyo zya Moose, ʉMoose ahatilajiziizye hunʼgoje ʉnʼshɨ ʉwɨ waaji ʉwu hwi‑idala ɨlya hunʼkhome na mawe. Wɨlɨ, aawe ʉyiga wɨlɨ?” 6 Abheene bhahamʼmʉzɨɨlɨzya ɨsho hunʼjele, huje bhalyaje idala ɨlya hunʼtaake. Leelo ʉYeesu ahabhʉndama, ahasimba pa nsi pa longo na hayoobhe haakwe. 7 Hu habhaazyo lwa bhajendeelela humʼmʉzɨɨlɨzye, ʉYeesu ahɨmɨɨlɨla, ahabhaamula ahaga, “Nkashele alɨɨho ʉmo paahati yeenyu ʉyo saga alɨnjɨle abhombe ɨmbiibhi nka lumo, ɨshi abhe wa hwande hunʼkhome ni‑iwe ʉnʼshɨ ʉnʉ.” 8 Ɨpo ʉYeesu ahabhʉndama nantele, ahajendeelela asimbe pa nsi pa longo.

9 Lwa bhʉmvwa ɨgo, ahanda asogole weeka weeka, ahwande abhagoosi afishe abhasahaala. Hu malishilo ʉYeesu ahasagala mwene nʉ nʼshɨ ʉyo, ʉyo ahɨmɨlɨɨye pitagaalila lyakwe. 10 Ɨpo ʉYeesu ahɨmɨɨlɨla na humʼmʉzɨɨlɨzye ʉnʼshɨ ʉla ahaga, “Wee nʼshɨ, bhali hwoshi abhantu ɨbho bhahutaaka? Wɨlɨ, nʉʉmo wowonti ʉyo asyalile huje aʼlonje?” 11 Ʉnʼshɨ ʉla ahamʼmwamula ahaga, “Wee Mwɨnɨ, nʉʉmo nka weeka.” Ɨpo ʉYeesu ahamʼmʉʉzya ahaga, “Nanɨ saga ɨhulonga. Bhalaga, leelo ahwande ɨshi, ʉgandi abhombe ɨmbiibhi nantele.”

ɄYeesu lukhozyo lwɨ nsi

12 Ɨpo ʉYeesu ahajendeelela ayanje nantele nɨ mpʉga ɨla ahaga, “Anɨ ɨndi lukhozyo hwa bhantu bhonti. Ʉmuntu wowonti ʉyo ahumbɨnjɨɨlɨla anɨ, saga anza‑ajende mu hiisi dumu, lyoli ahayibha nʉ lukhozyo ʉlwo luhunʼnongozya hu wʉʉmi ʉwa wiila na wiila.” 13 ABhafalisaayo bhahamʼmʉʉzya ʉYeesu bhahaga, “Aawe ʉhwisimishizya wʉmwene ɨnongwa zyaho. Leelo ʉsimishizi waaho saga wɨ lyoli.” 14 ɄYeesu ahabhaamula ahaga, “Hwope nkashele ɨhwisimishizya nɨmwene, ʉsimishizi waanɨ wɨ lyoli, pɨpo ɨmɨɨnye ʉhwo ɨmfumile, nantele ɨmɨɨnye ʉhwo ɨmbala. Leelo amwɨ saga mumɨɨnye ʉhwo ɨmfumile awe ʉhwo ɨmbala. 15 Amwɨ muhundonga anɨ alɨngaane nɨ shipimilo sha bhantu, leelo anɨ saga ɨhunʼnonga ʉmuntu wowonti. 16 Leelo nkashele anɨ ɨhunʼnonga ʉmuntu, ɨhunʼnonga hu lyoli, pɨpo saga ɨndi nɨmwene, leelo nɨɨnɨ peeka nʉ Daada ʉyo ahansonteleziizye. 17 Mu ndajizyo zyenyu ɨsimbwilwe huje, ‘Ʉsimishizi ʉwa bhantu bhabhɨɨlɨ wuhwɨtɨshɨlwa huje wɨ lyoli.’ 18 Hwi‑idala ɨli, anɨ ɨhwisimishizya nɨɨnɨ nʉ Daada ʉyo wa‑ahansonteleziizye wope ahunsimishizya anɨ.”

19 Ɨpo aBhafalisaayo bhahamʼmʉzɨɨlɨzya ʉYeesu bhahaga, “Wɨlɨ, ʉyise waaho ali hwoshi?” ɄYeesu ahabhaamula ahaga, “Saga mumɨɨnye anɨ awe ʉDaada waanɨ. Nkashele mwamanyaga anɨ, ɨshi mwɨnzaga humʼmanye nʉ Daada.” 20 ɄYeesu ahayanjile amazwi ɨgo hu habhaazyo ali amanyizya mu lubhaga lwɨ nyumba ɨmfinjile ɨya Ngʉlʉbhɨ, apantu ɨpo bhahali bhabhɨɨha ɨmpogooso zyɨ mpɨɨya. Leelo nʉʉmo ʉmuntu ʉyo ahanʼkhɨɨte, pɨpo ahabhaazyo haakwe hahali hasɨɨle afishe.

ɄYeesu ayanga afwe hwakwe

21 ɄYeesu ahabhabhʉʉzya nantele aBhafalisaayo bhaala ahaga, “Anɨ ɨsogola. Enya, lwa nasogola amwɨ mwahayihunanza, leelo mwahayifwa nɨ mbiibhi zyenyu. Ʉhwo ɨmbala, amwɨ saga mubhajiiye ahwɨnze.” 22 Ɨpo abhalongozi bha Bhayahuudi bhahabhʉzɨlɨzanya bhahaga, “Yeenu ayiga saga tibhajiiye humʼmɨnjɨɨlɨle ʉhwo abhala? Wɨlɨ, abhala hwigoje?” 23 ɄYeesu ahajendeelela hubhabhʉʉzye ahaga, “Amwɨ mufumile pa nsi ɨpa, leelo anɨ ɨmfumile hu mwanya. Amwɨ muli bha mu nsi ʉmu, leelo anɨ saga ɨndi wa mu nsi ʉmu. 24 Sha shɨɨsho ɨmbabhʉzɨɨzye huje mwahayifwa nɨ mbiibhi zyenyu. Ɨshi nkashele saga muhunɨɨtɨha huje anɨ nɨɨnɨ, mwahayifwa hu nongwa yɨ mbiibhi zyenyu.” 25 Ɨpo bhahamʼmʉzɨɨlɨzya ʉYeesu bhahaga, “Tibhʉʉzye, aawe we naanu?” ɄYeesu ahabhaamula ahaga, “Anɨ ya yʉʉla ʉyo ɨmbabhʉzɨɨzye afume hu wandilo. 26 Ɨndi nago minji ɨgo nɨnzaga‑ayanje hu nongwa yeenyu na hubhalonje, leelo saga ɨnza‑abhombe ɨsho. Leelo wa‑ahansonteleziizye wɨ lyoli, nanɨ ɨhubhabhʉʉzya abhantu bhonti ɨnongwa ɨzyo ɨnʉmvwɨzye afume hwa mwene.”

27 Abheene saga bhahazyagɨɨnye huje ʉYeesu ahali ayanga nabho hu nongwa ya Yise ʉwa hu mwanya. 28 Ɨpo ʉYeesu ahabhabhʉʉzya ahaga, “Lwa mwanʼzʉvya ʉMwana wa Muntu huje agogwe, ɨshi mwahayimanya huje nɨɨnɨ. Nantele mwahayimanya huje gonti ɨgo ɨbhomba, saga ɨbhomba hwi‑ikhone lyanɨ, leelo ɨyanga ɨgo ʉDaada waanɨ amanyiziizye anɨ. 29 ɄNgʉlʉbhɨ ʉyo ahansonteleziizye ali peeka naanɨ, saga andeshile nɨmwene, pɨpo ahabhaazyo honti ɨbhomba ɨgo gahunʼkhondeezya.” 30 ɄYeesu lwa‑ali ayanje ɨgo, abhantu abhinji bhahamʼmwɨtɨha.

ɄNgʉlʉbhɨ ahubhabhɨɨha abhantu abhe bhasatulwe

31 Ɨpo ʉYeesu ahabhabhʉʉzya aBhayahuudi bhaala ɨbho bhamʼmwɨtɨɨshe, ahaga, “Nkashele muhuzilondolezya ɨmanyizyo zyanɨ, lyoli amwɨ muli bhasundwe bhaanɨ. 32 Nantele mumɨɨnye ɨlyoli. Ɨshi, hwi‑idala ɨlyɨ lyoli ɨyo, ʉNgʉlʉbhɨ ahubhabhɨɨha abhe bhasatulwe.” 33 Bhope bhahamʼmʉʉzya bhahaga, “Atɨ tili bhamaama bha Abulahaamu. Saga tilɨnjɨle abhe bhakalwe bha muntu wowonti dumu. Yeenu ʉyanga huje atɨ tɨnza‑abhe bhasatulwe?” 34 ɄYeesu ahabhaamula ahaga, “Lyoli ɨhubhabhʉʉzya huje, ʉmuntu wowonti ʉyo ajendeelela abhombe ɨmbiibhi, abha ahuzibhombela ɨmbiibhi nanshi shiila ʉnʼkalwe sha‑ahumʼmombela ʉmwɨnɨ waakwe. 35 Ʉnʼkalwe saga akhala mu nyumba ya mwɨnɨ waakwe ɨnsiku zyonti, leelo ʉmwana wa mwɨnɨ akhala mu nyumba ɨnsiku zyonti. 36 Ɨshi nkashele anɨ nɨMwana wa Ngʉlʉbhɨ ɨmbasatuuye afume mu mbiibhi zyenyu, saga muli bhakalwe nantele, leelo muli bhasatulwe lyoli. 37 Ɨmɨɨnye huje amwɨ muli bhamaama bha Abulahaamu. Leelo muhwanza idala ɨlya hungoje, hu nongwa ya huje mukhaana huzyɨtɨshe ɨmanyizyo zyanɨ. 38 Anɨ ɨhubhabhʉʉzya ɨzyo ɨnzilolile afume hwa Daada waanɨ, leelo amwɨ mubhomba ɨzyo ʉyise weenyu abhamanyiziizye.”

39 Bhope bhahamʼmwamula ʉYeesu bhahaga, “Atɨ ʉyise weetu yʉ Abulahaamu.” ɄYeesu ahabhaamula ahaga, “Nkashele lyoli muli bhaana bha Abulahaamu, ɨshi handɨ mubhomba ɨgo ʉAbulahaamu ahali abhomba. 40 Anɨ ɨmbabhʉzɨɨzye ɨlyoli ɨyo ɨnʉmvwɨzye afume hwa Ngʉlʉbhɨ, leelo amwɨ muhwanza idala ɨlya hungoje. ɄAbulahaamu saga ahabhombile nanshi ɨsho muhwanza humbombele anɨ. 41 Ɨmbombo ɨzyo muhuzibhomba zifuma hwa yise weenyu.” ABhayahuudi bhaala bhahamʼmwamula ʉYeesu bhahaga, “Atɨ saga tili bhaana bhasosi, leelo ʉNgʉlʉbhɨ mwene ya yʉʉyo yʉ Daada weetu.” 42 ɄYeesu ahabhaamula ahaga, “Nkashele ʉNgʉlʉbhɨ abhanga yʉ Yise weenyu, ɨshi mwɨnzaga hungane, pɨpo anɨ nahafumile hwa Ngʉlʉbhɨ, leelo ɨshi ɨndi huliimwɨ. Anɨ saga ɨnɨnzɨle hu maha gaanɨ, leelo yʉ Ngʉlʉbhɨ ahansonteleziizye. 43 Yeenu saga muhuzyaganya ɨzyo ɨyanga? Saga muhuzyaganya, pɨpo saga mubhajiiye ahwɨtɨshe ɨzyo ɨhubhamanyizya. 44 Amwɨ muli bhaana bha yise weenyu ʉSeetano, nantele musʉngwa abhombe ɨgo ʉyise weenyu ahuganza. Ahwande halɨ ʉSeetano nʼgoji, nantele saga ahwanza huyimanye ɨlyoli, pɨpo ɨlyoli nɨɨmo mu mwoyo gwakwe. Ayanje ilenga, ɨyo yɨ njendo yaakwe ʉSeetano, pɨpo ʉmwene wi‑ilenga nantele yise wi‑ilenga. 45 Leelo anɨ ɨhubhabhʉʉzya agɨ lyoli, yɨ nongwa saga muhunɨɨtɨha. 46 Weenu mwaliimwɨ wa‑abhajiiye asimishizye huje anɨ ɨndi nɨ mbiibhi? Nanshi ɨgo ɨhubhabhʉʉzya gɨ lyoli, ɨshi yeenu saga muhunɨɨtɨha? 47 Ʉmuntu wowonti wa‑ali wa Ngʉlʉbhɨ, ahwʉmvwa amazwi ga Ngʉlʉbhɨ. Leelo amwɨ saga muhwʉmvwa hu nongwa ya huje amwɨ saga muli bhantu bhaakwe.”

ɄYeesu nʼgoosi ashile ʉAbulahaamu

48 ABhayahuudi bhahamʼmʉzɨɨlɨzya ʉYeesu bhahaga, “Wɨlɨ, saga tiyanga lyoli nkashele tiyiga aawe ʉli Nʼsamaliya na huje ʉli ni‑ipepo?” 49 ɄYeesu ahabhaamula ahaga, “Anɨ saga ɨndi ni‑ipepo. Anɨ ɨhunʼtiniha ʉDaada waanɨ, leelo amwɨ saga muhuntiniha anɨ. 50 Anɨ saga ɨhwanza huje amwɨ munsʉmbe, leelo alɨɨho ʉyo ahwanza hunsʉmbe, nantele ʉyo ahayibha Nʼnonzi wɨ lyoli. 51 Lyoli ɨhubhabhʉʉzya huje ʉmuntu wowonti ʉyo alondolezya ɨmanyizyo zyanɨ, saga anza‑afwe dumu.”

52 Ɨpo aBhayahuudi bhahamʼmʉʉzya ʉYeesu bhahaga, “Ɨshi taamanya huje aawe ʉli ni‑ipepo! ɄAbulahaamu na bhakuwi bhahafwiye, leelo aawe ʉyiga, ‘Ʉmuntu wowonti ʉyo alondolezya ɨmanyizyo zyanɨ, saga anza‑afwe dumu.’ 53 Wɨlɨ, aawe ʉhwibhɨɨha huje ʉli nʼgoosi ashile ʉmaama weetu ʉAbulahaamu? Ʉmwene ahafwiye. Abhakuwi bhope bhahafwiye. Wɨlɨ, aawe ʉhwibhɨɨha huje aawe we naanu?” 54 ɄYeesu ahabhaamula ahaga, “Nkashele nahwisʉmbaga nɨɨnɨ, ahwisʉmbe hwanɨ nɨɨmo ɨmbombo yoyonti. Leelo ʉDaada ʉyo amwɨ muyiga yʉ Ngʉlʉbhɨ weenyu, ya yʉʉyo ahunsʉmba anɨ. 55 Hwope ɨshi musɨɨle saga mumʼmɨɨnye ʉNgʉlʉbhɨ, leelo anɨ ɨmʼmɨɨnye. Nkashele nayangaga huje saga ɨmʼmɨɨnye ʉNgʉlʉbhɨ, ɨshi nabhanga ni‑ilenga nanshi amwɨ. Leelo anɨ ɨmʼmɨɨnye ʉNgʉlʉbhɨ nantele ɨlondolezya ɨgo ayanga. 56 Ʉmaama weenyu ʉAbulahaamu ahashiiye tee lwa waamanya huje anɨ nahayɨnza. Ahali nanshi andolile, ahashiiye tee.”

57 Ɨpo aBhayahuudi bhahamʼmʉzɨɨlɨzya ʉYeesu bhahaga, “Aawe saga ʉfisiizye amaaha amashʉmi gasaanu, ɨshi wahanʼnolile wɨlɨ ʉAbulahaamu?” 58 ɄYeesu ahabhaamula ahaga, “Lyoli ɨhubhabhʉʉzya huje, anɨ nahalɨɨho hu habhaazyo ʉAbulahaamu lwa‑asɨɨle apaapwe.” 59 ABhayahuudi lwa bhʉmvwa ɨzyo, bhahasebha amawe huje bhanʼkhome na hunʼgoje, leelo ʉYeesu ahʉʉbha na‑afume mu lubhaga lwɨ nyumba ɨmfinjile ɨya Ngʉlʉbhɨ.